00:00:00 IGIHE NETWORK KN KINYARWANDA EN ENGLISH FR FRANCAIS

Nsanzubukire na Gen Munyaneza bahoze muri CNRD Ubwiyunge basabiwe gufungwa imyaka 20

Yanditswe na Ndahayo Emmanuel
Kuya 18 Kamena 2021 saa 12:29
Yasuwe :
0 0

Kuri uyu wa Gatanu tariki ya 18 Kamena 2021, Urugereko Rwihariye rw’Urukiko Rukuru Ruburanisha Ibyaha Mpuzamahanga n’Ibyambukiranya Imipaka, rwasubukuye urubanza ruregwamo Paul Rusesabagina na bagenzi be 20, baregwa ibyaha birimo iterabwoba byakorewe ku butaka bw’u Rwanda, bigakorwa n’umutwe wa FLN ushamikiye ku mpuzamashyaka ya MRCD iyobowe na Paul Rusesabagina.

Nk’uko byari byagenze kuri uyu wa Kane, Inteko iburanisha yahaye umwanya ubushinjacyaha kugira ngo bugire icyo buvuga ku bwiregure bwatanzwe n’abaregwa.

Ubushinjacyaha bwahereye kuri Ntibiramira Innocent warezwe ibyaha bine, birimo Kuba mu mutwe w’iterabwoba, kugambana no gushishikariza abandi gukora iterabwoba, gutwikira undi ku bushake inyubako nk’igikorwa cy’iterabwoba no gukoresha binyuranyije n’amategeko ikintu giturika ahantu hakoreshwa na rubanda.

Uyu Ntiramira yari yireguye avuga ko “Ibyaha yakoze byatewe n’ubukene ndetse n’ubujiji”, ariko ubushinjacyaha bwavuze ko ibi atari byo kuko mu buhamya yatanze, dore ko aburana yemera ibyaha byose aregwa, yagaragaje uburyo yari azi Matakamba Jean Berchmas avuga ko yamushoye muri ibi byaha, kandi uyu akaba yari yarinjiye mu mutwe wa FLN ndetse akaba yarasabiwe n’ubushinjacyaha igihano cyo gufungwa imyaka 25.

Ubushinjacyaha bwasabiye Ntiramira Innocent gufungwa imyaka 25, ariko kubera uburyo yemeye ibyaha aregwa, akabyicuza ndetse akabisabira imbabazi, bikiyongeraho ko atari yarigeze ahamwa n’ibyaha mbere, Ubushinjacyaha bwasabye ko igihano cye kigabanywa kikaba imyaka 20.

Hakurikiyeho Byukusenge Jean Claude, wireguye avuga ko yemera ibyaha byose aregwa uko ari bine, ari byo Kuba mu mutwe w’iterabwoba, kugambana no gushishikariza abandi gukora iterabwoba, gutwikira undi ku bushake inyubako nk’igikorwa cy’iterabwoba no gukoresha binyuranyije n’amategeko ikintu giturika ahantu hakoreshwa na rubanda.

Byukusenge yari yavuze ko ubwo bagabaga ibitero mu Rwanda, bari bahawe amabwiriza yo kudatera abasivili, kandi ko ibyaha aregwa yabikoze bitewe “n’ubukene n’ubujiji."

Ubushinjacyaha bwavuze ko atari byo, kuko “Ibitero byagabwe ku baturage n’imitungo yabo”, busobanura ko n’ubwo yemera ibyaha aregwa, “yemera ibikorwa ariko agahunga ubushake bwo gukora ibyaha” kandi nabyo biri mu bigize kwemera icyaha, bityo ko “atemera ibyaha mu buryo bwuzuye”, ari nayo mpamvu yasabiwe gufungwa imyaka 25 itagabanyije.

Ubushinjacyaha bwakomereje kuri Nikuzwe Simeon, ushinjwa akemera icyaha cyo kuba mu mutwe w’iterabwoba.

Bwavuze ko uyu mugabo yagize uruhare mu kwinjiza no guhisha gerenade ebyiri zagombaga guterwa mu bice bitandukanye, akaba yarazihawe na Matakamba ndetse na Bizimana Cassien nabo bari muri iyi dosiye, ndetse bakaba barasabiwe ibihano n’ubushinjacyaha.

Nikuzwe uvuga ko yashowe muri ibi byaha n’umuvandimwe we, Shaban Emmanuel wasabiwe gufungwa imyaka 25. Yemeye icyaha aregwa, ariko ahakana ubushake bwo kugishyira mu bikorwa, ari nayo mpamvu yasabiwe gufungwa imyaka 20.

Ubushinjacyaha kandi bwakurikijeho Ntabanganyimana Joseph uregwa kuba mu mutwe w’iterabwoba, akaba yaraburanye ahakana iki cyaha, avuga ko “Icyo yemera ari uko yagurishije abasirikare ubwato”, nyamara ngo yaranabaherekeje, akaba ari nayo mpamvu yasabiwe igihano cy’igifungo cy’imyaka 20.

Ubushinjacyaha buvuga ko Ntabanganyimana yatangiye yemera icyaha i ariko akaza kugihakana ageze mu rukiko, nyamara ibimenyetso bikaba bimuhama.

Nsanzubukire Félicien wari mu buyobozi bwa CNRD Ubwiyunge yasabiwe gufungwa imyaka 20

Ubushinjacyaha bwongeye guhabwa umwanya busobanura ku bwiregure bwatanzwe na Nsanzubukire Félicien alias Irakiza Fred, uyu akaba yarabaye mu mutwe wa FDLR aza no kuba mu mutwe wa CNRD Ubwiyunge yanagize uruhare mu gushinga.

Uyu mugabo ari gushinjwa ibyaha bibiri, ari byo Icyaha cyo kwinjira mu mutwe wundi w’ingabo zitemewe no kuba mu ishyirahamwe ry’iterabwoba.

Mu bwiregure bwe bwabaye ku itariki 7 Gicurasi, Nsanzubukire yavuze ko adakwiye gukurikiranwa n’ubutabera ashingiye ku Masezerano ya Lusaka yo mu 1999, yavugaga ko abarwanyi b’imitwe y’iterabwoba iri mu Burasirazuba bwa Congo ’bashobora’ kudakurikiranwa n’inkiko zo mu bihugu bakomokamo igihe baramuka bemeye gushyira intwaro hasi.

Uyu mugabo kandi yavuze ko ’abantu bareshya imbere y’amategeko’ bityo ko adakwiye kuburanishwa ku byaha yakoreye mu mitwe y’iterabwoba ahubwo akajyanwa mu ngando nk’uko bikorerwa abandi barwanyi bahoze muri FDLR iyo batahutse.

Ubushinjacyaha bwavuze ko ubu bwiregure nta shingiro bufite kuko amasezerano ya Lusaka atigeze avuga ko abakoze ibindi byaha batazakurikiranwa. Bwasobanuye ko ayo masezerano yashyizweho mu rwego rwo gushishikariza abarwanyi kuva mu mitwe y’iterabwoba, buvuga ko “Ayo masezerano atigeze atanga imbabazi rusange” ndetse ko kuko hakoreshejwe ijambo rivuga ko “Ibihugu bishobora kudakurikirana abo barwanyi, ariko bitari bibitegetswe.”

Bwavuze kandi kuba Nsanzubukire ataratashye ku bushake, ntanashishikarize abandi barwanyi gutaha, dore ko yari n’umuyobozi muri CNRD Ubwiyunge, bigaragaza ko nta mugambi wo kubahiriza ibikubiye muri ariya masezerano yari afite bityo asabirwa imyaka 20 y’igifungo.

Ubushinjacyaha bwakomereje kuri Munyaneza Anastase alias Job Kuramba ushinjwa kuba mu mutwe w’ingabo zitemewe ndetse no kuba mu mutwe w’iterabwoba.

Bwavuze ko uyu mugabo atemera ibyaha aregwa mu buryo budashidikanywaho, bityo ko asabirwa igihano cy’igifungo cy’imyaka 20 itagabanyijwe.

Munyaneza yahoze muri FDLR FOCA aho yari afite ipeti rya Jenerali. Nyuma y’uko uyu mutwe ushyizwe mu y’iterabwoba hagiye havuka indi irimo na CNRD Ubwiyunge ari nayo yabarizwagamo mbere yo gufatwa.

Iyamuremye Emmanuel wahoze ari Colonel muri FLN yasabiwe gufungwa imyaka 20

Iyamuremye Emmanuel wahoze ari Colonel mu myaka 20, yasabiwe gufungwa imyaka 20, aho ashinjwa kuba Kwinjira mu mutwe w’ingabo utemewe no kuba mu mutwe w’iterabwoba.

Uyu mugabo yinjiye muri FDLR FOCA mu 2000, ayimaramo imyaka 16 mbere yo kuyivamo yerekeza muri FLN yanabayemo umuyobozi, aho yari afite ipeti rya Colonel muri izo ngabo.

Uyu mugabo niwe wasabwe guhagararira ingabo zari buze gutera mu Rwanda, ariko arabihakana abwira abayobozi be ko "Atumva impamvu yabyo", birangira atayoboye igitero ahubwo bikorwa n’uwari umwungirije.

Nyuma yo kwanga kuyobora icyo gitero uyu mugabo yavuze ko yatangiye kugirana umubano mubi n’abayobozi be, atangira gushaka uburyo yahunga ndetse aza no gusaba uruhushya rwo kujya kuvuza umuryango we uri mu Burundi, ari naho yateganyaga gucikira.

Uyu mugambi ariko waje gupfuba kuko yafatiwe mu nzira akazanwa mu Rwanda, uretse ko yabwiye urukiko ko kuba atarayoboye igitero cyagabwe mu Rwanda bigaragaza ko atari afite ubushake bwo gutera u Rwanda, n’ubwo yemera ko yari mu mutwe wagabye igitero ku Rwanda.

Ubushinjacyaha bwavuze ko ibi ari ukwivuguruza kuko uyu mugabo yari yemeye ibyaha aregwa, bityo bumusabira imyaka 20 y’igifungo kuko atemeye ibyaha aregwa mu buryo budashidikanywaho.

Ubushinjacyaha bwakurikijeho Niyirora Marcel alias BAMA Nicholas, winjiye bwa mbere mitwe y’iterabwoba mu 2003 ubwo yinjiraga muri FDLR FOCA, akaza kwinjira no muri FLN hagati ya Mata na Gicurasi 2018.

Yemeye ibyaha bibiri aregwa ari byo kuba mu mutwe w’ingabo utemewe ndetse no kuba mu mutwe w’Iterabwoba, arabyicuza ndetse anabisabira imbabazi.

Uyu mugabo yiregura yari yasabye ko hazasuzumwa uburyo bwo kuba yajyanwa mu kigo gisubiza mu buzima busanzwe abavuye mu mitwe y’iterabwoba, ariko ubushinjacyaha bwavuze ko bwasanze adakwiye kujyanwa muri icyo kigo.

Ubushinjacyaha bwasabiye Niyirora igihano cyo gufungwa imyaka 20 ariko kikagabanywa kikagezwa ku myaka 15, kuko yemeye ibyaha aregwa mu buryo budashidikanywaho, ndetse akaba ari n’ubwa mbere yari akurikiranywe n’inkiko.

Nshimiyimana uvuga ko yinjiye muri FDLR ku gahato yasabiwe imyaka 20

Ubushinjacyaha bwakomereje kuri dosiye ya Nshimiyimana Emmanuel wavuze ko yari muri iyo mitwe y’iterabwoba, ariko akaba yarayinjijwemo ku gahato kuko yari umwana.

Ubushinjacyaha bwavuze ko ibisobanuro bya Nshimiyimana atari byo, kuko uyu musore winjiye muri FDLR mu 2012, yavuze ko yahawe uburenganzira bwo kujya kwiga ariko mu biruhuko akajya ajya gukora muri FDLR, ibyerekanaga ko nta gahato yari yarashyizweho.

Ubushinjacyaha kandi bwavuze ko uyu musore atigeze agaragaza uburyo yinjijwe mu mitwe y’iterabwoba ku gahato, kandi ko atigeze yinjizwa mu mitwe y’iterabwoba avanywe mu ishuri, nk’uko yabivuze.

Ubushinjacyaha bwasobanuye ko uyu musore atari umwana ubwo yinjiraga muri FDLR FOCA, kuko yari afite imyaka 19, kandi kuba nyuma y’uko uyu mutwe usenyutse atarawuvuyemo, ahubwo akajyana n’abandi gushinga FLN, byerekana ko yari azi ibyo arimo gukora.

Umucamanza yabajije ubushinjacyaha niba agahato buvuga karabaye mbere cyangwa nyuma yo kwinjira muri uwo mutwe, busubiza ko ako gahato kabayeho mbere yo kwinjira muri iyi mitwe, nk’uko uregwa yabyivugiye, ariko bwongeraho ko kuba ataravuye muri uwo mutwe nyuma yo kuwinjiramo, byerekana ko nawe yari abifitemo ubushake.

Ubushinjacyaha bwasabiye uyu musore w’imyaka 20 gufungwa imyaka 20, akaba ashinjwa kuba mu mutwe w’iterabwoba no kuba mu mutwe w’ingabo utemewe.

Ubushinjacyaha kandi bwavuze kuri Kwitonda André ari gushinjwa kuba mu mutwe w’ingabo utemewe ndetse no kuba mu mutwe w’iterabwoba.

Uyu mugabo yahakanye ibyaha byose aregwa, avuga ko atemera ko yinjijwe muri ngabo bwa mbere na FARDC mu 1998 atabishaka, ariko ayivamo muri 2003 ubwo Abanyarwanda bari muri izo ngabo birukanwaga abona kujya mu ngabo za FDLR FOCA.

Mu 2016 yaje kwinjira muri FLN ndetse aza gukoramo amasomo ya gisirikare mu 2017-2018, ayarangiza afite ipeti rya Sous-Lieutenant, ahabwa inshingano zo kuyobora umutwe w’ingabo 36, mbere y’uko atoroka agafatwa nyuma y’umwaka umwe ari mu Mujyi wa Goma “Ari kwitegura gutaha.”

Ubushinjacyaha bwavuze ko ibyo kujyanwa mu mutwe w’ingabo atabishaka atari byo kuko yayigumyemo nyuma yo kuyinjizwamo, ndetse anazamurwa mu ntera, bityo ko bitumvikana uburyo yari mu bintu adashaka.

Ubushinjacyaha kandi bwavuze ko adakwiye kujyanwa kugororwa mu kigo cyakira abahoze mu nyeshyamba nk’uko yari yabisabye, ahubwo ko akwiye guhabwa igihano cy’imyaka 20 y’igifungo kuko yemera ibikorwa bigize icyaha, ariko agahakana kugira ubushake bwo gukora icyaha.

Hakizimana Théogène wahoze ari Kaporali mu ngabo za Ex-Far yahakanye ibyaha aregwa

Ubushinjacyaha bwakomeje buvuga kuri Hakizimana Théogène uregwa ibyaha bibiri ari byo kuba mu mutwe w’ingabo utemewe ndetse no kuba mu mutwe w’iterabwoba.

Uyu mugabo avuga nyuma yo gusenywa kw’inkambi zari muri Congo mu 1996, yahungiye muri Centrafrique ariko naho bakaza kuhirukanwa agasubira muri Congo, ari naho yahuriye na FDLR FOCA akayinjiramo.

Uyu ngo yaje kwinjira muri FLN ndetse anahabwa amasomo ya gisirikare yarangije ari Sous-Lietenant, akaza gufatwa ari mu butumwa yari agiyemo mu Burundi, akajyanwa Uvira na Goma mbere yo kuzanwa mu Rwanda.

Uyu mugabo yasobanuye ko yinjiye mu nyeshyamba ku bw’amaburakindi kuko nta handi yari afite yerekeza, kandi akaba atari afite uburyo bwo gucika kuko afite ubumuga ku kaboko kubera isasu yarasiwe mu Rwanda.

Ubushinjacyaha bwavuze ko atasobanuye uburyo yinjijwe mu ngabo za FDLR FOCA ku gahato akagumamo kugeza aninjiye mu mutwe wa FLN, buvuga ko yagiye muri iyo mitwe ku bushake kuko yanahoze mu gisirikare.

Ibi byatumye ubushinjacyaha bumusabira igihano cy’igifungo cy’imyaka 20, kuko atemeye ibyaha ashinjwa mu buryo budashidikanywaho.

Ndagijimana Jean Chrétien ibyaha bibiri ari byo kuba mu mutwe w’ingabo utemewe ndetse no kuba mu mutwe w’iterabwoba.

Mu bwiregure bwe, uyu mugabo yavuze ko yinjiye mu mitwe y’iterabwoba kubera igitutu cy’umubyeyi we, bityo akaba asanga atari akwiye gukurikiranwa kuri ibyo byaha kuko atayinjiyemo ku bushake bwe.

Ubushinjacyaha bwavuze ko uyu mugabo atagaragaje uburyo yakorewe agahato, ndetse akaba ataratanze n’ibimenyetso byatuma Urukiko rumukuraho icyo cyaha.

Ubushinjacyaha bwavuze ko mu bwiregure bwa Ndagijimana, we ubwe yavuze ko ubwo yari mu mashuri ya gisirikare, yari afite uburyo bwo kuva muri iyo mitwe y’iterabwoba ariko ntabikore "Kuko atifuzaga guta ababyeyi be."

Ubushinjacyaha bwavuze ko kuba yarabaye muri iyo mitwe y’iterabwoba abizi, ariko agakora amahitamo yo kuyigumamo, byerekana ko akwiye kubiryozwa.

Ubushinjacyaha kandi bwavuze ko Ndagijimana yari afite uburyo bwo kuva muri iyo mitwe kuko yajyaga yoherezwa mu Mujyi wa Goma kujya kuzana amafaranga yabaga yoherejwe na Paul Rusesabagina, ariko akemera gusubira muri ya mitwe y’iterabwoba.

Urukiko rwabajije ubushinjacyaha kucyo buvuga ku byo Ndagijimana yireguye, aho yavuze ko yanze kuva mu mitwe y’iterabwoba kuko atari azi u Rwanda, bityo akaba atari azi iyo ari bujye.

Ubushinjacyaha bwasubije ko nta tegeko ry’uko yagombaga kuza mu Rwanda, kuko yari buyivemo akajya ahandi ashaka cyangwa akanaguma muri Congo ariko atari muri iyo mitwe.

Ubushinjacyaha bwamusabiye igihano cyo gufungwa mu gihe cy’imyaka 20, kuko yaburanye atemera ibyaha mu buryo budashidikanywaho.

Mukandutiye Angelina; umugore rukumbi uri muri iyi dosiye, yasabiye gufungwa imyaka 20

Ubushinjacyaha bwavuze ko Mukandutiye Angelina ushinjwa icyaha cyo kuba mu mutwe w’iterabwoba, ndetse ko bitewe n’uburyo atigeze yemera icyaha aregwa mu buryo budashidikanywaho, bityo akwiye guhabwa igihano cyuzuye.

Mukandutiye aregwa kuba yarashishikarije abakobwa kwinjira muri FLN, ariko akaba yaravuze ko atigeze atari we wabahitagamo.

Umuntu wa nyuma ubushinjacyaha bwasabiye ibihano ni Nsabimana Jean Damascène alias Motard uri kuburana yemera ibyaha bitatu aregwa, akanabisabira imbabazi.

Uyu mugabo yavuze ko yafatiranywe na Matakamba kubera ubukene yari afite, akamusaba kujya bifashisha moto ye, kuko yari yaremewe kuzishyurirwa umwenda yari afite muri koperative ndetse akanagurirwa indi moto.

Yavuze ko amaze kumenya ko Matakamba yafashwe, yatorokeye muri Congo, ariko nyuma aza kwigira inama agaruka mu Rwanda, ahisha grenade n’imbunda yari afite hafi y’urugo rwe.

Nsabimana ashinjwa ibyaha bitatu, ari byo ubwinjiracyaha bw’ubwicanyi nk’igikorwa cy’iterabwoba, kuba mu mutwe w’iterabwoba, ndetse gukoresha binyuranyije n’amategeko ikintu giturika ahantu hakoreshwa na rubanda.

Ubushinjacyaha bwamusabiye igihano cy’imyaka 25 ariko buvuga ko akwiye kuzahabwa imyaka 20 kuko yemeye ibyaha aregwa ndetse akaba atarigeze akurikiranwa n’urukiko mu myaka yashize.

Iburanisha rikurikira rizaba ku itariki ya 23 Kamena 2021, abaregwa bakazahabwa umwanya wo kuvuga ku bihano basabiwe.

Ubushinjacyaha bwasabiye Ntiramira Innocent gufungwa imyaka 25, ariko kubera uburyo yemeye ibyaha aregwa, akabyicuza ndetse akabisabira imbabazi, yasabiwe kugabanyirizwa akazahabwa imyaka 20
Byukusenge Jean Claude yasabiwe gufungwa imyaka 20
Nsanzubukire Félicien wabaye muri FDLR, akaba no mu mu buyobozi bwa CNRD Ubwiyunge yasabiwe gufungwa imyaka 20
Ntabanganyimana Joseph, yasabiwe gufungwa imyaka 20

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .