Musanze: Hatangiye kugeragerezwa ubuhinzi bwa pome zisanzwe zitera cyane ku butaka bw’u Rwanda

Yanditswe na N.Kubwimana Janvière
Kuya 27 Ukwakira 2020 saa 01:56
Yasuwe :
0 0

Abahinzi bo mu Karere ka Musanze batangiye kugerageza guhinga imbuto za pome, bagamije guhangana n’ikibazo cy’ibura ryazo ku isoko rituma zihora zihenze, kubera ko zigera mu Rwanda zitumijwe mu mahanga aho zihingwa.

Ni igikorwa cyabaye kuri uyu wa 26 Ukwakira 2020, mu Murenge wa Nyange, aho umuryango w’abahinzi n’aborozi ukomoka mu Buholandi Agritera watanze ingemwe 1200, ku bahinzi bibumbiye mu makoperative.

Ni igikorwa cyakozwe ku bufatanye na Minisiteri y’Ubuhinzi n’Ubworozi ndetse na NAEB, bagamije kugerageza kureba ko izi mbuto zabasha kwera ku butaka bw’u Rwanda.

Izi ngemwe za pome uko ari 1200 zatanzwe na Agritera mu Karere ka Musanze, zagabanyijwe amakomperative abiri ariyo COUSHI, ikorera mu Murenge wa Shingiro yahawe ingemwe 300 na COAPB ikorera mu Murenge wa Nyange, yateye mu murima wayo ingemwe zigera kuri 900.

Uretse izi ngemwe zatanzwe muri Musanze, uyu muryango watanze n’izindi 800 zizageragerezwa muri Gicumbi.

Bamwe muri aba bahinzi bavuga ko batangiye kwagura ubuhinzi bwabo, aho ngo bari basanzwe bahinga ibirayi n’ingano, bakaba bagiye kongeraho imbuto za pome, bavuga ko ari igihingwa bitezeho kuzamura ubukungu bwabo, bagakemura ikibazo cy’ibura ryazo ku isoko bituma zikomeza guhenda.

Mukamazimpaka Marceline yagize ati " Pome ku isoko zirahenze, ubu imwe igura 400 Frw na 500 Frw, Agritera yaratwegereye itubwira ko hari igihingwa kigiye kugeragerezwa mu Rwanda cya pome, tugisamira hejuru, baduhaye imbuto ubu twatangiye kuzigerageza, niziramuka zidukundiye, bizatuma zidakomeza guhenda kuko zitumizwa mu mahanga, tuzisarura iwacu zaboneka zihendutse buri wese akabasha kuzigurira."

Twizerimana Innocent nawe yavuze ko iki gihingwa cya pome bacyitezeho kuzamura ubukungu bwabo ku buryo bwihariye, ndetse n’amafaranga yajyaga agendera mu kuzitumiza hanze akoreshwe ibindi.

Ati "Izi mbuto tuzitezeho byinshi bishoboka duhereye ku bukungu, umuryango Agritera batubwiye ko pome yitaweho neza mu mwaka isarurwaho imbuto zirenga 300 ku mwaka, iyo ukubye n’igiciro cya pome imwe, urumva ko amafaranga yavamo atari make, niba duteye ibiti 900 urumva miliyoni twitezemo, mu by’ukuri ziramutse zidukundiye ni inzira y’ubukire twatangiye n’amafaranga yajyaga azitumizwamo hanze twayazigama."

Umukozi mu muryango Agritera ushinzwe iby’ubujyanama mu buhinzi Muramira Jean Remmy, yavuze ko igihingwa cya pome kigiye kugeragerezwa mu Rwanda ku buryo bw’umwuga, ari imbuto z’amoko ane ariyo Red delicious, Granny, Golden delcious na Gala kugira ngo bazarebe neza izizabasha kwera ku butaka bw’u Rwanda, gusa akemeza ko bagize amahirwe zose zikera byateza imbere ubukungu bw’igihugu n’umuhinzi ku giti cye.

Yagize ati "Mbere twabanje kugerageza igihingwa cy’inkeri kandi bigenda neza cyane, ubu turimo kugerageza igihingwa cya pome, aho twatumije ingemwe 2000 zaturutse mu Buholandi zibanguriye, ziri mu moko ane atandukanye, kugira ngo imwe yanze indi ikunde, tugize amahirwe zose zakunda, bigatuma kuba zabonekaga zihenze kubera gutumizwa hanze bigabanuka, izi mbuto zirimo kugeragerezwa mu Karere ka Gicumbi na Musanze kuko zikunda ahantu haba ikirere gihehereye, ariko bikunze twageragereza n’ahandi."

Umujyanama w’umunyamabanga wa Leta muri Minisiteri y’Ubuhinzi n’ubworozi, Peter Ntaganda yasabye aba bahinzi gufata neza izi mbuto no kubyaza umusaruro aya mahirwe bahawe.

Yagize ati "Iyo dutumiza ibintu byinshi mu mahanga aba ari igihombo ku gihugu, turi muri gahunda yo kugabanya ibitumizwayo tukongera ibijyayo, kuba pome igiye kugeragerezwa ku butaka bw’u Rwanda biramutse biduhiriye yaba ari amahirwe, icyo twibutsa abahinzi ni uko igihingwa ari nk’umwana muto ukeneye kwitabwaho."

"Turabasaba kwita kuri izi mbuto, mukabyaza umusaruro amahirwe mubonye, mu zikurikirane umunsi ku wundi, impuguke zadufashije muri iki gikorwa bazakomeza kubaba hafi, ku buryo iki gihingwa kidukundiye byadufasha kwagura ubu buhinzi hagatuburwa n’izindi nyinshi duhereye kuri izi nk’uko abahanga muri byo bemeza ko bishoboka."

Umuryango Agritera ukorera mu bihugu 23 bitandukanye ku Isi, harimo 13 byo muri Afurika harimo n’ u Rwanda, aho basanzwe bibanda cyane mu bikorwa by’ubuhinzi bw’birayi, ibigori, ingano, ubworozi bw’inka zitanga umukamo n’ibindi.

Kuri ubu batangiye kugerageza ubuhinzi burimo inkeri zamaze kwera kandi neza, bakaba batangiye kugerageza igihingwa cya pome mu Turere twa Musanze na Gicumbi, aho batumije ingemwe 2000 mu Buholandi zatangiye guhingwa muri utu Turere, zageze mu Rwanda zihagaze ku gaciro ka 4200000 Frw.

Abahinzi beretswe uko bahinga pome
Ingemwe za Pome zatewe zirimo amoko atandukanye
Abahinzi bishimiye iki gihingwa gishya
Izi ngemwe za pome zifite agaciro k'arenga miliyoni 4Frw
Musanze ni kamwe mu duce tugiye kugeragerezwamo ubu buhinzi kubera ikirere cyako gikonja
Umukozi muri Agritera ushinzwe iby'ubujyanama mu buhinzi Muramira Jean Remmy, yavuze ko bashaka kugerageza ubuhinzi bwa pome bw'umwuga mu Rwanda
Abahawe izi ngemwe za pome bazafashwa mu gukomeza kuzitaho

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .