00:00:00 IGIHE NETWORK KN KINYARWANDA EN ENGLISH FR FRANCAIS

Nta kirahinduka- Biruta avuga ku mubano w’u Rwanda na Uganda

Yanditswe na Iradukunda Serge
Kuya 30 Nyakanga 2021 saa 12:56
Yasuwe :
0 0

Minisitiri w’Ububanyi n’Amahanga n’Ubutwererane akaba n’Umuvugizi wa Guverinoma y’u Rwanda, Dr Vincent Biruta, yatangaje ko nta kirahinduka mu gukemuka kw’ibibazo bimaze igihe biri hagati y’u Rwanda na Uganda.

Iyi ngingo y’umubano w’u Rwanda na Uganda, Minisitiri Biruta yayigarutseho ku wa 29 Nyakanga 2021 mu kiganiro n’abanyamakuru.

U Rwanda na Uganda bimaze igihe kinini bidacana uwaka ahanini biturutse ku kuba, u Rwanda rushinja iki gihugu gufasha imitwe igamije kuruhungabanyiriza umutekano no guhohotera Abanyarwanda baba cyangwa bakorera ibikorwa bitandukanye muri Uganda.

Minisitiri Biruta yavuze ko kugeza ubu nta kintu kirakorwa gikomeye gitanga icyizere ko umubano w’ibihugu byombi waba ugenda uba mwiza.

Yavuze ko u Rwanda rwiteguye kubanira neza abaturanyi bose barimo na Uganda, ko ariko na rwo rukeneye ubushake bwa politike bw’ibi bihugu mu gukemura ibibazo bihari.

Yagize ati “Umubano na Uganda navuga ko nta kintu cyahindutse cyane ariko Guverinoma y’u Rwanda yiteguye kugarura umubano mwiza n’abaturanyi bacu bose barimo na Uganda ugende neza.”

Yakomeje avuga ko kugira ngo u Rwanda rubashe kongera kubaka umubano mwiza na Uganda, na yo ikeneye kwerekana ubushake mu gukemura ibibazo byagaragajwe birimo n’icyo guhohotera Abanyarwanda.

Ati “Kugira ngo tubashe gukora ibi dukeneye ubushake bwa politike bw’abaturanyi bacu dukeneye kandi gukemura ibibazo twagiye tuganiraho mu myaka myinshi ishize dukeneye kubikemura.”

“Ihohoterwa ry’Abanyarwanda bajya muri Uganda cyangwa akaba ariho baba, ubufasha bw’inzego z’umutekano za Uganda mu guhangana n’imitwe ishaka guhungabanya igihugu cyacu. Ibi byose bigomba gukemurwa, hakenewe ubushake bwa politike twiteguye gukora ibitureba ngo tubashe kubaka umubano mwiza na Uganda.”

Ibibazo by’u Rwanda na Uganda bigiye kumara imyaka isaga itanu bisa n’ibyabuze gica, kuko hagiye habaho ibiganiro bitandukanye bigamije gushakira ibisubizo hamwe ariko kugeza ubu umusaruro wabyo ukaba utagaragara.

Ibi bibazo byageze n’aho bihuza abakuru b’ibihugu bombi. Ni mu biganiro byabereye i Gatuna ku wa 21 Gashyantare 2021 aho byari birimo na Perezida Lourenço wa Angola hamwe na Tshisekedi wa RDC nk’abahuza.

Mu myanzuro yagiye ifatirwa muri ibi biganiro harimo uvuga ko impande zombi zemeranyije kugenzura umubare n’ibibazo by’abenegihugu baba bafungiwe mu kindi gihugu.

Impande zombi kandi zemeranyije kurinda no kubahiriza uburenganzira bwa muntu bw’abenegihugu ba buri ruhande, hagakurikizwa amategeko n’amabwiriza mpuzamahanga arengera ikiremwa muntu.

Iyo urebye uyu munsi usanga ibi byose nta na kimwe kigeze cyubahirizwa n’uruhande rwa Uganda kuko n’uyu munsi u Rwanda rucyakira abaturage barwo bahohotewe n’inzego z’umutekano z’iki gihugu.

Hari n’amakuru kandi agaragaza ko nta kigeze gihinduka mu mikoranire ya Guverinoma ya Uganda n’imitwe irwanya Leta y’u Rwanda cyane cyane RNC ya Kayumba Nyamwasa.

Kuba nta gitanga icyizere ku mubano mwiza w’ibihumbi byombi byongeye kugaragara ku wa 1 Gicurasi ubwo hasozwaga Inama ya Komite Nyobozi y’Umuryango wa FPR Inkotanyi.

Perezida Kagame yavuze ko hari byinshi atarasobanukirwa ku bibazo Uganda ifite ku Rwanda ariko yizeza ko rwo ruzakora ibishoboka byose ngo rubanire abaturanyi neza.

Ati “Abaturanyi b’Amajyaruguru badufiteho ikibazo, njye nabayeyo, nabanye na bo, nakoranye na bo, umbajije neza ngo nkubwire imizi yacyo ntabwo mbisobanukiwe bihagije. Ariko njye nzasakara inzu yanjye kugira ngo ntanyagirwa, nzashyiraho imiryango idadiye kugira ngo utanyinjirana ugatwara ibyanjye. Wanyinjiranye kandi nzagusohokana, hanyuma tubane, dushyire twizane, uwizanye nabi na we azasubizweyo mu buryo butaruhanyije.”

Ibi bibazo byatumye u Rwanda rusaba abaturage barwo kutajya muri Uganda kubera itotezwa bahurirayo na ryo.

Minisitiri w’Ububanyi n’Amahanga n’Ubutwererane akaba n’Umuvugizi wa Guverinoma y’u Rwanda, Dr Vincent Biruta yavuze ko nta kirahinduka cyane ku bibazo by'u Rwanda na Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .