00:00:00 IGIHE NETWORK KN KINYARWANDA EN ENGLISH FR FRANCAIS

Nta bikorwa duhuriyeho n’ingabo za Uganda muri Congo- Minisitiri Biruta

Yanditswe na Rabbi Malo Umucunguzi
Kuya 31 May 2022 saa 08:09
Yasuwe :

U Rwanda rwatangaje ko nta bikorwa by’ubufatanye mu bya gisirikare rufitanye n’igisirikare cya Uganda byo kujya muri RDC kurwanya umutwe w’iterabwoba wa FDLR.

Ni nyuma y’uko Umugaba w’Ingabo zirwanira ku butaka muri Uganda, Lt.Gen. Muhoozi Kainerugaba, aburiye umutwe w’iterabwoba wa FDLR ko ukwiriye gushyira intwaro hasi mu gihe cya vuba bitaba ibyo Ingabo za Uganda zikawushwanyuza.

Muhoozi yanditse kuri Twitter ko Interahamwe zihawe igihe gito kugira ngo zibe zamanitse amaboko mbere y’uko zigabwaho ibitero.

Ati “Interahamwe zose zigomba kumanika amaboko bwangu kandi zikishyikiriza ingabo zizegereye za UPDF cyangwa se iza RDF. Tuzatsinda iyi operasiyo. Twamaze gufata umwanzuro wo kuyita Opération Rudahigwa’.”

Minisitiri w’Ububanyi n’Amahanga Dr. Vincent Biruta, yahakanye ko hari ubufatanye bwa RDF na UPDF mu kurwanya FDLR.

Ati “Nta bikorwa bizwi uyu munsi by’ubufatanye bwa RDF na UPDF kujya gukora ibikorwa bya gisirikare byo kurwanya FDLR muri DRC. Gusa nagira ngo mbibutse ko UPDF ifiteyo ingabo, zagiyeyo zigiye kurwana na ADF, twebwe nta ngabo dufiteyo."

"N’iyo Operation Rudahigwa, ngira ngo mukwiye kuyibaza uwayivuze, naho twebwe amakuru mfite uyu munsi ni uko nta gikorwa giteganyijwe twaba duhuriyeho n’ingabo za Uganda cyo kujya kugira ibikorwa bya gisirikare dukorera muri DRC dufatanyije.”

Mu kwezi gushize Abakuru b’ibihugu by’Umuryango wa Afurika y’Iburasirazuba, basabye imitwe yitwaje intwaro yose yo muri Repubulika Iharanira Demokarasi ya Congo (RDC) gushyira intwaro hasi, bitabaye ibyo ikagabwaho ibitero n’ingabo z’akarere kose. Ni inama yabereye i Nairobi muri Kenya.

Minisitiri Biruta yibukije ko imitwe yitwaje intwaro itazubahiriza umurongo watanzwe n’abakuru b’ibihugu i Nairobi, akarere kazashyira hamwe ingabo zajya kurwanya bene iyo mitwe yaba iri mu Burasirazuba bwa Repubulika Iharanira Demokarasi ya Congo.

Ati “Uwandika biriya rero niba yaratangiye gutekereza uburyo byazakorwa, cyane cyane ko bafiteyo ingabo, ntabwo mbizi, ariko nta bikorwa kugeza uyu munsi dufatanyije cyangwa se twaba dutegurira hamwe byo kujya kurwanya FDLR muri Congo."

U Rwanda rushinja ingabo za RDC ko zirimo gukorana na FDLR mu mugambi wo kuyifasha kugera hafi y’u Rwanda ngo ijye iruhungabanyiriza umutekano.

FDLR irimo gukorana na FARDC mu mirwano na M23

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .