Musanze: Isoko rya Kinigi ritagira ubukarabiro riteye impungege abarirema

Yanditswe na N.Kubwimana Janvière
Kuya 19 Kanama 2020 saa 02:38
Yasuwe :
0 0

Abarema isoko rya Kinigi n’abacururizamo batewe impungenge n’uko ritagira aho abarigana bakarabira intoki mbere yo kwinjira, ndetse n’abarimo ntibite ku mabwiriza yo kwambara agapfukamunwa mu rwego rwo kwirinda Coronavirus.

Ni isoko riherereye mu Karere ka Musanze, rirema kabiri mu cyumweru. Ku munsi w’isoko, rishobora kwakira abantu 6.000, mu gihe baba ari 1.000 ku yindi minsi isanzwe.

Bamwe mu barema bakanakorera muri iri soko bavuga ko bagiye kumara amezi abiri barirema ariko ntaho gukarabira intoki hagenwe, ndetse ngo n’ubukarabiro bwa kijyambere bwari bwubatswe, bumaze ukwezi nta mazi bugira.

Kanyamibwa Boniface, umwe mu bakorera muri iri soko, yagize ati "Usibye kwimenya ariko iri soko rigezemo abantu babiri banduye Coronavirus twashira. Tumaze hafi amezi abiri abarema iri soko batagira aho bakarabira intoki, udupfukamunwa two twahindutse udupfuka-kananwa, hari n’abadutwara mu ntoki. Guhana intera byo ntibazi icyo bivuze, mbese hatabayeho gukaza amabwiriza turerekeza habi".

Uwitwa Niyitegeka Mathias yongeyeho ati "Ariko se aho kwa Mutangana wumva bafunze, hari umunsi abacuruzi bo muri iri soko batajyanayo imboga n’ibirayi? Abandi bazanayo ibishyimbo n’ibindi, ariko birababaje kubona abo bose binjira badakarabye, babapima umuriro bakumva ko bihagije, n’ubukarabiro bw’intoki bubatse bumaze ukwezi bwuzuye nta mazi abamo, ntituzi icyo babitekerezaho ariko birakabije rwose".

Umuyobozi w’Akarere ka Musanze Wungirije Ushinzwe Imibereho Myiza y’Abaturage, Kamanzi Axelle, avuga ko habayeho uburangare ku buyobozi bw’isoko na rwiyemezamirimo wubatse ubukarabiro bw’intoki kuko bwuzuye ntibwashyirwamo amazi.

Yavuze ko batangiye kuvugana n’ubuyobozi bw’Umurenge ku buryo mu minsi ya vuba, ubu bukarabiro buzatangira gukoreshwa.

Yagize ati "Ubwogero bw’intoki bwubatswe muri ririya soko kugira ngo bukemure iki kibazo ku buryo burambye, habayeho kwihererana ikibazo hagati y’ubuyobozi bw’isoko na rwiyemezamirimo wabwubatse. Ubu twatangiye kuvugana n’Ubuyobozi bw’Umurenge kugira ngo ubu bukarabiro butangire gukoreshwa".

Kamanzi akomeza asaba abikorera gushyira imbaraga mu rugamba rwo kurwanya Coronavirus, cyane ahahurira abantu benshi nko mu masoko n’ahandi. Yibukije abaturage kubahiriza amabwiriza yashyizweho, kuko nibakomeza kwirara, gahunda ya guma mu rugo izongera igashyirwaho kandi yahungabanya imikorere kabo.

Isoko rya Kinigi rifite imiryango itandatu yinjirwamo n’abarirema, muri yose, nta n’umwe ufite ubukarabiro ku muryango.

Kuwa 16 Kanama 2020 nibwo Minisitiri w’Ubuzima mu Rwanda, Dr Ngamije Daniel, yatangaje ko ubwiyongere bw’abarwayi ba Coronavirus bwakomotse ku bantu bo mu masoko ya Kigali City Market mu mujyi rwagati, n’iryo kwa Mutangana riri Nyabugogo.

Mu minsi ine yakurikiyeho, abantu 278 bagaragayeho uburwayi bwa Coronavirus. Kugeza kuri uyu 18 Kanama, abantu 2.577 bamaze gusangwamo Coronavirus mu bipimo 342.614 bimaze gufatwa. Abagera ku 1.683 ni bo bamaze gukira mu gihe abandi 10 bitabye Imana, barimo babiri bagaragaye kuri uyu wa kabiri.

N'ubwo hafatwa ibipimo, kuba nta bukarabiro buhari biteye impungenge abarema isoko rya Kinigi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .