Ni uwuhe musaruro wa Ejo Heza igiye kumara imyaka ibiri itangijwe?

Yanditswe na Ndahayo Emmanuel
Kuya 15 Nzeri 2020 saa 03:45
Yasuwe :
0 0

Ku wa 14 Ukuboza 2018, ni bwo Leta y’u Rwanda, ibinyujije mu kigo cy’igihugu cy’ubwiteganyirize, RSSB, yatangije gahunda y’ubwizigamire bw’igihe kirekire, yitwa Ejo Heza.

Uyu mushinga watekerejwe kubera ko abanyarwanda bagera muri 92% bakora mu mirimo ya nyakabyizi (informal sector), mu gihe 7% gusa ari bo bakora bafite amasezerano y’akazi, banabasha kubonerwa ibindi byangombwa birimo uburyo bwo kuzigamiraa izabukuru.

Ibi ni ikibazo gikomeye kuko n’ubwo igihugu kigizwe ahanini n’urubyiruko (impuzandengo y’imyaka y’abanyarwanda ni imyaka 23), ibintu bizahinduka nko mu myaka 30 iri imbere, ubwo abantu bazaba batangiye gusaza no kureka akazi, nyamara nta bwizigame bafite bwari kuzabagoboka muri ibyo bihe.

Aha rero ni ho leta yahereye ishyiraho Ikigega Ejo Heza, gifite inshingano yo gufasha abantu babishaka kuzigama by’igihe kigufi na kirekire, bityo mu musaziro yabo, bakazaba babayeho neza nk’abantu bakoze.

Byasabye imbaraga nyinshi kugira ngo abantu batangire kwizigamira muri Ejo Heza, kuko yari gahunda nshyashya kandi kubikora bikaba ubushake bwa muntu.

Mu gihembwe cya mbere cya 2019, iki kigega cyakiriye gusa miliyoni zirengaho gato 62 Frw, binyuze mu bukangurambaga bukomeye, aya mafaranga yaje kwiyongera bigaragara, agera kuri miliyoni zirenga 950 Frw mu gihembwe cya kabiri cya 2019.

Mu gihembwe cya mbere cy’uyu mwaka, ubu bwizigame bwakomeje gutumbagira, bugera kuri miliyari 3 Frw, naho kuri ubu hamaze gushyirwamo miliyari 1.5 Frw mu gihembwe cya cya mbere cy’uyu mwaka w’ingengo y’imari.

Muri rusange, Dan Rwiyamirira, impuguke mu isuzuma ndetse n’igenamigambi mu kigo cy’igihugu cy’ubwishishingizi, RSSB, yavuze ikigega Ejo Heza kimaze gushyirwamo miliyari 6 Frw, ndetse abanyarwanda barenga 700 000 bakaba bamaze kwiyandikisha muri iki kigega.

Muri bo, 500 000 batanze imisanzu ndetse harimo benshi muri bo bayitanga mu buryo buhoraho.

Rwiyamirira yavuze ko aho ikigega kigeze hashimishije, kandi ko byerekana uburyo abanyarwanda bari bakeneye ikigega nk’iki kibaha uburyo bwo kuzigamira amasaziro yabo.

Ati “iki kigega cyatumye abantu bumva akamaro ko kwizigamira, yaba iby’igihe kirekire cyangwa kigufi. Ariko na none, iki kigega gifasha mu kurushaho gufasha abantu kugira umuco wo kwizigamira”.

Rwiyamirira yongeyeho ko iki kigega cyagize uruhare mu gufasha abanyarwanda gukoresha serivise z’imari, aho imibare ya FinScope 2020 yagaragaje ko abarenga 93% bakoresha serivise z’imari, bavuye kuri 89% muri 2016. Intego ni uko muri 2024, abanyarwanda 100% bagomba kuzaba bakoresha serivise z’imari.

Kugeza ubu, mu rwego rwo kurushaho guteza imbere umuco wo kwizigamira ndetse no kurushaho kumenyekanisha Ejo Heza, Rwiyamirira avuga ko hari gahunda yo gukomeza gukora ubukangurambaga mu rwego rwo kurushaho kukimenyaisha.

Yongeyeho ko “turateganya gukorana n’ibigo by’abikorera kugira ngo tugere ku bakozi babo. Uko gukorana n’ibigo by’abikorera, amakoperative ndetse n’ibigo bito byo kwizigamira, bizatuma tugera ku byo twiyemeje”.

“Turashaka kandi gukorana n’inzego za leta kugira ngo zidufashe gukora ubukangurambaga bw’iki kigega kirusheho kumenywa na benshi”.

Ejo Heza iha buri munyarwanda wese amahirwe yo kwizigamira mu buryo bumworoheye hatitawe ku byo akora. Umubyeyi kandi ashobora kuzigamira umwana uri munsi y’imyaka 16, mu gihe iki kigega kigena inyungu ku bwizigame bw’abanyamuryango.

Usibye gufasha abantu kugira ubwizigame, kwizigamira by’igihe kirekire ni ishingiro ry’ubukungu bw’ibihugu byinshi kuko bituma haboneka amafaranga menshi y’ubwizigame mu gihugu, akaba yagurizwa abarimo banki na leta, aho kujya kugura amafaranga y’amanyamahanga ahenze.

Ibi kandi binafasha mu gukora ishoramari ry’igihe kirekire nko kubaka amazu, ibitanga akazi kandi bikanakemura ikibazo runaka mu gihugu.

Byongeye kandi, ba bantu bizigamiye iyo bashaje, bagatangira kwibasirwa n’indwara za hato na hato, ntibaba umutwaro kuri leta ibavuza kuko baba bifitiye ubwizigame bwabo.

Abakora nka nyakabyizi, barimo abamotari, bashobora kwizigamira babinyujije mu kigega Ejo Heza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .