00:00:00 IGIHE NETWORK KN KINYARWANDA EN ENGLISH FR FRANCAIS

Habonetse ikoranabuhanga rishobora kunganira mu kibazo cy’ubuke bw’abaganga mu Rwanda

Yanditswe na Ndahayo Emmanuel
Kuya 27 June 2022 saa 11:04
Yasuwe :

Kenshi iyo ugiye kwivuza ku kigo nderabuzima kikwegereye, hari ubwo usuzumwa bikaza kugaragara ko indwara urwaye ikomeye kurusha ubushobozi bwacyo, bikaba ngombwa ko woherezwa ku bitaro byisumbuye kugira ngo witabweho.

Aha naho ntabwo ari mu nzira iharuye kuko hari ubwo uhagera ukabwirwa ko kugira ngo ubonane na muganga, ugomba gutegereza igihe runaka.

Muri icyo gihe, ntabwo indwara ihagarara ariko kuko igihugu gifite inzobere nke mu buvuzi, bibaho ko umuntu ategereza, byagenda neza akazavurwa agakira, yagira ibyago ubwo bukerererwe bukazamutera ibibazo runaka.

Mu 2019, mu Rwanda habarurwaga ko nibura umuganga umwe avura abarwayi 8294, bavuye ku barwayi ibihumbi 16 mu 2010. Ibi bituma aba baganga bakora amasaha y’ikirenga bikaba btayuma badakora akazi kabo neza kuko baba bafite abarwayi benshi.

Kugira ngo u Rwanda rugere ku rwego rw’uko umuganga umwe avura abarwayi 1000, nk’uko bisabwa n’Ishami ry’Umuryango w’Abibumbye ryita ku Buzima, OMS, bishobora kuzatwara imyaka myinshi. Biteganyijwe ko mu 2024 ari bwo umuganga umwe azaba afite ubushobozi bwo kuvura nibura abarwayi 7000.

Ni muri urwo rwego Leta irimo gushaka uburyo yakemura ikibazo cy’ubuke bw’abaganga, binyuze mu kongera umubare wabo ndetse no gushyiraho uburyo bushobora korohereza bake bahari, ku buryo bakora akazi kenshi mu gihe gito kandi batavunitse cyane.

Kimwe mu bisubizo birimo gutekerezwaho ni ikoranabuhanga ryakozwe n’ikigo cya ‘Allm’ gifite ishoramari mu rwego rw’ubuzima. Iki kigo gifite ‘application yitwa ‘The Join’ ifasha abaganga kuvugana mu buryo bworoshye, bigatuma bakora akazi kabo neza.

Ushobora kwitiranya iri koranabuhanga n’irindi risanzweho nka ‘WhatsApp’ na ‘Facebook’ byose bishobora gufasha abantu, barimo n’abaganga, kuvugana mu buryo bworoshye. Icyakora biratandukanye kuko The Join ari ikoranabuhanga rifite umwihariko wo kubika neza amakuru y’umurwayi, ku buryo adashobora kuba yakoreshwa mu buryo butemewe.

Uburyo ‘The Join’ izaba igisubizo ku buke bw’abaganga mu Rwanda

Iri koranabuhanga rizajya ryifashishwa n’abaganga bo mu Rwanda, ku buryo bashobora kuvugana no kwerekana amafoto yo mu buvuzi asobanura uburwayi, bityo umurwayi akaba ashobora kuvurirwa igihe.

Nk’urugero, umurwayi runaka ashobora kuba ari ku kigo nderabuzima cy’ahantu i Rusizi, ariko akeneye kubona ubuvuzi bwisumbuye yasanga nk’i Huye. Umuganga w’inzobere uri i Huye ashobora kwifashisha ‘The Join’ akamenyesha umuganga w’i Rusizi uburyo uwo murwayi ashobora kuvurwamo.

Hari ubwo bishobora kunanirana ko umurwayi avurirwa i Rusizi, wenda kubera ko ikigo nderabuzima yagiyeho kidafite ibikoresho bihagije cyangwa uburwayi bukaba bukomeye cyane. Icyo gihe umuganga w’i Huye abona ayo makuru mu buryo bwizewe ubundi akaba yitegura mu gihe imbangukiragutabara iri kuzana umurwayi uturutse i Rusizi.

Ibyo bituma mu gihe ahageze, ibyangombwa bigomba gutegurwa biba byashyizwe ku murongo bityo agahabwa ubuvuzi bwihuse.

Umuyobozi Mukuru w’Ikigo cy’Igihugu cy’Ubuzima, Prof. Claude Mambo Muvunyi, yavuze ko iri koranabuhanga rizabafasha mu guhangana n’ikibazo cy’abaganga bake.

Ati “Bizafasha ikintu kinini ku rwego rw’ubuzima rwo mu Rwanda cyane ko [iri koranabuhanga] rizanye udushya mu kuvura indwara neza. Bizafasha ku buryo ubuvuzi bwegera abaturage aho bari.”

Uyu muyobozi yavuze ko hazabaho n’uburyo bwo kongera amahugurwa ku baganga, byose bikazazamura urwego rwabo n’urw’igihugu muri rusange.

Ati “Tuzakorana na kaminuza zo mu Buyapani kugira ngo abaganga bacu babone amahugurwa ajyanye n’indwara z’umutima, kanseri n’izindi. Ikintu kindi twizeye ni ukubona amakuru mu buryo bworoshye cyane tubone ibikwiriye gushyirwamo ingufu muri rusange.”

Umuyobozi Mukuru wa Allm, Sakano Teppei, yavuze ko ari ubwa mbere bazanye ibikorwa byabo muri Afurika yo munsi y’Ubutayu bwa Sahara, avuga ko ikoranabuhanga ryabo rihendutse kandi ko bahisemo u Rwanda kuko ari igihugu gifite urwego rw’ubuzima rurimo gutera imbere cyane.

Ati “Ahantu hatari urwego rw’ubuzima rukora neza, nta kintu twakora. U Rwanda rufite urwego rw’ubuzima rutanga icyizere, ku buryo kuzana uburyo nk’ubu bishoboka.”

Yongeyeho ati “Abaganga bo mu Rwanda baradufasha cyane, ni abantu bashaka guhanga udushya, ibyo nabyo byaduteye imbaraga zo kuza gutangira gukorera mu Rwanda bwa mbere muri Afurika.”

Ku kijyanye n’ibikorwaremezo bishobora kuzatuma iri koranabuhanga rishyirwa mu bikorwa, uyu muyobozi yavuze ko bishoboka, na cyane ko murandasi igera ku bitaro birenga 95% ndetse n’umuriro w’amashanyarazi ukaba ugera ku bitaro birenga 80%, ibisigaye bigakoresha imashini zitanga amashanyarazi ndetse n’imirasire y’izuba.

Abaganga bagera kuri 40 bamaze gutangira gukoresha iri koranabuhanga aho rizasuzumwa mu gihe cy’imyaka ibiri n’igice iri imbere, mbere yo gukwirakwizwa mu gihugu hose. Bivugwa ko rihendutse inshuro 10 ugereranyije n’irindi koranabuhanga rijya kumera nkaryo rikoreshwa ahandi ku Isi.

Indwara zizaherwaho ni nka kanseri, umutima n’izindi zitandura, gusa urutonde rwazo rukazagenda rwiyongera bigizwemo uruhare na Minisiteri y’Ubuzima mu Rwanda.

Hari gahunda y’uko uyu mushinga ushobora kugezwa ku baganga barenga 1000 mu Rwanda, watanga umusaruro ukaba ushobora no kujyanwa mu bindi bihugu bya Afurika.

Uyu mushinga watewe inkunga n’Ikigo cy’Iterambere cy’Abayapani, JICA.

Umuyobozi Mukuru w’Ikigo cy’Igihugu cy’Ubuzima, Prof. Claude Mambo Muvunyi, yavuze ko iri koranabuhanga rizabafasha mu guhangana n’ikibazo cy’abaganga bake
Umuyobozi Mukuru wa Allm, Sakano Teppei, yavuze ko ari ubwa mbere bazanye ibikorwa byabo muri Afurika yo munsi y’Ubutayu bwa Sahara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .