00:00:00 IGIHE NETWORK KN KINYARWANDA EN ENGLISH FR FRANCAIS

Musanze: Impungenge ku bagore bibisha amayeri yo kubeshya ko batwite

Yanditswe na Ndikumwenayo Thierry
Kuya 26 Ugushyingo 2022 saa 08:30
Yasuwe :

Abatuye Umudugudu wa Kadahenda mu Murege wa Kimonyi bavuga ko ntawe ugisiga ihene n’andi matungo magufi hanze ngo ajye mu turimo, bitewe no kuba hari abagore baturuka mu Murenge wa Muhoza ahitwa ku Kabaya bakabiba.

Aya makuru yemezwa n’ushinzwe umutekano muri uyu mudugudu, uvuga ko yafashe aba bagore akabajyana iwe kugira ngo ahamagare inzego zimukuriye. Mu kubasiga iwe ngo batoboye inzu ye baratoroka.

Ati “nabasize mu nzu iwanjye ngiye guhamagaza abaturage ngo baze mu nteko, naragarutse nsaga inzu bayitoboye banyura munsi y’idirishya. Abantu babirutseho barafata tubajyana mu nteko."

Yakomeje avuga ko bafite amayeri yo kwambara ibintu mu nda kugira ngo abantu babone ko batwite.

Ati "Bafite amayeri ahambaye, hari umwe wagaragaraga nk’aho atwite, yisize amaraso ku maguru aranaremba ngo tumujyane ku bitaro. Ikiri kutubabaza n’ukuntu turi kubafata twabashyikiriza RIB twanatanze ikirego bagahita barekurwa.”

Abaturage bo muri uyu mudugudu bavuga ko iki kibazo giteye inkeke kuko bigoye gukeka ko aba bagore n’abakobwa bakora ubu bujura, kuko babikora ku manywa y’ihangu.

Speciose Ntibatekereza atuye muri uyu mudugudu, ati “hasigaye haraje abagore baturutse ku Kabaya, baraza bakazitura ihene hari n’igihe babwiye n’akana gato ngo dushoreze! Kugira ngo abantu batamyenya ko aribo bazishoreye! Bamaze gufatwa inshuro irenze imwe; iyo abantu batariyo ni ukuzisiga mu nzu da! Abo bagore n’ingufuri barazica!

Nyiramana Donatha nawe yemeza ko iki kibazo gihari, ashingira kubafashwe bagasanga bakenyereye ku maraso kugira ngo nihagira ubakoraho bagaragaze ko bakuyemo inda.

Ati “bari bakenyereye ku matezano (amaraso) kugira ngo nibabakubita bagire ngo inda zivuyemo! Bageze kwa mutekano yanga kubakubita kugira ngo inda zabo zitavamo, yabahaye n’ibiryo!”

Umunyamabanga nshingwa bikorwa w’Umurenge wa Muhoza ahavugwa ko aba bavujura baturuka, Manzi Jean Pierre yatangaje ko hari ubujura bukorwa n’abana b’abakobwa b’inzererezi; yemeza ko abo bafata babagariza binyuze mu muryango.

Ku kibazo cy’aba bafite uburyo bwo kwifashisha amaraso nk’uburyo bwo kugaragaza ko batwite yavuze ko ntabyo yari azi.

Ati “wenda uko baba babiganira harimo no gukabya cyane, icyo cyo ntabwo nari nkizi nta n’amakuru yacyo dufite.”

Aba baturage basaba inzego zibishinzwe kujya zihana aba bagore nk’uko abagabo bahanwa; aho kubarekura hadaciye kabiri kuko bataba bakemuye ikibazo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .