Nyabihu: Abagabo biyemeje kuba bandebereho mu guhangana n’imirire mibi mu ngo zabo

Yanditswe na N.Kubwimana Janvière
Kuya 18 Nyakanga 2020 saa 02:28
Yasuwe :
0 0

Ubusanzwe iyo bavuze ku bijyanye no gutegura ifunguro mu muryango n’indi mirimo ijyanye nabyo, abenshi bahita bumva ko ari akazi kareba abagore, umugabo ugerageje gukora iyi mirimo agafatwa nk’inganzwa bigatuma ntawe utinyuka kubikora.

Iyi yaje kuba imbogamizi ikomeye mu muryango, aho yagize ingaruka mu guteza indwara ziterwa n’imirire mibi mu bana bato, biviramo no kugwingira abatari bake.

Bamwe mu bagabo bo mu Karere ka Nyabihu bamaze kubona ko ingo zabo zugarijwe n’imirire mibi bihitiyemo gufata iya mbere mu kuba bandebereho mu guhangana n’iki kibazo, bafatanya n’abagore babo mu gutegurira abana babo indyo yuzuye.

Aba bagabo bavuga ko mbere bumvaga ko abagore ari bo bagomba gutekera abana babo bakanabagaburira, bo bakajya mu kabari gusangira inzoga na bagenzi babo bagataha baje kuryama ntibite ku mibereho y’umuryango.

Baramumenya Jean Damascène wo mu Murenge wa Mukamira yagize ati "Ubundi mbere umugabo yari uwo kunywa agacupa ubundi agataha aje kurya no kuryama, uwatekaga mu rugo iwe yitwaga inganzwa, byatumaga duhora turwaje bwaki. Ubu twarahuguwe nzi gutegurira umuryango indyo yuzuye yiganjemo imboga kandi no kubiteka ni uko, ubu iwanjye bwaki yabaye amateka".

Mugenzi we Nsengiyumva Jean Damascène avuga ko usibye no kuba abagabo barahinduye imyumvire, aho batuye batajya barebera urugo rutagira akarima k’igikoni kuko bazi icyo kavuze mu kurwanya imirire mibi.

Ati "Ubu nta muturanyi wacu twakwemera ko abaho adafite akarima k’igikoni aho tubonye batagafite turabasura tukabaganiriza ndetse tugasiga tukabubakiye, byose bikozwe natwe abagabo bamaze kumva neza agaciro ko kwita ku bana bacu aho kubatererana bakarwara bwaki".

Ku ruhande rw’abagore nabo bavuga ko kuba hari abagabo bahinduye imyumvire bakumva ko kwita ku muryango cyane mu kuwutegurira indyo yuzuye mu guhangana n’imirire mibi, byatumye boroherwa n’akazi ko mu rugo, ndetse binagabanya ikibazo cyari kibugarije cyo kurwaza bwaki abana babo, ariko ikisumbuyeho ngo ni uko byabongereye ubusabane mu muryango binagabanya amakimbirane hagati yabo.

Umuyobozi wungirije w’umushinga Gikuriro, uharanira kurwanya imirire mibi n’igwingira mu bana bato mu Rwanda, Yvonne Murungi, yavuze ko bashyize imbaraga mu kwegeranya amatsinda cyane bibanda ku bagabo kugira ngo bamenye gutegurira indyo yuzuye imiryango ntibabiharire abagore.

Yaguze ati "Mu myaka hafi itanu twakoreye mu Karere ka Nyabihu, twahasanze imirire mibi iri ku rwego rwo hejuru, twahisemo gukorera mu matsinda twibanda ku bagabo kugira ngo babanze bumve neza uruhare rwabo mu kwita ku muryango, bategurira abana indyo yuzuye kandi babikoranye isuku, barabyumvise ubu twabashyize mu matsinda bigisha bagenzi babo, kandi imirire mibi yaragabanutse ku buryo bugaragara n’ubwo bitaragera aho twifuza".

Umukozi w’Akarere ka Nyabihu ukuriye ishami ry’ubuzima, Dusenge Pierre, avuga ko hamwe no guhindura imyumvire kw’abaturage bari mu nzira zo guhangana n’ikibazo cy’imirire mibi n’igwingira.

Yagize ati "Mu isuzuma ryakozwe 2014/2015 twari ku isonga mu kugira abana benshi mu gihugu bagwingiye, aho twari kuri 59%, ariko aho abaturage bahinduriye imyumvire, bakamenya gutegura indyo yuzuye n’abagabo babigizemo uruhare rufatika babijyanisha n’isuku, ubu turi ku rwego rushimishije, gusa turacyafite urugendo".

Mu ibarura riheruka gukorwa mu myaka itanu ishize, Akarere ka Nyabihu kaje ku mwanya wa mbere mu kugira umubare munini w’abana bagwingiye, aho bari kuri 59%, naho isuzuma riherutse gukorwa n’aka karere bafatanyije n’umufatanyabikorwa wabo mu kurwanya imirire mibi Gikuriro Rwanda, ryagaragaje ko bageze kuri 44,1%, mu gihe intego igihugu cyihaye ari ukuba mu 2024, igwingira mu bana bato rizaba rigeze kuri 19%.

Imbuto ntizibagirana mu gutegura indyo yuzuye
Ibitera imbaraga ni bimwe mu bitagomba kubura ku ifunguro
Abaturage basobanura ko isuku n'isukura nabyo byagize uruhare runini mu guhangana n'imirire mibi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .