N’umuntu umwe ufite ingengabitekerezo ya Jenoside tugomba kuyishiririza – Gen. Kabarebe

Yanditswe na Ferdinand Maniraguha
Kuya 13 Mata 2019 saa 04:09
Yasuwe :
0 0

Umujyanama Mukuru wa Perezida Paul Kagame mu bya gisirikare n’umutekano, Gen. James Kabarebe yavuze ko ingengabitekerezo ya Jenoside ari nka kanseri mu mubiri, ko aho igaragaye hose igomba gushiririzwa ngo idakwirakwira.

Yabitangaje kuri uyu wa Gatanu mu muhango wo kwibuka abahoze ari abakozi ba Minisiteri y’itumanaho no gutwara abantu n’ibintu (Minitransco) n’abari abakozi ba Minisiteri yari ishinzwe ibikorwa remezo (Minitrape) bazize Jenoside yakorewe Abatutsi.

Mu kiganiro yahaye abakozi ba Minisiteri y’ibikorwa remezo, Gen Kabarebe yavuze ko u Rwanda guhera mu 1957 rwagize umwaku wo kuyoborwa n’abantu bashyigikiye ingengabitekerezo ya Jenoside kugeza ishyizwe mu bikorwa mu 1994.

Yavuze ko ingengabitekerezo ya Jenoside ari nka kanseri, iyo idashiririjwe imunga umubiri wose.

Yavuze ko kubera ibyabaye mu Rwanda, umuntu wese ushaka kuruhungabanya yifatanya n’abashyigikiye ingengabitekerezo ya Jenoside akeka ko gucamo abaturage ibice byoroshye.

Ati “N’igisambo cyahunze cyavuye hano, nta handi kinyura ni muri ya ngengabitekerezo ya Jenoside. Umuturanyi ushaka guhungabanya u Rwanda nta yindi turufu afite uretse kuvuga ngo abanyarwanda bashobora gucibwamo ibice. Ngo kubera habaye Jenoside, abanyarwanda bacibwamo ibice byoroshye. Niko babyumva ariko umusingi wamaze kubakwa, hubatswe inzego zitihanganira ingengabitekerezo ya Jenoside.”

Kaberebe yakomeje avuga ko ariyo mpamvu nta kwihanganira ahagaragaye ingengabitekerezo ya Jenoside kuko umwe uyifite ashobora gukongeza abandi.

Yatanze urugero rwo mu 1957 aho ingengabitekerezo ya Jenoside yahereye mu biyitaga abanyabwenge, bikarangia mu 1994 n’abaturage bo hasi bayishowemo.

Ati “Abo bose baba bari hanze, si uko bafite imbaraga zo kurwanya u Rwanda nta nubwo babishobora. Ikibazo cyabo gusa ni kimwe, n’iyo yaba umuntu umwe afite ingengabitekerezo ni nka kanseri iri mu mubiri. Kanseri iri mu mubiri hari ibyuma bita ‘’ bagenda bagatunga ha handi iri bagashiririza. Natwe rero niko tugomba gukora. Nubwo haba umuntu umwe ufite ingengabitekerezo ya Jenoside tugomba kuyishiririza kuko irakura.”

Icyakora Gen Kabarebe yavuze kuri ubu kubera uburyo igihugu cyubatse nta we ugipfa gutinyuka kuvuga ingengabitekerezo ya Jenoside ku mugaragaro, ngo babikora mu bundi buryo.

Ati “Buriya abashyigikiye ingengabitekerezo ntabwo ubu batinyuka kuyivuga. Baravuga ngo mufungure urubuga rwa politiki. Baba bavuga izo za PS Imberakuri, ba Ingabire ngo ni ugufungura politiki. Mu yandi magambo ni nko kubabwira ngo nimufungurire ingengabitekerezo. Iyo bavuga ngo itangazamakuru ntirifunguye, ni ukugira ngo mureke na bariya bashaka kuvuga ingengabitekerezo bayivuge.”

Yasabye abanyarwanda guhora bari maso aho babonye icyuho cyacamo ingengabitekerezo ya Jenoside bagahangana nayo.

Yavuze ko ubu igihugu kirajwe ishinga no guteza imbere abaturage kuko mu 1994 hari abashowe muri Jenoside kubera ubukene.

Ati “Bari bakennye cyane ku buryo gukuramo miliyoni irenga ikajya kwica ni ibintu byoroshye cyane. Umuntu ukennye kumushumuriza ngo yice ntabwo bigoye kuko ntatekereza.”

Minisitiri w’Ibikorwa Remezo Amb Gatete Claver, yavuze ko muri iki cyumweru cyo kwibuka, abakozi b’iyo Minsiteri basobanuriwe byinshi ku buryo inyigisho babonye zizabafasha kurwanya ingengabiteerezo ya Jenoside.

Yavuze ko nk’abakozi ba Minisiteri ifatiye runini igihugu, bizatuma bakomeza kurushaho gutanga umusanzu, bubakira umunyarwanda ubushobozi.

Ati “Ni Minisiteri ifite inshingano ziremeye kandi zifite ingaruka ku banyarwanda. Nitwe twakabaye tuba intangarugero ngo dufashe abanyarwanda bari barasigaye inyuma, bari baraciwemo ibice. Igihe hari abakene benshi kubashuka biroroha cyane ariko turashaka ko abanyarwanda bose batera imbere.”

Kugeza ubu hamaze kumenyekana abantu 165 bari abakoze ba Minitrape na Minitransco bazize Jenoside yakorewe Abatutsi.

Kabarebe yavuze ko u Rwanda rutazihanganira umuntu ufite ingengabitekerezo ya Jenoside
Ubwo hacanwaga urumuri rw'icyizere
Minisitiri Amb Gatete Claver yandika mu gitabo cy'abashyitsi ku rwibutso rwa Jenoside rwa Kigali
Abakozi ba Mininfra basobanuriwe byinshi ku mateka yagejeje u Rwanda kuri Jenoside
Abakozi ba Mininfra basuye urwibutso rwa Jenoside rwa Kigali basobanurirwa amateka ya Jenoside yakorewe Abatutsi
Abakozi ba Mininfra bunamiye inzirakarengane za Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza