Mu gihe u Rwanda ruri mu bihugu byimakaje ku rugero rwiza ihame ry’uburinganire n’ubwuzuzanye, kuva kuri uyu wa mbere tariki 23/12/2013 Inama Nkuru y’Itangazamakuru mu Rwanda yateguye umwiherero w’iminsi ibiri ugamije gusobanurira abayobozi b’ibitangazamakuru bitandukanye bikorera mu Rwanda uruhare rwabo muri uru rugendo.

Abayobozi b'ibitangazamakuru basobanuriwe akamaro k'uburinganire n'ubwuzuzanye basabwa kubwimakaza mu bitangazakuru byabo

Muri uyu mwiherero ubera mu Karere ka Musanze, nk’uko byasobanuwe n’Umunyamabanga Nshingwabikorwa w’Inama Nkuru y’Itangazamakuru Peacemaker Mbungiramihigo, ngo uruhare rw’umugabo n’umugore rurakenewe mu iterambere ry’igihugu cyacu. Ibi rero ngo bikwiye kumenyekana bihereye mu itangazamakuru. Ati “Iterambere rirambye ntiryagerwaho abagabo n’abagore badahawe amahirwe angana... Igenzura ryakozwe ryerekanye ko iyi gahunda ikenewe kugira ngo twihutishe iterambere. Icyagaragaye ni uko ubusumbane mu mateka bwerekanye ko abagabo n’abagore batangana.”

Bamwe mu bayobozi b’ibitangazamakuru bitabiriye uyu mwiherero bagaragaje ko kutita ku gaciro ka muntu bikigaragara mu bitangazamakuru bimwe na bimwe mu Rwanda ahanini hagendewe ku ndonke bikabangamira cyane ihame ry’uburinganire n’ubwuzuzanye.

Ildephonse Sinabubariraga, umuyobozi wa Radio Ishingiro ikorera mu karere ka Gicumbi, ati “Ni twe dukwiye kumera nk’ijisho rirebera rubanda kuko iyo ufashe mu kinyamakuru cyawe ugashaka kugaragaza igituma abakobwa bakurura abagabo ugafata ifoto yo muri Canada ntushake iy’ino mu Rwanda ibyo tugomba kubica.”

Yavuze ko uburinganire atari umugore, ahubwo ari ubufatanye hagati y’umugabo n’umugore. Ibi kandi ngo ni byo u Rwanda rwagezeho mu bijyanye no guteza imbere abagore no kubaha ijambo mu nzego zifata ibyemezo bigatuma igihugu cyihariye umwanya wa mbere ku isi.