00:00:00 IGIHE NETWORK KN KINYARWANDA EN ENGLISH FR FRANCAIS

Ni gute inama zihoraho mu bayobozi zagabanuka?

Yanditswe na Bukuru JC
Kuya 30 Ugushyingo 2021 saa 09:48
Yasuwe :

Mu impanuro Umukuru w’Igihugu yahaye abayobozi b’inzego z’ibanze bari mu mwiherero, yagarutse ku kibazo kimaze igihe, cy’inama zihoraho zituma abayobozi badatanga serivisi bashinzwe, bityo bikadindiza iterambere.

Umukuru w’Igihugu yagize ati "Hari ikintu cyateye kimeze nk’indwara. Abaturage bakora ingendo zivunanye bajya gushaka abayobozi mu biro byabo, bagerayo bakababwira ko bari mu nama. Ndashaka mumbwire, inama muhoramo zituma mudakemura ibibazo by’abaturage babagannye bavunitse, zimeze gute?”

Mu by’ukuri ibi bigaragaza ko Umukuru w’Igihugu akurikiranira hafi ibibazo by’abaturage. Iki kibazo nta muntu utakibaza keretse utajya gushaka serivisi mu nzego z’ibanze.

Reka iki kibazo tukirebere mu ishusho yacyo ari naho nshaka gutanga igitekerezo, kikaba cyashyirwa mu bikorwa kigakemura izi nama za hato na hato.

Ministeri y’Ubutegetsi bw’Igihugu irabyuka iti ’Mwandikire abayobozi b’uturere ko dufitanye inama mu cyumweru gitaha, ubwo bigashyirwa mu bikorwa gutyo.

Guverineri nawe bugacya agatumiza inama y’abayobozi b’uturere n’imirenge ubwo igategurwa gutyo.

Ibi niko bigenda no muri za minisiteri zitandukanye, usanga zigira gutya zigasaba ba Guverineri gutegura inama y’abayobozi bose b’uturere cyangwa imirenge, rimwe bikaba ari amahugurwa cyangwa se izindi mpamvu.

Usanga n’undi wese uri mu nzego zo hejuru cyangwa abafatanyabikorwa, ategura inama rwose abayobozi akababona mu buryo bworoshye, apfa kuba yanyuze muri Minisiteri y’Ubutegetsi bw’Igihugu cyangwa ku buyobozi bw’intara.

Njya nibaza niba hatabaho gahunda y’inama z’umwaka wose ndetse hagakorwa n’amatariki yazo, umuntu akaba azi inama afite mu mezi atandatu ari imbere. Inama zitunguranye zikaba ari zo ziba mu buryo bwihutirwa, kandi hakanabaho gusuzuma niba koko iyo nama itunguranye ifite icyo imaze gifatika, kuko buri wese utumije inama aba yumva kuri we yihutirwa nyamara wasuzuma ugasanga nta kinini ije guhindura.

Abayobozi b’inzego z’ibanze nabo si shyashya kuko hari ubwo bategura inama zitari ngombwa cyangwa zakabaye zikorerwa rimwe, ariko ugasanga zagiye zikorwa mu byiciro.

Aha naho ndatanga igitekerezo cy’uko abayobozi nabo bajya bakora gahunda y’inama bateganya ndetse hakabaho komite izemeza ku rwego rw’intara cyangwa rwa minisiteri bitewe n’ubushishozi bwakoreshejwe, bikagaragara ko iyo nama ikenewe koko.

Uyu mukoro wose ndawuha Ministeri y’Ubutegetsi bw’Igihugu, igomba kuba hafi abayobozi b’inzego z’ibanze ndetse ikagira n’igitsure kugira ngo buri wese ntagategure inama uko abishaka.

Ibi nibikorwa neza, umubare w’inama ukagabanuka, bizatuma ibibazo birimo guhora abayobozi b’inzego z’ibanze basiragira mu nzira bagiye mu nama bigabanuka, bitume no gusiragiza abaturage nabyo bigabanuka kuko abayobozi bazaba bahari.

Ibi kandi bizakemura ibibazo byo kwitabira inama ariko ugasanga abayobozi batabonye umwanya wo kwitegura, bigatuma batanga amakuru atari yo cyangwa bakizeza ibikorwa bidashoboka.

Ku rundi ruhande, ibi bizatuma habaho gukoresha neza umutungo w’Igihugu kuko uko abo bayobozi bajya mu nama, niko bandikirwa amafaranga ya misiyo, kandi ugasanga hari n’andi menshi agenda mu kuzitegura n’ibindi bijyana na zo.

Muri macye ntabwo inama ari mbi, ndetse hari igihe ziba zikenewe cyane, ariko ntabwo ari buri gihe bigenda gutyo, ari nayo mpamvu ari ngombwa kuzitegurana ubushishozi bityo mu kiganiro cy’ubutaha, Perezida wa Repubulika ntazongere kugaruka kuri iyi ngingo kuko izaba yakemuwe.

Perezida Kagame yasabye abayobozi b'inzego z'ibanze kugabanya inama zitari ngombwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .