Nta tegeko na rimwe u Rwanda rufite rivuguruzanya n’amategeko mpuzamahanga y’intambara

Yanditswe na Sekamana Mathias
Kuya 18 Nyakanga 2019 saa 08:22
Yasuwe :
0 0

Abashakashatsi bagaragaje ko amategeko yose u Rwanda rufite nta na rimwe rihabanye n’amategeko mpuzamahanga agenga intambara.

Ni nyuma y’ubushakashatsi Komisiyo y’u Rwanda ishinzwe kuvugurura amategeko yakoze ku bijyanye n’amategeko mpuzamahanga y’intambara.

Ubu bushakashatsi bwamuritswe mu nama y’umunsi umwe yahuje abanyamategeko btandukanye bo muri Minisiteri y’ubutabera, Urukiko rw’ikirenga, Ubushinjacyaha, Minisiteri y’ububanyi n’amahanga, komisiyo y’uburenganzira bw’umwana na komite mpuzamahanga ya Croix Rouge mu Rwanda.

Umuyobozi wa Komisiyo y’u Rwanda ishinzwe ivugururwa ry’amategeko Havugiyaremye Aimable, yavuze ko bakora ubu bushakashatsi mu rwego rwo kumenya niba amasezerano mpuzamahanga yose igihugu cyasinye yubahirizwa.

Ati “Dukora ubushakashatsi ku mategeko mpuzamahanga u Rwanda rwasinye, twasanga hari aho ahabanye n’asanzwe ahari tukayavugurura kugira ngo ahuzwe n’ayaruta mu busumbane bw’amategeko.”

Yongeyeho kandi ko ubu bushakashatsi bwari bugamije kugaragaza niba hari amategeko u Rwanda rutarasinya akeneye gusinywa kugira ngo uru rwego rutange inama, rugaragaza n’impamvu akwiye gusinywa.

Bwari bugamije kandi kugaragaza niba hari amategeko u Rwanda rugira agongana n’amasezerano mpuzamahanga agenga intambara, aho byagaragaye ko nta na rimwe rihari.

Abashakashatsi bagaragaje ko hari amategeko mpuzamahanga agenga intambara u Rwanda rwasinye ariko yifitemo ibyuho kuko atagena ibihano ku byaha bijyanye no kuyarengaho, kandi amategeko mpuzamahanga u Rwanda rusinye yose aba agomba kubahirizwa nk’andi mategeko bityo hakaba hakwiye ibihano ku bayerenzeho.

Umuyobozi wungirije wa komite mpuzamahanga ya Croix Rouge mu Rwanda, Makram Soua, yavuze ko bishimiye ko u Rwanda rwatangiye uyu mushinga.

Ati “Turishimye ko u Rwanda rwabaye igihugu cya mbere mu karere ka Afurika y’Uburasirazuba gitangiye uyu mushinga. Icya mbere twitaho ni ugukumira amakimbirane, ariko biri mu nshingano zacu gufasha ibihugu gushyira mu mategeko yabyo amwe mu mategeko mpuzamahanga agenga intambara kuko udutsiko twitwaje intwaro kenshi dukunda kuyarenga kuko aba adahuye n’asanzwe mu bihugu tubarizwamo.”

Umushakashatsi akaba n’Umwarimu mu Ishami ry’amategeko rya Kaminuza y’u Rwanda, Serugo Jean Baptiste, yavuze ko ari byiza ko u Rwanda nk’igihugu cyohereza ingabo mu butumwa bw’amahoro mu bihugu birimo intambara kiba gikwiye kugira amategeko mpuzamahanga y’intambara rusinya.

Ati “Izo ngabo zigomba kuba zizi amategeko azigenga, arengera abantu mu gihe cy’intambara. U Rwanda rero rugomba guteza imbere ayo masezerano mpuzamahanga no kuyasinya.”

Umukozi wa Minisiteri y’Ububanyi n’amahanga n’ubutwererane ushinzwe amasezerano mpuzamahanga u Rwanda rusinya, Ntungire Jolly, yavuze ko ubu bushakashatsi bubafasha kumenya amasezerano u Rwanda rukwiye gusinya nubwo ibyo bagaragarijwe byose atari ko bisinywa.

Ati “Ibifite akamaro bizagenda bikorwa. Ntabwo ibisohotse mu bushakashatsi byose ari ko bisinywa.”

Kugeza ubu amasezerano mpuzamahanga agenga intambara u Rwanda rwasinye rukanayemeza burundu agera kuri 17, naho ayo rutarasinya ni 14.

Umuyobozi wa Komisiyo y’u Rwanda ishinzwe ivugururwa ry’amategeko Havugiyaremye Aimable na Makram Soua ubwo hatangazwaga ubu bushakashatsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza