Nyabihu: Abafundi n’abayede bahawe ubumenyi ku byo kwitwararika mu kwirinda COVID-19 mu kazi kabo

Yanditswe na N.Kubwimana Janvière
Kuya 28 Nyakanga 2020 saa 10:57
Yasuwe :
0 0

Abantu bakora umwuga w’ubwubatsi bazwi nk’abafundi n’abafasha babo [abayede] bo mu Murenge wa Mukamira mu Karere ka Nyabihu, basobanuriwe uko bagomba kwitwararika mu kazi bakora buri munsi, bubahiriza amabwiriza yo kwirinda COVID -19.

Ni igikorwa cyakozwe n’Abanyarwanda baba mu Budage bibumbiye mu Kigo T. Comm IT Ltd kizobereye mu kubaka ibyumba by’amashuri mu Rwanda; cyari kigamije kwibutsa abakora akazi k’ubwubatsi ko n’ubwo bagize amahirwe yo kugasubiramo, bitavuze ko icyorezo cya COVID -19 cyarangiye ariyo mpamvu bagomba kwirinda.

Bamwe mu bubatsi bavuga ko kuba bibukijwe uko bagomba kwitwararika mu gihe bari mu kazi kabo, byabahaye umukoro wo gukomeza kunoza amabwiriza yo kwirinda COVID -19, kugira ngo hatabaho kuyikwirakwiza.

Ndindiriyimana Fidèle yagize ati “Nubwo twagize amahirwe tukongera gusubizwa mu kazi ariko turabizi neza ko Coronavirus igihari, tuyifata nk’igisasu urangaye cyaguturikana. Uyu munsi twongeye kwibutswa uko tugomba kwitwararika turangwa n’isuku, duhana intera mu kazi n’ibindi kugira ngo hatabaho gukwirakwiza iki cyorezo.’’

Uwineza Adelphine na we yagize ati ‘‘Usibye kuba twahawe ubujyanama ku buryo twakwirinda COVID -19, mu gihe turi mu kazi, twanahawe ibidufasha kuyirinda, nk’udupfukamunwa najyaga nambara kamwe ku munsi kandi turakanduza cyane ariko nzajya ngasimburanya n’ako nahawe.’’

icyo kurya twakibonye cyane ko natwe ubukungu bwacu bwashegeshwe n’iki cyorezo, mu gihe twabonye akazi ntituzateshuka ku nshingano zo kwirinda iki cyorezo.’’

Umuhuzabikorwa w’Umushinga P 4188, w’Abanyarwanda baba mu Budage ushyirwa mu bikorwa na T. CommIT Ltd, Kalimba Banga Claude, yavuze ko intego yabo ari ukwigisha abaturage uko birinda COVID -19 no kunganira abafite ubushobozi buke.

Yagize ati “Icyo tuba tugamije ni ukwigisha Abanyarwanda uko birinda COVID -19, muri bo harimo abafundi twakoranye aha twubaka ibyumba bitanu by’amashuri n’icyumba cy’umukobwa.’’

Muri iki gikorwa kandi abafundi n’abayede 150 n’abandi bantu 15 bari mu Cyiciro cya Mbere cy’Ubudehe bahawe ibikoresho by’isuku, ibiribwa birimo ibilo 10 by’umuceri, ibilo 10 bya kawunga, ibilo bitanu by’ibishyimbo, litiro ebyiri z’amavuta.

Kalimba yakomeje agira ati “Hari n’abandi tutakoranye ariko bagizweho ingaruka n’iki cyorezo. Twagejejeho inkunga y’ibiribwa, udupfukamunwa n’ibindi bikoresho by’isuku. Ubutumwa tubaha ni uko aho bakorera hose bazajya bibuka kwirinda kuko icyorezo kiracyahari.’’

Muri iki gikorwa Umunyamabanga Nshingwabikorwa w’Umurenge wa Mukamira, Munyansenga Fred, yasabye abaturage gushyira mu bikorwa inyigisho bahawe zirebana no kwirinda COVID -19 kuko mu gihe batabikoze baba bashyira ubuzima bwabo n’ubwa bagenzi babo mu kaga.

Yanenze bamwe mu baturage bateshuka ku mabwiriza yashyiriweho kwirinda ikwirakwira rya Coronavirus abereka n’ingaruka baba bikururira.

Mu Murenge wa Mukamira mu Kagari Ka Rubaya ku Rwunge rw’Amashuri rwa Nanga, Abanyarwanda baba mu Budage bahujuje ibyumba by’amashuri bigera kuri bitanu, icyumba cy’umukobwa, ubwiherero n’urukuta rurinda aya mashuri guhirima kuko yegeranye n’umugezi, byose byatwaye agera kuri miliyoni 153 Frw.

Abafundi n’abayede bo mu Karere ka Nyabihu bahawe ubumenyi ku byo kwitwararika mu kwirinda icyorezo cya COVID-19 mu kazi kabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .