Ngoma: Amashanyarazi yahinduye imibereho y’abatuye ingo 2600 ziheruka kuyahabwa mu mezi atatu

Yanditswe na Evariste Nsengimana
Kuya 11 Mutarama 2019 saa 02:33
Yasuwe :
0 0

Imiryango ituye mu Mirenge ya Rukira na Kibungo mu Karere ka Ngoma, ivuga ko uretse kuva mu icuraburindi, amashanyarazi iheruka guhabwa yayihinduriye imibereho kubera imishinga ibyara inyungu yatangije.

Umuyobozi w’ishami rya Sosiyete y’u Rwanda Ishinzwe Ingufu (REG) mu Karere ka Ngoma, Niyonkuru Benoît, avuga ko ingo 2652 zahawe amashanyarazi mu mushinga uterwa inkunga na Leta y’Ababirigi wayatanze mu turere twa Kayonza, Ngoma, Rwamagana na Kirehe.

Niyonkuru yavuze ko uyu mubare ushobora kwiyongera kuko abantu bari hafi y’umuyoboro w’amashanyarazi mu ntera itarengaho metero 37 ari bo bayahabwa ku ikubitiro, abandi bakazakomeza kugenda bayahabwa ku buryo umubare w’abazacanirwa uzarenga 3000.

Ubwo IGIHE yasuraga abatuye mu Mirenge ya Rukira na Ngoma uyu mushinga watangiriyemo, bavuze ko bishimiye uburyo amashanyarazi bahawe abafasha guhanga imirimo ndetse akaba yarongereye agaciro k’imitungo yabo n’ibindi.

Sindambiwe Viateur w’imyaka 27, yavuze ko mu byumweru bibiri bishize awukoresha yahise ashinga inzu yo kogosheramo mu Kagali ka Nyaruvumu, Umurenge wa Rukira.

Ati “Murabona nyine iterambere ririmo kuza, aka gateleviziyo ntako nari mfite ariko kubera umuriro nahise nkagura, urabona ko ibintu ari uburyohe.”

Ku munsi akorera hagati ya 1500Frw na 3000Frw atabariyemo ayo arya. Ateganya gushinga indi nzu yo kogosheramo, akayishyiramo abantu bamukorera ahereye ku musore amaze iminsi abyigisha.

Muri uyu Murenge uherereye mu cyaro, ntibyari byoroheye abawutuye kubona aho bashesha ibigori, amasaka, imyumbati n’ibindi. Babwiye IGIHE ko amashanyarazi ataraza basheshaga ku cyuma gikoresha mazutu, ikilo cy’imyumbati bagacibwa 50Frw ariko ubu ni 20Frw.

Kwizera Bonaventure wo mu Kagari ka Gatonde, Umurenge wa Kibungo, yavuze ko amashanyarazi bahawe yabafashije kuva mu icuraburindi.

Ati “Mbere ntarabona umuriro, nakoreshaga peteroli y’ibihumbi nka bibiri none aho uziye, ndacana nta kibazo. Mfite abana babiri biga, nibasubira kwiga bazajya basubiramo n’amasomo nta kibazo, mbere twacanaga itadowa nkabona ntibibona.”

Akanyamuneza ku ivuriro

Umuforomokazi wungirije umuyobozi w’ivuriro ‘Agaciro Nyaruvumu’ ryo mu kagari ka Nyaruvumu, Umutoniwase Aline, yavuze ko bafite ibikoresho bikenera amashanyarazi nk’ibipima ibizamini, ibikonjesha n’ibiteka ibyuma byifashishwa mu gupfuka ibikomere byoroheje.

Yavuze ko amashanyarazi bahawe mu Ukwakira ‘Hari icyo yatanze kuko aho tuboneye umurirmo w’amashanyarazi nta kibazo twongeye kugira’.

Agaciro k’imitungo kariyongereye

Umuyobozi w’Akagari ka Nyaruvumu, Ndaruhutse Jean de Dieu, yavuze ko ‘Umuriro utaraza hari mu icuraburindi, abaturage bakoresha peteroli ihumanya ikirere n’abantu, ariko ubu basigaye bakanda ku rukuta bagacana.

Ati “Inyungu rero byatuzaniye, hirya no hino mwagiye muhabona inzu zo kogosheramo, ibyuma bisya. Ibyo byose ni inyungu zaje muri Nyaruvumu.”

“Ubundi umuriro ni iterambere. Wadufashije byinshi cyane, ikibanza cy’aha cyaguraga ibihumbi 200Frw na 500Frw ariko uyu munsi ntiwahabona ikiri minsi ya miliyoni.”

Amashanyarazi yabafashije kubona amazi

Imirenge ya Rukira na Kibungo ni imwe mu duce tw’Intara y’Iburasirazuba twagorwaga no kubona amazi meza.

Umuyobozi w’ikigo gicunga ibikorwa byo kugeza amazi ku baturage mu Karere ka Ngoma, Twizeyimana Emmanuel, yavuze ko amashanyarazi abafasha guhagurutsa ibyuma biyakwirakwiza mu baturage.

Ati “Umuriro w’amashanyarazi uradufasha cyane. Udufasha gukoresha pompe zizamura amazi. Amazi ducunga, ni azamurwa mu mibande n’ingufu z’amashanyarazi cyangwa iza moteri. Biba byiza rero iyo azamuwe n’amashanyarazi kuko ibiciro byayo biri hasi.”

Twizeyimana yasobanuye ko ibiciro by’amazi agezwa ku baturage hifashishijwe amashanyazi, ijerekani igurwa 20Frw naho hifashishijwe mazutu ikagura 25Frw.

Ati “Ariko hakaba n’ibibazo kuri za mazutu, uburyo bwo kuzijyana, kuzigeza kuri moteri muri iyo mibande. uburyo bwo kuzikoresha, izo moteri zikunda gupfa ugasanga umuntu ahora azikora ariko ku mashanyarazi biba ari ibintu byiza cyane.”

Ishami rya REG mu Karere ka Ngoma rigaragaza ko abaturage bafite amashanyarazi bagera kuri 46%, ariko riko hari indi mishinga 2 iri gukorerwa mu Mirenge ya Kazo, Mutenderi, Murama , Sake na Zaza izasiga ingo 6,000 zihawe amashanyarazi muri uyu mwaka.

U Rwanda rufite ubushobozi bwo gutunganya Megawatt (MW) zisaga 220. Ingo zirenga miliyoni 1,27 zifite amashanyarazi yaba akomoka ku zuba ndetse no ku muyoboro mugari.

Abatuye Ngoma basigaye bagezwaho amazi meza azamuwe n'ingufu z'amashanyarazi
Agaciro k'ibibanza karazamutse nyuma yo guhabwa amashanyarazi
Inzu yogosherwamo ya Sindambiwe Viateur w’imyaka 27, yashinzwe amashanyarazi ahageze
Ivuriro rya Nyaruvumu naryo ryahawe amashanyarazi
Ibice byinshi by'Akagali ka Nyaruvumu byamaze guhabwa amashanyarazi
Mu mirenge ya Rukira na Kibungo hacaniwe ingo zirenga 2600 mu mezi atatu
Mu murenge wa Rukira basigaye bashesha kuri 20Frw mbere baracibewaga 50Frw

Umuforomokazi Wungirije umuyobozi w’ivuriro ‘Agaciro Nyaruvumu’, Umutoniwase Aline, yavuze ko ibikoresho byabo bisigaye bikoresha amashanyarazi y'umurongo mugari
Mu mirenge ya Rukira na Kibungo hacaniwe ingo zirenga 2600 mu mezi atatu
Umuturage wo mu kagari ka Nyaruvumu arimo kongera umuriro muri mubazi
Umuyobozi w’ikigo gicunga ibikorwa byo kugeza amazi ku baturage ibihumbi 231 307 bo mu Karere ka Ngoma, Twizeyimana Emmanuel, yavuze ko amashanyarazi abafasha guhagurutsa ibyuma bikwirakwiza amazi mu baturage
Umuyobozi w’ishami rya REG mu Karere ka Ngoma, Niyonkuru Benoit, avuga ko ingo 2652 zahawe amashanyarazi mu mezi atatu ashize

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza