Ntabwo ingabo z’u Rwanda zagiye muri Congo kwica Abanyarwanda, zagiyeyo kubacyura- Gen Kabarebe

Yanditswe na Bukuru JC
Kuya 18 Nyakanga 2020 saa 03:23
Yasuwe :
0 0

Umujyanama wa Perezida Kagame mu bijyanye n’umutekano Gen James Kabarebe, yavuze ko ingabo z’u Rwanda zitagiye muri Repubulika Iharanira Demokarasi ya Congo kwica impunzi nk’uko abashaka kugoreka amateka babivuga, ko ahubwo zari zigiye kuzicyura kugira ngo zize gufatanya n’abandi kubaka igihugu.

Nyuma gato ya Jenoside yakorewe Abatutsi mu 1994, Guverinoma nshya yisanze mu bibazo by’umutekano mucye waterwaga n’ibitero by’interahamwe na Ex-FAR bari baramaze guhungira muri RDC, ndetse n’ibijyanye n’umubare munini w’impunzi zari muri iki gihugu.

Mu gushakira umuti urambye ibi bibazo, guverinoma yafashe umwanzuro wo kohereza ingabo muri RDC ngo zijye gucyura impunzi no guhashya ingabo za EX-FAR zari zatangiye kugaba ibitero ku Rwanda.

Mu kiganiro ku kwibohora ku nshuro ya 26, Umujyanama wa Perezida Kagame mu bijyanye n’umutekano Gen James Kabarebe yavugiye kuri Televiziyo y’Igihugu uko ibikorwa byo gucyura impunzi byakozwe.

Byari ngombwa ko u Rwanda rwohereza ingabo muri Congo

Nyuma y’uko ingabo zahoze ari iza RPA zifashe igihugu zigahagarika Jenoside yakorerwaga abatutsi mu 1994, ingabo za EX-FAR zari zimaze gutsindwa zambutse umupaka zijya muri Congo zijyana n’ibihumbi by’abanyarwanda bumvaga ko batazagira amahoro kuva RPA yafashe igihugu.

Muri uku kujya muri Congo kw’interahamwe n’ingabo za EX-FAR, bajyanye n’ibikoresho by’intambara byabo byose maze leta ya Congo ibatuza neza mu nkambi ziri hafi n’imipaka y’u Rwanda zirimo iya Kibumba nta kuvangura abasirikare n’abaturage.

Nyuma yo kugera muri izi nkambi interahamwe zari zigifite umugambi wa Jenoside zakomeje imyitozo yazo ndetse mu mpera za 1995 zitangira kugaba ibitero mu Rwanda no kwica abantu ku mipaka yegereye Repubulika iharanira Demokarasi ya Congo.

Kuba imitwe yitwaje intwaro yari yegereye umupaka w’u Rwanda, bihabanye n’Amategeko Mpuzamahanga. Guverinoma y’u Rwanda yagombaga gushaka igisubizo cy’iki kibazo cyari kibangamiye ituze ry’igihugu kivuye muri Jenoside yakoranywe ubukana mu kinyejana cya 20.

Muri ibi bihe Leta y’u Rwanda ntiyahwemaga kugaragaza ko ishaka ko abanyarwanda bahungiye muri Congo batahuka bagasubira mu gihugu cyabo, gusa hari abari babifitemo inyungu zirimo n’iza politiki.

Ibi byatumye Guverinoma y’u Rwanda yohereza ingabo muri Zaïre [RDC y’ubu] ngo zisenye inkambi zicyure abanyarwanda bagera kuri miliyoni eshatu bari baramaze gufatwa bugwate n’izi ngabo za Ex-FAR ndetse n’interahamwe.

Gen James Kabarebe yasobanuye uko ibikorwa byo gucyura impunzi byagenze, avuga ko mu nkambi zose ingabo z’u Rwanda zagezemo nta n’imwe yigeze iberamo intambara.

Yagize ati “Mu gikorwa cyo gucyura abantu kuva muri Zaire nta nkambi n’imwe uhereye Gatare, Gahindo, Kibumba, Mugunga, Katana, Gashusha, Kansanyo na Kamanyola mu majyepfo ya Kivu, zose uko zari ku murongo nta nkambi n’imwe yabereyemo imirwano, nta nkambi n’imwe yatewe”.

Yakomeje agira ati “Icyakozwe ni ukuzenguruka izo nkambi zose Ex-FAR ikava mu nkambi ikaza gutera ingabo z’u Rwanda noneho ingabo zikabona uko zicyura impunzi. Ntabwo ingabo z’u Rwanda zagiye muri Congo kwica abanyarwanda zagiye muri Congo gucyura abanyarwanda bari bafashwe bugwate n’iyo mitwe yari yarakoze amahano mu Rwanda.”

Ingabo z’u Rwanda zimaze kugera muri Congo zikazenguruka izo nkambi abanyarwanda barabohotse batangira gutaha neza aho bahereye ku bari mu nkambi ya Kibumba, Gatare, Gatana n’iya Gahindo bihuza n’abari mu nkambi ya Mugunga.

Gen Kabarebe avuga niyo urebye umutuzo batahukanye n’uburyo bakiriwe uhita wibonera ukuri kw’ibivugwa.

Ati “Muzarebe ishusho y’abantu bava Mugunga bataha bikoreye ibintu byabo bagenda mu ituze binjira mu Rwanda bakirwa na Guverinoma ku mipaka yari ibategereje muri Rubavu. Ntabwo abantu bahungabanye barashwe bagenda kuriya kuko nta n’isasu na rimwe ryavugiye mu nkambi ya Mugunga no muri izo nkambi zindi zose kuko nta mirwano yahabaga”.

Uretse aba batashye hari abandi bakomeje kugirwa ingwate na Ex-FAR, uko yagiye ihunga ibakomezanya mu bice bya Masisi, Walikale kugera na Tingitingi, aho bongeye gushinga indi nkambi.

Gen Kabarebe avuga ko nta ntambara yabereye n’aha Tingitingi ko ahubwo ingabo za Ex-FAR zatsindiwe ku mugezi wa Hoso.

Ati “Ingabo za Ex-FAR zatsindiwe ku mugezi wa Hoso zitsindiwe aho ziruka muri Tingitingi zirasa amasasu kugira ngo za mpunzi zikomeze zijyane nabo ni uko bagiye bamwe bajya Brazzaville abandi bajya muri Centrafrique, ntabwo rero ingabo z’u Rwanda zigeze n’umunsi n’umwe zitera inkambi iyo ariyo yose”.

Kabarebe yifashishije urugero rwa Habumugisha Innocent, warashweho agacika akaboko ubwo yari mu bafashwe bugwate na Ex-FAR, yavuze ko hari abaturage bashobora kuba barakomerekeye muri uku guhangana hagati y’ingabo z’u Rwanda na Ex-FAR ariko ko nta bwicanyi ingabo z’igihugu zigeze zibakorera.

Ati “Ntabwo wavuga ko nta muturage wakomerekera muri ubwo buzima, birashoboka...nk’abo bagoswe n’ingabo zakoze Jenoside bagashinga imbunda bari kumwe n’impunzi bakarasa bazitwaje uwo barashe agasubiza hashobora gukomereka n’umusivile”.

Gen Kabarebe avuga ko “iri cengezamatwara ryo kuvuga ngo ingabo z’u Rwanda zagiye muri Congo zica abantu, rizanwa n’abantu bafite ipfunwe, abantu batsinzwe ku rugamba, n’ubu bakaba bagitsimbaraye kuri ibyo bitekerezo…no ku miryango yari ibifitemo inyungu nyinshi cyane z’imibereho ubwabo bifuzaga ko impunzi miliyoni eshatu zitava muri Congo kuko bwari bwo buzima bwabo”.

Akomeza avuga ko iki kinyoma ari cyo gituma bamwe mu basize bakoze amahano mu Rwanda bakomeza kwigarurira bamwe mu banyarwanda bakiri mu buhungiro.

Ati “Miliyoni eshatu zapfa ahantu ntihaboneke n’umurambo n’umwe, Miliyoni esheshatu ni abantu bapfa bakazimira ntubone numwe, iryo ni icengezamatwara ari naryo bakoresha mu gufata bugwate abana b’urubyiruko n’impunzi nyinshi zikiri Brazzaville zikiri Zambia, zikiri Malawi zikiri Mozambique, Zimbabwe, kuko badafite ikintu cy’icengezamatwara bahimba ntabwo bafite uko baguma bafashe izo mpunzi bugwate kuko ntibashaka ko impunzi zibavamo kuko zibasize bonyine babura aho bajya”.

Hari ibikorwa byinshi bigaragaza ko iki ari ikinyoma cyahimbwe n’ababifitemo inyungu kuko nta buryo ingabo z’u Rwanda zari zifite gahunda yo kwica impunzi muri Congo zikarengaho zigaha ikaze mu gisirikare abahoze mu ngabo za Habyarimana kandi arizo bari bahanganye nazo.

Gen Kabarebe yavuze ko ingabo z'u Rwanda zagiye muri RDC gucyura impunzi zitagiye kuzica
Impunzi z'abanyarwanda bari muri Congo batashye mu ituze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .