00:00:00 IGIHE NETWORK KN KINYARWANDA EN ENGLISH FR FRANCAIS

Musanze: Umugabo yaguye muri Gym ahita apfa

Yanditswe na Ntabareshya Jean de Dieu
Kuya 7 Mutarama 2023 saa 11:43
Yasuwe :

Umugabo wo mu Karere ka Musanze witwa Ndamiyabo Ferdinard yaguye mu nzu ikorerwamo imyitozo ’Gym’ ahita apfa mu buryo butunguranye.

Aya makuru y’urupfu rw’uyu mugabo w’imyaka 41 yamenyekanye mu ma saa kumi n’ebyiri z’umugoroba wo kuwa kane tariki 5 Mutarama 2023.

Ibi byabaye ubwo yari muri iyo nzu akorera siporo ku mashini igenewe kwirukankirwaho yitwa Lepow, ahitwa muri Up Town Gym, ibarizwa muri etage y’ahazwi nko kwa Mudjomba, mu mujyi rwagati wa Musanze.

Bivugwa ko ubwo yari kwirukanka yifashishije iyo mashini yaguye hasi agahita ahera umwuka. Abari muri iyo nzu bahise bihutira kumujyana mu ivuriro riri hafi y’iyi nyubako ariko bamugezayo yashizemo umwuka.

Biteganyijwe ko uyu mugabo ashyingurwa uyu munsi kuwa Gatandatu.

Umuvugizi wa Polisi y’u Rwanda mu Ntara y’Amajyaruguru, SP Alex Ndayisenga, yabwiye itangazamakuru ko aya makuru ari impamo avuga ko byaturutse ku muvuduko mwinshi yakoreshaga.

Ati "Ubwo uwo mugabo yirukankaga kuri iyo mashini, yituye hasi biturutse ku muvuduko mwinshi yari ifite, kuko wari ku gipimo cya gatatu".

SP Ndayisenga yasabye abakora siporo zitandukanye ko bakwiye kwigengesera no kumenya neza imikorere n’imikoreshereze y’ibyuma birimo mu gihe bagiye kubikoresha kuko bishobora gutera impanuka zanatwara ubuzima bw’abantu.

Yongeraho ko "Abashinzwe gukoresha imyitozo muri izo nzu na bo bakwiye kubanza gusobanurira ababagana imikorere y’ibikoresho n’imashini bafite, kandi bakajya bababa hafi kugira ngo bashobore kubafasha igihe bibaye ngombwa".

Ubusanzwe siporo ifasha umubiri cyane mu kwirinda no kurwanya indwara zitandukanye ndetse no kugira imibereho itunganye.

Buri wese akeneye imyitozo ngororamubiri hatitawe ku myaka, igitsina ndetse n’icyo waba ukora, buri wese yayishobora kandi ni ingenzi mu buzima nubwo hari ibyo aba asabwa kwigengesera hato bitamuviramo impanuka zaganisha no ku rupfu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .