Uwaciwe ukuguru n’impanuka ashinja umwunganizi we kumutwara indishyi

Yanditswe na Deus Ntakirutimana
Kuya 7 Ukuboza 2016 saa 07:32
Yasuwe :
0 0

Ntakirutimana Emmanuel w’imyaka 22, wahoze ari umumotari mu Mujyi wa Kigali, akaza gukora impanuka yacikiyemo ukuguru mu Ugushyingo 2011, arashinja uwamwunganiraga mu mategeko kumutwara indishyi z’akababaro yagenewe.

Akimara gukora impanuka yahuye na Uwizeyimana Francis wamwemereye kumwunganira mu mategeko, akazamuha 10% by’amafaranga azabona nk’indishyi y’akababaro.

Bwa mbere ngo yagombaga kwishyurwa na SORAS miliyoni icyenda z’amanyarwanda ariko Uwizeyimana amwumvisha ukuntu ari make mu gihe iyo mpanuka yamuteye ubumuga bwa burundu maze amusaba ko bajurira.

Icyo gihe ngo yagiye amusaba ibyangombwa bitandukanye atangira inzira zo kujurira ariko ngo nyuma ntiyongeye kumwikoza.

Ati “Akimara kujurira ntiyongeye kunyikoza, naramuhamagaragara akambwira ngo ntibirarangira, bimaze igihe kinini ambwira ko bamutumye ibyangombwa by’aho mvuka, ndabizana ndabimuba, akomeza kuntuma dosiye ananiza, iza nyuma nzimushyiriye nsanga yavanyeho telefoni.”

Mu kwezi gushize nibwo Ntakirutimana ngo yajyanye dosiye kuri SORAS Aatungurwa no gusanga yarishyuwe.

Ati “Bambajije nimero ya dosiye ndayibura kuko ni we wari uyifite, bansaba indangamuntu nyibahaye barambwira ngo ’dore wishyuwe miliyoni 12 ku itariki 22 Mata 2015, ndangije natahanye agahinda muhamagaye mubajije ahita akuraho telefoni byihuse.’”

Amaze kumenya ko amafaranga yatanzwe ngo rimwe yaramuhamagaye amubwira ko yaza akamuha make, ariko aho bigeze amutera ubwoba.

“ Iyo tuvuganye muri ino minsi antera ubwoba ambwira ngo nzajye kumurega aho nshaka….”

Ntakirutimana asaba ko yafashwa kubona ayo mafaranga kuko ngo we bimugoye nk’umuntu utazi amategeko.

Ku rundi ruhande Uwizeyimana ahamya ko yahaye Ntakirutimana ayo mafaranga.
Ati “Uwo muhungu arababeshya maze yabonye indishyi agura n’inzu. Inzu atuyemo ni iyo yaguze, kugira ngo umenye ukuri umubaze n’igihe yayiguriye.”

Uwizeyimana yavuze ko atazi umubare w’amafaranga ikigo cy’ubwishingizi cyabishyuye kuko ngo adafite impapuro ariho kandi ngo n’abakiliya yakira baba ari benshi.

Ati “Sinagendanye impapuro ngo mvuge amafaranga yahawe, hari ibimenyetso bigaragaza ko yabonye amafaranga kandi ko yaguze inzu. Niba nta mafaranga yabonye mubaze ngo inzu ubamo wayivanye he? Yemera ko yayiguze muri ariya mafaranga yahawe.”

Uwizeyimana akomeza avuga ko amafaranga atagombaga gucishwa kuri konti ya Ntakirutimana kuko ngo yari yamuhaye uburenganzira bwo kuyakira, anahakana ibyo gutera ubwoba umukiliya we.

Ati “Amafaranga ntiyagombaga guca kuri konti ye kuko yatanze ‘procuration’ isinywaho na noteri. Yambwiye ko amafaranga nzayafata nkayamuzanira, yarayabonye kandi yaguze n’inzu, ibyo ndabihamya mpagaze ku maguru abiri.”

Ku ruhande rw’urugaga rw’abunganira abantu mu mategeko runashinzwe imyitwarire y’abarugize, Umuyobozi warwo Nshingwabikorwa Mugisha Victor yavuze ko utaka ko yahemukiwe agomba kwegera urwo rugaga afite ibimenyetso, akandikira umuyobozi warwo bakamufasha.

Ibyo bakora ngo birimo kugira inama avoka mu gihe byananirana bagafasha ufite icyo kibazo kuba yakwiyambaza izindi nzego.

Ntakirutimana uvuka mu karere ka Nyamasheke, ubu atuye mu ka Gasabo mu Murenge wa Ndera, yakoze impanuka amaze imyaka ibiri n’igice ari umumotari.

Impanuka yatumye amara mu bitaro amezi ane avurwa ku mafaranga y’u Rwanda asaga ibihumbi 200 yatangiwe na Uwizeyimana wamwunganiraga.

Ntakirutimana Emmnauel ashinja umwunganizi we ko yamuriganije amafaranga y'indishyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza