Niwicara ukibonamo umuhutu cyangwa umututsi, ntuzaba uri muri FPR- Guverineri Gatabazi

Yanditswe na N.Kubwimana Janvière
Kuya 19 Ukwakira 2020 saa 10:13
Yasuwe :
0 0

Guverineri w’Intara y’Amajyaruguru, Gatabazi Jean Marie Vianney yasabye urubyiruko rwarahiriye kwinjira muri uyu muryango kutibona mu ndorerwamo y’amoko ahubwo abasaba kubaka ubunyarwanda no gutera ikirenge mu cy’ababanjirije muri uyu muryango.

Ibi Gatabazi yabigarutseho kuri uyu wa 18 Ukwakira 2020,ubwo habaga umuhango wo kurahiza abanyamuryango ba FPR Inkotanyi bashya bagera kuri 35 wabereye mu Karere ka Musanze.

Ni umuhango wabanjirijwe no gusobanurira aba banyamuryango bashya biganjemo urubyiruko amateka yaranze igihugu, bagaragarizwa uruhare rwabo mu gukumira icyatuma igihugu gisubira mu mateka mabi yakiranze.

Gatabazi Jean Marie Vianney yasabye uru rubyiruko guhangana n’ingengabitekerezo ya Jenoside mu buryo bwose igikorwamo, ahubwo bakimika ubunyarwanda bushingiye ku bumwe n’ubwiyunge nk’inzira y’iterambere ry’igihugu.

Yagize ati "FPR icyo yahagurukiye ni kimwe ni ukubaka ubumwe bw’abanyarwanda, ubumwe burubaka, buteza imbere igihugu, buracyagura, bugiha imbaraga n’ijambo kikava mu icuraburindi. Niwicara mu rugo ukibonamo umuhutu cyangwa umututsi, ntuzaba uri mu muryango wa FPR, ingengabitekerezo ya Jenoside niyo yatumye ibaho, uyu munsi turacyahanganye nayo, uyu munsi tugomba guhangana nayo aho iri hose, ndabifuriza kwimika ubunyarwanda, ubuvandimwe, mugaharanira ko bizasigara mu mateka yanyu."

Bamwe muri uru rubyiruko rwarahiriye kwinjira mu muryango wa FPR Inkotanyi bavuga ko bafite intego yo kubaka igihugu kizira amacakubiri, baharanira ko ubumwe bw’abanyarwanda buhinduka umusingi w’iterambere bifuza.

Usanase Benitha yagize ati " Kwinjira mu muryango wa FPR Inkotanyi kuri njye bifite icyo bivuze, haracyari imiryango icyubakira ku mateka mabi yabaye mu Rwanda bakabiba ingengabitekerezo ya Jenoside mu bana bakayikurana, uruhare rwanjye ni ukwegera iyi miryango nkabigisha iby’ubumwe n’ubwiyunjye kuko niyo nzira yonyine yatugeza ku iterambere twifuza."

Nzabonimpa Zebron nawe yavuze ko yiteguye kurangwa n’ishyaka ryaranze abagize uruhare mu kubohora Igihugu, yirinda icyasubiza Igihugu mu mateka mabi cyanyuzemo.

Yagize ati "Nagiye nkurikirana amateka yaranze igihugu cyacu, nsanga urubyiruko nkatwe aribo bagize uruhare mu kubohora igihugu kikaba kigeze aha, umusanzu wanjye si ukwegura imbunda ngo ndwane, ahubwo ni uguharanira ko Igihugu cyacu gitera imbere kitarangwamo ingengabitekerezo uko yaba imeze kose."

Mu Karere ka Musanze habarurwa abanyamuryango ba FPR Inkotanyi bagera ku bihumbi 170, muri bo urubyiruko bagera ku bihumbi 68, biyongereyeho abanyamuryango bashya 35 barahiriye kuwinjiramo, ndetse bakaba bakomeje kwandika abifuza kuwinjiramo.

Harahiye abanyamuryango bashya 35 ba FPR Inkotanyi
Guverineri w'Intara y'Amajyaruguru, Gabazi Jean Marie Vianney (uri hagati) yasabye urubyiruko kutibona mu moko
Abarahijwe biyemeje kwimakaza ubunyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .