00:00:00 IGIHE NETWORK KN KINYARWANDA EN ENGLISH FR FRANCAIS

Mushikiwabo aravuga ku kwibuka, Karegeya, kubungabunga amahoro n’ibindi

Yanditswe na

IGIHE

Kuya 9 Mutarama 2014 saa 05:44
Yasuwe :
0 0

Kuwa Mbere tariki ya 6 Mutarama Minisitiri w’ububanyi n’amahanga w’u Rwanda Louise Mushikiwabo yagiranye ikiganiro cyihariye n’abagabo babiri aribo Albert Rudatsimburwa uyobora Radio Contact FM, na Aldo Havugimana uyobora Radio Rwanda. Muri icyo kiganiro Minisitiri Mushikiwabo yagarutse ku kwibuka Jenoside yakorewe Abatutsi ku nshuro ya 20, ku rupfu rwa Karegeya, umutekano mu karere, kubungabunga amahoro hirya no hino n’ibindi.
Kwibuka Jenoside ku nshuro ya 20
Mushikiwabo avuga ko uyu mwaka (...)

Kuwa Mbere tariki ya 6 Mutarama Minisitiri w’ububanyi n’amahanga w’u Rwanda Louise Mushikiwabo yagiranye ikiganiro cyihariye n’abagabo babiri aribo Albert Rudatsimburwa uyobora Radio Contact FM, na Aldo Havugimana uyobora Radio Rwanda. Muri icyo kiganiro Minisitiri Mushikiwabo yagarutse ku kwibuka Jenoside yakorewe Abatutsi ku nshuro ya 20, ku rupfu rwa Karegeya, umutekano mu karere, kubungabunga amahoro hirya no hino n’ibindi.

Kwibuka Jenoside ku nshuro ya 20

Mushikiwabo avuga ko uyu mwaka ari uwa 20 hibukwa Jenoside yakorewe Abatutsi, ukaba kandi ari imyaka 20 ishize u Rwanda rwibohoye; bityo ngo ni igihe kidasanzwe, ndetse bikwiye gufasha abantu kwibuka aho bava n’aho bagana, bakanibuka ko Jenoside ari icyaha kidasanzwe, bityo hirya no hino ku Isi hakaba hagomba gutangira ibikorwa byo kwibuka guhera tariki ya 7 Mutarama 2014.

Minisititi Mushikiwabo avuga ko iki ari igihe kidasanzwe cyo kwibuka jenoside, aho buri munyarwanda cyangwa se undi muntu urwanya jenoside yasubiza amaso inyuma. Hazatambagizwa urumuri rutazima mu ntara zose z’u Rwanda kugeza ku itariki ya 7 Mata ubwo urwo rumuri ruzagaruka mu mujyi wa Kigali ku Gisozi.

Avuga kuri Karegeya

Ubwo yari abajijwe ku kibazo cy’urupfu rwa Patrick Karegeya, Minisitiri Mushikiwabo avuga ko Karegeya yigeze gukorera u Rwanda mu kazi k’iperereza akaza guhunga igihugu akoze amakosa akomeye arimo no kugambanira igihugu, ariko ikivugwa cyane akaba ari uko yashatse kumvikana na Kabuga ndetse n’umuryango we harimo no kubaha amafaranga ndetse no kumukingira ikibaba.

Leta no guhangana na Karegeya

Abajijwe niba u Rwanda rwaba rufite uruhare ku rupfu rwa Karegeya, Mushikiwabo yavuze ko u Rwanda rudafite inshingano zo kumenya ibibera mu bindi bihugu, kandi n’u Rwanda ngo ntabwo rubyitayeho kuko Karegeya yari umwanzi w’u Rwanda. Yikomye ibitangazamakuru mpuzamahanga n’Abanyarwanda baba hanze bagereka ikibaye cyose kuri leta y’u Rwanda akaba asanga hakwiye iperereza risesenguye mbere yo gutunga agatoki u Rwanda.

Mushikiwabo kandi avuga ko Karegeya ubwe yivugiye ko agiye kurwanya igihugu akoresheje inzira yo kumena amaraso. Agira ati “Iyo umuntu ahagurutse avuga ko agiye kurwanya igihugu, igihugu nacyo kigomba kumurwanya niko bimeze. Ntabwo ushobora kwibaza ngo ndahagurutse ndanabivuze ku maradiyo hirya no hino ndetse mbishyize no mu bikorwa ngiye gukora ku buryo igihugu ngiteza imvururu kitazikuraho nkoresha ibishoboka byose kugira ngo n’ubuyobozi bw’iki gihugu buveho nabi kandi mu buryo bw’intambara”.

Mushikiwabo kandi avuga ko uwiyemeje kurwanya igihugu nacyo kimurwanya. Asobanura Karegeya kandi nk’umugabo mubi cyane akaba abyemeza nk’umuvugizi wa leta kandi nk’umuntu ukurikirana iby’abanzi b’igihugu baba mu mahanga.

Agira ati "Uyu mugabo yari umugabo mubi cyane ku bijyanye n’imigambi ye mibi yari yaravuze yo kurwanya igihugu”.

Ashimangira ko buri wese wiyemeza kwifatanya n’Interahamwe aba ari umwanzi w’u Rwanda kuko ngo Karegeya yafatanyije na FDLR kugaba ibitero mu Rwanda, ndetse bigahitana benshi b’inzirakarengane”.

Karegeya na FDLR

Kuba nyuma y’urupfu rwe umutwe wa FDLR warageneye ubutumwa bwo kwifatanya mu kababaro n’umuryango we, Mushikiwabo avuga ko umuntu w’intwari muri FDLR nta mwanya yabona mu Rwanda ndetse ko urwanya igihugu byanga bikunda nacyo kigomba kumurwanya. Aha niho ashyira mu gatebo Kamwe Karegeya na Gen Mudacumura uyobora umutwe wa FDLR.

Ese kwica Karegeya byari muri gahunda za leta?

Asubiza iki kibazo Mushikiwabo yagize ati “Byaba kuri gahunda bitaba kuri gahunda, icyo mvuga, ubundi se nka leta njyewe undwanyije nabuzwa n’iki kukurwanya? Uko yapfuye n’uwamwishe, ibyo igihugu arimo kirabikurikirana."

Kohereza ingabo muri Centrafique

Nk’u Rwanda rukiyoboye Akanama k’umutekano k’Umuryango w’Abibumbye ngo u Rwanda rukomeza kuvugira iki gihugu cyugarijwe n’intambara u Rwanda rukaba rurimo gushaka icyakorwa, ndetse Umuryango wa Afurika Yunze Ubumwe ukaba warasabye u Rwanda koherezayo ingabo mu guhangana n’ibibazo by’ingutu byugarije iki gihugu, ndetse u Rwanda rukaba rurimo kwitegura mu kohereza ingabo muri iki gihugu.

Intambara muri Sudani y’Epfo

Avuga ku makimbirane abera muri Sudani y’Amajyepfo, Minisitiri w’Ububanyi n’amahanga avuga ko ibihugu byo mu karere byatunguwe n’imvururu zadutse muri iki gihugu kimaze imyaka ibiri kibonye izuba, ariko ibihugu by’abaturanyi birakora ibishoboka byose ngo izi mvururu zirangire amazi atararenga inkombe.

MONUSCO na FDLR

Ku kibazo cya FDLR Mushikiwabo avuga ko hari abantu bakuririza ibibazo nyamara ikibazo cy’Interahamwe kigiye kumara imyaka 20 kiza ku isonga kandi ibibazo byinshi biba mu karere ipfundo riri kuri FDLR. U Rwanda rukaba rugaragaza ko rutishimiye kujenjeka guhari mu kurandura burundu umutwe wa FDLR, ariko mu bigaragara bigasa nk’aho nta gikorwa kuko manda ya MONUSCO atari ukwimura FDLR, ahubwo ari ukurandura FDLR burundu.

Mushikiwabo kandi yikomye abashaka kugabanyiriza icyaha FDLR akaba avuga ko kabone n’iyo yaba ari umuntu umwe wo muri FDLR, uwo ateye ikibazo u Rwanda.

Ushobora kumva ikiganiro uko cyakabaye hano


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .