00:00:00 IGIHE NETWORK KN KINYARWANDA EN ENGLISH FR FRANCAIS

Ni gute Kigali yaba umusemburo w’iterambere rya Afurika?

Yanditswe na Ndahayo Emmanuel
Kuya 22 June 2022 saa 07:11
Yasuwe :

Mu 2013, Abanyafurika barenga 42% bari munsi y’umurongo w’ubukene. Icyo gihe hashyizweho gahunda izwi nka ‘Agenda 2063’ aho yagenaga ko mu myaka 50, ubukene kuri uyu Mugabane buzaba buri munsi 3%, ku buryo ubwo Umuryango w’Ubumwe bwa Afurika, AU (yahoze ari OAU) uzaba uri kwizihiza imyaka 100 umaze uvutse, kuko watangijwe mu 1963, hazaba hari ikintu kigaragara werekana wagezeho, bitari bimwe bya politiki gusa.

Kugira ngo ibi bigerweho, bizasaba imbaraga zidasanzwe. Impamvu ni uko uyu Mugabane usabwa byinshi kandi mu nzego nyinshi, ku buryo kubibonera rimwe ari urugamba rutoroshye. Nk’ubu buri mwaka, Afurika ikeneye miliyari hafi 108$ zo kuziba icyuho ifite mu bikorwaremezo na miliyari 39$ mu kuziba icyuho mu burezi, aho Leta zo munsi y’Ubutayu bwa Sahara zishora 4,7% by’umusaruro mbumbe wabyo mu burezi.

‘Agenda 2063’ iteganya ko byinshi muri ibi bibazo bizaba byahawe umurungo muri uwo mwaka, cyane cyane bigizwemo uruhare n’ikoranabuhanga ndetse no guteza imbere ubucuruzi, ari naho havuye igitekerezo cyo gushyiraho Isoko Rusange rya Afurika (AfCFTA).

Nk’ubu ubucuruzi bukorwa hagati y’ibihugu bya Afurika bugomba kugera hejuru ya 50% mu 2063 buvuye kuri 12% mu 2013 na 16% buriho uyu munsi. Ni mu gihe uruhare rw’uyu Mugabane mu bucuruzi mpuzamahanga ruzagera hejuru ya 12%, ruvuye munsi ya 3% uyu munsi, nubwo uyu Mugabane utunze hafi 17% by’abaturage b’Isi.

Iyo tuvuze ubucuruzi, humvikana ubw’ibigo byigenga, by’umwihariko ibito n’ibiciriritse bigize 90% by’ibigo byose by’ubucuruzi, bigatanga akazi ku bakozi 80% bakora kuri uyu Mugabane. Hari kandi ibigo bigitangira, bizwi nka ‘Startups.’

Afurika ni wo Mugabane wa mbere ku Isi ugira abihangira imirimo benshi kurusha indi ku Isi. Nibura 22% by’Abanyafurika miliyoni 750 bari mu kigero cyo gukora, batangije ubucuruzi bwabo. Buri mwaka, aba biyongeraho miliyoni 10 zinjira ku isoko ry’umurimo. Mu 2035, Abanyafurika bari mu kigero cyo gukora bazaba bangana na miliyari 1,1, byumvikanisha ko ikigero cy’abatangiza ubucuruzi bushya nacyo kiziyongera.

Iki kigero kiri hejuru gutya gishobora kuba kinaterwa n’uko abatangiza ubucuruzi bagahomba muri Afurika ari bake ugereranyije n’ahandi ku Isi. Nk’ubu ibigo by’ubucuruzi byahombye hagati ya 2010 na 2018 ni 54,2% y’ibyari byatangijwe byose. Muri Leta Zunze Ubumwe za Amerika, iki kigero kiri kuri 90% na 75% muri Aziya.

Icyakora nubwo umubare w’abikorera muri Afurika uri hejuru, usanga umusaruro w’ishoramari ryabo uri hasi, ari nacyo gituma bitagirira akamaro kanini ubukungu bw’ibihugu bya Afurika.

Turebye nko mu rwego rw’ikoranabuhanga, ruri mu zikurura ishoramari ryinshi ku Isi, mu 2021, ibigo bigitangira bikora mu bijyanye n’ikoranahanga byakuruye ishoramari rya miliyari 4,3$, inyongera ifatika ugereranyije na miliyari 2,2$ mu 2020, ariko ikaba agatonyanga mu nyanja kuko bigize 0,02% by’ishoramari ryajyanywe ahandi ku Isi.

Ni mu gihe ikoranabuhanga ryitezweho kugira uruhare rungana na 10% by’umusaruro mbumbe wa Afurika mu 2025.

Uburyo Kigali ishobora kwifashishwa mu gukemura iki kibazo

Mu rwego rwo gukemura ikibazo cy’ubuke bw’igishoro gikenerwa n’ibigo by’ishoramari muri Afurika, ari nabyo bizagira uruhare mu guteza imbere uyu Mugabane, Leta y’u Rwanda yashyize gahunda ya Kigali International Finance Center (KIFC), igamije guhindura u Rwanda Ihuriro Mpuzamahanga rya Serivisi z’Imari.

Uretse gufasha ibigo bigitangira, iri huriro ryitezweho no kuzafasha ibigo bito n’ibiciriritse byo mu Rwanda na Afurika muri rusange, kuziba icyuho cya miliyari 330$ bifite mu bijyanye no kubona amafaranga abafasha mu bucuruzi bwabo.

Mu kuziba iki cyuho, KIFC ifite gahunda yo kongera ibikorwa bikurura ishoramari ry’ibigo bitanga serivisi z’imari, aho magingo aya imaze gukurura ishoramari ry’ibigo 65, byiganjemo ibyo muri Afurika, bigize 52%.

Hari kandi gushyiraho amategeko ajyanye no kurengera abashoramari, guteza imbere ibijyanye n’imisoro n’ibindi nk’ibyo. Iki kigo kandi gifite inshingano yo gukarishya ubumenyi bw’abakora muri serivisi z’imari mu Rwanda, kuko mu barenga ibihumbi 38 bakora muri urwo rwego, munsi ya 1% ari bo bafite ibyemezo byo ku rwego mpuzamahanga.

Mu Nama y’Ubucuruzi ishamikiye kuri CHOGM yabaye ku wa 21 Kamena, Minisitiri w’Intebe w’u Rwanda, Dr. Edouard Ngirente, yavuze ko u Rwanda rurajwe ishinga no gukurura ishoramari mpuzamahanga muri Afurika nk’imwe mu nzira yo kwiteza imbere.

Ati “Uburyo bumwe ni uko amahuriro mpuzamahanga afasha [mu iterambere] binyuze mu gukusanya igishoro gishyirwa mu rwego nk’inganda n’imishinga y’ibikorwaremezo izashoboza ibihugu bya Afurika guteza imbere ubucuruzi no kuzamura [ubukungu bwabyo].”

Uyu muyobozi yavuze ko ibi bizagerwaho bigizwemo uruhare n’ishyirwa mu bikorwa ry’amasezerano y’Isoko Rusange rya Afurika, ashimangira ko u Rwanda rwifuza kuba ihuriro ry’ibigo bitanga serivisi z’imari, kandi ko ruri gushyiraho amategeko n’ibindi byose bikenewe kugira ngo rugere kuri iyo ntego.

Umuyobozi Mukuru wa KIFC, Nick Basigye, yavuze ko gukurura ishoramari bizagira uruhare mu kongera imirimo no guteza imbere ibigo bito n’ibiciriritse bizarushaho kubona igishoro mu buryo bworoshye kandi buhendutse.

Kugeza ubu Leta y’u Rwanda imaze gushyiraho amategeko 17 agamije koroshya ikorwa ry’ubucuruzi no gukurura ishoramari, mu gihe KIFC imaze kugirana amasezerano y’ubufatanye n’ibihugu 10 birimo nk’u Bushinwa, Singapore, Mauritius, Morocco, Luxembourg, Qatar n’ibindi.

Iki kigo kandi giherutse gutangiza Ikigega cya Africa Fintech Fund kigamije guha umwihariko imishinga y’ikoranabuhanga, nk’imwe mu nkingi ikomeye y’ubukungu bwa Afurika mu bihe biri imbere.

Minisitiri w’Intebe w’u Rwanda, Dr. Edouard Ngirente, yavuze ko u Rwanda rurajwe ishinga no gukurura ishoramari mpuzamahanga muri Afurika nk’imwe mu nzira yo kwiteza imbere
Umuyobozi Mukuru wa KIFC, Nick Basigye, yavuze ko gukurura ishoramari bizagira uruhare mu kongera imirimo no guteza imbere ibigo bito n'ibiciriritse mu Rwanda no muri Afurika
Iyi nama yitabiriwe n'abantu benshi biganjemo abakora muri serivisi z'imari
Abayobozi batandukanye bafashe ifoto y'urwibutso nyuma y'ibiganiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .