00:00:00 IGIHE NETWORK KN KINYARWANDA EN ENGLISH FR FRANCAIS

CHOGM: Ni gute urubyiruko rwakwigobotora urusobe rw’ibibazo bikibangamiye iterambere ryarwo?

Yanditswe na Ntabareshya Jean de Dieu
Kuya 20 June 2022 saa 09:18
Yasuwe :

Ihuriro ry’Inama y’Urubyiruko rwo mu bihugu bigize umuryango w’ibihugu bikoresha Icyongereza, Commonwealth, yitabiriwe n’abasaga 350 i Kigali, yakomeje harebwa ibigikenewe kugira ngo urubyiruko rugire uruhare mu iterambere rirambye.

Mu biganiro byatanzwe muri iyi nama hagarutswe ku ngingo zitandukanye zigamije kwereka urubyiruko amahirwe ahari mu gutanga umusanzu warwo mu kubaka iterambere ibihugu bigize Umuryango wa Commonwealth byifuza.

Umuyobozi w’Ishami ry’Umuryango w’Abibumbye ryita ku Iterambere mu Rwanda, UNDP, Maxwell Gomera, yifashishije inkuru ya mama we ubwo yari akiri umukobwa, avuga ko yatangije umushinga uciriritse ariko abura ikigo cy’imari kimwizera ku buryo yari guhabwa inguzanyo.

Yagaragaje ko mu mishinga iri kuzamuka by’umwihariko ku rubyiruko kimwe mu bibazo bikomeye ruhura na byo ari icyo kubura serivisi z’imari.

Yakomeje agira ati “Kimwe mu bibazo ishoramari rito muri Afurika cyangwa imishinga ikizamuka iri guhura na cyo ni ukubona serivisi z’imari. Kubona amafaranga akenewe kandi mu gihe nyacyo. Bari gusubizwa inyuma ku kubona amafaranga, nta nubwo amakuru bafite ku isoko ahagije kandi nyamara ntibari kubona n’ubujyanama.”

Maxwell Gomera yagaragaje ko urubyiruko rugihura n'imbogamizi zo kugera kuri serivisi z'imari

Kugirirwa icyizere no guhabwa inshingano

Umuyobozi w’Inama y’Urubyiruko mu bihugu byo muri Carraïbes, Kandelle Vincent, ku Cyumweru tariki ya 19 Kamena 2022, yagaragaje ko kimwe mu bibazo bikeneye gukemurwa mu buryo bwihuse ari uguha urubyiruko umwanya mu nzego zitandukanye z’ubuyobozi.

Umuyobozi Uhagarariye Urubyiruko mu Muryango wa Afurika Yunze Ubumwe, Chido Mpemba, yagaragaje bigendanye n’icyerekezo cya Afurika cya 2063, urubyiruko ari rwo nkingi y’iterambere ry’uyu mugabane.

Ati “Nitunagendera ku mibare, turasanga urubyiruko ari rwo rugize umubare munini. None ni gute tuza gufata wa mubare munini w’abaturage tukawubyazamo ubushobozi bwifuzwa? Mfite inzozi ko ahazaza hagiye guha umwanya urubyiruko, urubyiruko dufite uyu munsi dukwiye kuruha amahirwe.”

Ibibazo bikwiye kuvamo igisubizo

Umwe mu rubyiruko wiyemeje gufasha abandi wanashinze Ikigo gifasha abantu bafite ikibazo cy’Indwara yo kwibagirwa “Dominica Dementia Foundation, Rianna Patterson, yavuze ko igitekerezo cyavuye ku rupfu rwa sekuru wishwe n’iyo ndwara ubwo uyu mukobwa yari afite imyaka 16.

Nyuma yo kubona uyu mubyeyi arwaye gutyo yifashishe Google agamije kumenya uko yafasha umuntu uyirwaye ari naho haturutse umuryango ugamije gufasha abantu bafite ibibazo by’indwara ya Dementia.

Darrion M Narine yafatanyije na Martina Abera kuyobora iki gikorwa

Yavuze ko impamvu yo gushinga iki kigo ari uko abantu bafatwa n’iyo ndwara mu gihe gito cyane.

Yasabye urubyiruko gukora imishinga ariko igamije kuzanira impinduka sosiyete muri rusange aho kureba gusa ku iterambere ry’urubyiruko nk’uko bamwe bakunze kubikora.

Umuyobozi wa Karisimbi Technology Solutions, igamije gufasha muri gahunda yo guca burundu ikoreshwa ry’impapuro mu buvuzi, Igitego Angelo, na we yayishinze agamije gufasha abaturage kugerwaho na serivisi mu buryo bwihuse.

Ikoranabuhanga

Ubusanzwe ikoranabuhanga ni imwe mu ntwaro ibihugu byose bicungiyeho iterambere ry’ahazaza ari na yo mpamvu kuri ubu urubyiruko rukangurirwa gukoresha ikoranabuhanga mu guhanga udushya tugamije gukemura ibibazo byugarije Isi.

Ku Cyumweru, tariki ya 19 Kamena 2022, ubwo Minisitiri w’Urubyiruko n’Umuco mu Rwanda, Rosemary Mbabazi, yatangizaga ku mugaragaro iyi Nama y’Ihuriro ry’Urubyiruko rwo muri Commonwealth, yarusabye kugira uruhare mu guhanga udushya mu ikoranabuhanga no guharanira impinduka mu iterambere ry’ibihugu byarwo.

Umuyobozi w’Ikigo gishinzwe iby’ikoranabuhanga cyanageze ku isoko ry’u Rwanda, Hepta Analytics, Sylvia Makaria, yavuze ko urubyiruko rukwiye kugira uruhare mu gukoresha ikoranabuhanga mu rwego rwo gushaka igisubizo cyazana impinduka nziza mu iterambere ry’igihugu.

Yagaragaje ko nubwo ikoranabuhanga rikomeje gutezwa imbere muri Afurika ariko hakiri icyuho ku ikoreshwa ry’amakuru mu iterambere ry’uyu mugabane.

Muri iyi nama kandi hatangijwe ikoranabuhanga rishobora kuzifashishwa mu guhangana na kanseri zitandukanye by’umwihariko izikunze kwibasira abagore.

Guhabwa ubumenyi bukwiye

Ikindi gikwiye guhabwa umwanya ku rubyiruko ni ukuruha ubumenyi n’uburezi bukwiye kandi bushobora kurufasha guhanga udushya dukenewe mu iterambere ry’igihugu.

Umuyobozi w’Urubyiruko rwo mu Ihuriro ry’Umuryango uharanira Uburenganzira n’Ukwibohora kwa Afurika “Pan-African Movement Youth Union, Sharonice Busch, yagaragaje ko urubyiruko rukeneye guhabwa ubumenyi bukenewe kugira ngo rubashe kugira iterambere rugeraho.

Sharonice Busch yagaragaje ko iyo witegereje ibihugu byinshi byo muri Afurika usanga uburezi bufite ireme bushingiye mu bigo by’amashuri byigenga kandi nyamara umubare ukunze kwiga mu bigo bya Leta.

Umuyobozi w’Urubyiruko rwo mu Ihuriro ry’Umuryango uharanira Uburenganzira n’ukwibohora kwa Afurika “Pan-African Movement Youth Union, Sharonice Busch, yavuze ko urubyiruko rukwiye guhabwa uburezi bufite ireme

Yavuze ko mu rwego rwo gufasha urubyiruko mu guhangana n’iterambere no guhanga udushya mu iterambere rukwiye guherekezwa binyuze mu guhabwa uburezi bufite ireme ku buryo rugira ubushobozi bukwiye.

Yasabye urubyiruko bagenzi be kugira umuhate no gutinyuka mu rugamba rwao kwishakamo ibisubizo ku bibazo babona mu bihugu byabo muri rusange.

Gufata ibyemezo

Kimwe mu bintu bikomeye urubyiruko rusabwa kugira mu rugamba rwo kwiteza imbere ni ukumenya gufata ibyemezo bikomeye ku hazaza harwo aho guhunga inshingano nk’uko Minisitiri Mbabazi yabigarutseho.

Ati “Ndagira ngo mbasabe dutangire gutekereza ku cyo bivuze mu gutegura ahazaza ku rubyiruko. Ntibikwiye kuba mu magambo ahubwo bikwiye kuba mu bikorwa. Ese ubuzima bwacu buri mu maboko yacu cyangwa mu biganza by’undi muntu? Ese twaba turi gukora ibikwiriye cyangwa turi kwihunza inshingano?”

“Ntimukwiye gufata ibintu mu buryo mwumva ko ari ibisanzwe. Ni byo abantu bashobora gukosa ariko ayo makosa yakozwe barayemera kandi bakayigiraho kugira ngo bagire indi ntambwe batera. Iyo utagize icyo uharanira nta n’icyo ugereho."

Umuyobozi w’Ihuriro ry’Urubyiruko rwo mu bihugu bigize Commonwealth, Kim Allen, yavuze ko nubwo ibibazo ari byinshi ku rubyiruko ugereranyije n’ibihe byatambutse bikwiye kuvamo amahirwe yo gushaka no guharanira impinduka nziza.

Darrion M Narine yagaragaje ko urubyiruko rukwiye kurangwa no gufata icyemezo

Ati “Nubwo bimeze bityo ariko izo mbogamizi n’ibibazo byugarije Isi bizana n’amahirwe yo guharanira impinduka nziza. Rubyiruko bagenzi banjye n’abafatanyabikorwa, hakenewe ubumenyi n’ubushobozi bwo kugera ku mpinduka dukeneye. Ubu ni igihe cyo gukora. Tugomba kongera imbaraga binyuze mu gufata ingamba zigamije impinduka nziza.”

Umuyobozi w’Inama y’Igihugu y’Urubyiruko mu Rwanda, Iradukunda Alodie, yagaragaje ko urubyiruko rwagize uruhare rukomeye mu guhangana n’ibibazo bikomeye ibihugu bigize umuryango wa Commonwealth byahuye na byo birimo n’icyorezo cya Covid-19.

Yavuze ko urubyiruko rudakwiye gutegereza ko ruhamagarirwa gukora ahubwo ko na rwo rwamaze gufata ibyemezo n’inshingano zo guharanira kugera ku iterambere.

Inama y’urubyiruko rwitabiriye CHOGM biteganyijwe ko izafatirwamo imyanzuro ndetse n’ibibazo bikirubangamiye bikazagezwa mu nama izahuza abakuru b’ibihugu na za guverinama mu rwego rwo gushaka umuti urambye kuri byo .

Abayobozi mu nzego z'itandukanye bakurikiranye ibiganiro byatanzwe
Iri huriro ry'urubyiruko ruhuza ibihugu bitandukanye, aha ni abakomoka muri Pakistan bishimanye n'abahagarariye u Buhinde
Minisitiri wa Siporo, Munyangaju Aurore Mimosa, na we yitabiriye iyi nama
Minisitiri w'Urubyiruko n'Umuco, Rosemary Mbabazi, yakurikiranye iyi nama y'urubyiruko
Umuyobozi Mukuru wa Ampersand, Josh Whale, yagaragaje ko urubyiruko rukwiye kugira uruhare mu kubungabunga ibidukikije
Umuyobozi w’Ikigo gishinzwe iby’Ikoranabuhanga cyanageze ku Isoko ry’u Rwanda, Hepta Analytics, Sylvia Makaria, yavuze ko urubyiruko rukwiye kurushaho kuba inshuti n'ikoranabuhanga
Uru rubyiruko rwasabwe guharanira kwiyungura ubumenyi mu iterambere
Urubyiruko rukomeje kugaragarizwa ibisabwa mu kuzamura iterambere
Urubyiruko rwagaragarijwe ko hakenewe uruhare rwarwo mu gukemura ibibazo birwugarije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .