00:00:00 IGIHE NETWORK KN KINYARWANDA EN ENGLISH FR FRANCAIS

Musanze: Itungo ryibwe rizajya ryishyurwa n’abagize umudugudu

Yanditswe na Ndikumwenayo Thierry
Kuya 24 Ukuboza 2022 saa 11:58
Yasuwe :

Kurarana n’amatungo ni umuco wasaga n’uwacitse nyuma y’uko Leta y’u Rwanda ibishyizemo imbaraga, gusa kuri ubu mu bice bitandukanye by’akarere ka Musanze uyu muco ugenda ugaruka.

Abatuye aka karere baganiriye na IGIHE bavuga ko impamvu yo kongera kurarana n’amatungo ari ubujura bukabije buriho muri iyi minsi, aho utayiraje hafi ye aba atizeye umutekano wayo.

Amatungo magufi niyo abaturage bakunda kurarana nayo arimo; inkoko, ihene n’intama.

Ubuyobozi bw’akarere bwo buvuga ko ubu bujura bukwiye gucika ndetse n’uku kurarana n’amatungo bigacika kuko ari umuco utajyanye n’igihe, aho hagiye kujyaho gahunda y’uko itungo ryibwe rizajya ryishyurwa n’abagize umudugudu, ibi bikazahwitura abaturage mu kwicungira umutekano.

Maniragaba Anatolie utuye mu kagari ka Birira, Umurenge wa Kimonyi, avuga ko usibye na nijoro no ku manywa hari igihe usiga itungo hanze wagaruka ugasanga baritwaye.

Ati “Ntabwo waraza ihene hanze ngo ejo uzisange no ku manywa iyo twagiye mu murima tuzisiga mu nzu, kuko uzisize ntiwagaruka ngo uzisange”.

Mundanikure Eraste asobanura ko iki kibazo gihangayikishije kuko bayaraza mu bikoni abajura bakayiba.

Ati “Bamwe ntibafatwa n’ushoboye gufatwa ararekurwa. Itungo rigeze ku bihumbi 50, kandi kuriraza ryonyine ntabwo ari ibintu bitworoheye”.

Byayingabo Alex wo mu murenge wa Nyange yemeza ko mu kwirinda ko amatungo yabo yibwa bahisemo kongera kurarana nayo.

Ati “Amatungo twararanaga nayo, ariko uri kubona ko hajemo ikibazo kuko bavuze itungo rizajya ryibwa abaturage bazajya baririha. Ubu tugiye kuyasubiza aho yabaga, hanyuma dukaze umutekano kuko ntawakwishimira kuriha ikintu cyibwe atabigizemo uruhare!”

Umuyobozi w’akarere ka Musanze Ramuli Janvier yatangaje ko n’ubwo ubu bjura buhari nta gikuba kiracika, avuga ko bidakwiriye ko umuturage ararana n’amatungo kuko ari umuco udakwiriye kuko wari utangiye no gucika.

Ati “Twafashe indi ngamba, itungo rizajya ribura, ba gitifu twarabibabwiye muzajya mushyira hamwe nk’umudugudu mwegeranye ya mafaranga mwishyure wa muturage kugira ngo buri wese yumve ko afite uruhare mu kubungabunga ko nta muntu wibwa itungo rye.”

Nyuma y’uko icyorezo cya Covid-19 kigabanyije umurego, ubujura bw’amatungo bwatangiye gufata indi ntera bitandukanye cyane na mbere yaho. Abaturage bakaba basaba ko hakwiriye ingamba zihamye ku bafatwa bakora ubu bujura.

Amatungo magufi akunda kwibwa cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .