Musanze: Hari abafite ubumuga badahabwa serivisi kubera kutagira amakarita abaranga

Yanditswe na N.Kubwimana Janvière
Kuya 31 Kanama 2020 saa 07:52
Yasuwe :
0 0

Abafite ubumuga bo mu Karere ka Musanze bagaragaza ko babangamiwe no kutabona amahirwe na serivisi z’ingenzi bagenerwa mu buzima bwabo kubera kutagira ibyangombwa bibaranga nk’amakarita.

Hashize hafi imyaka igera kuri itanu mu Karere ka Musanze hakozwe igikorwa cyo gushyira abafite ubumuga mu byiciro bitandukanye.

Icyo gihe abaganga bagiye bazenguruka ku mavuriro basuzuma abafite ubumuga kugira ngo bahabwe amakarita, gusa ngo hari abacikanywe n’iyi gahunda ndetse hakaba n’abavutse cyangwa bakamugara nyuma ari nabo biganje mu bagifite ibibazo byo kutagira amakarita.

Ubusanzwe amakarita y’abafite ubumuga atangirwa ku mirenge babarizwamo nyuma yo gusuzumwa bagasangwa bujuje ibisabwa.

Bamwe mu bafite ubumuga n’ababahagarariye bavuga ko ngo hashize igihe barabitanze ariko bakaba batarabona amakarita.

Nyirantezimana Liliane ufite ubumuga bw’amaguru yagize ati “Maze imyaka ibiri naragiye ku murenge gushaka ikarita bambwira ko bifotoza, narabikoze ariko n’ubu ntiraboneka. Ubu iyo hagize amahirwe aboneka agenerwa abafite ubumuga ntangeraho, hari n’inkunga y’amafaranga asohoka kuri BDF agenerwa abafite ubumuga nayo tukayabura kubera kutagira ayo makarita, mu by’ukuri turahadindirira badufashije yatugeraho vuba.’’

Mukabuduri Donatile yavuze ku mbogamizi aheruka kugira ubwo umwana we ufite uburwayi bwo mu mutwe yahanirwaga kutambara agapfukamunwa.

Yagize ati “Baherutse kumfatira umwana bamujyana muri stade kuko nta gapfukamunwa yari afite, kandi afite ubumuga bwo mu mutwe ajya aducika ntitumenye igihe yagendeye. Nagiye kubabwira ko arwaye mu mutwe bambaza ikibyemeza ndakibura, urumva ko kutagira amakarita hari aho bituma barenganywa. Ikindi nta nkunga n’imwe ibagenerwa ndabona kubera kutagira ikarita ye kandi sinishoboye.’’

Mu gushaka umuti w’iki kibazo Ihuriro ry’Abafite Ubumuga mu Rwanda, NUDOR ryatangiye ibiganiro n’Inama y’Igihugu y’Abafite Ubumuga mu kureba uburyo icyo kibazo cyakemuka.

Umukozi uhagarariye NUDOR ukurikirana gahunda zo kubitsa no kugurizanya, Vuningabo Emile, yagiriye inama abatarabona amakarita kwitwararika cyane mu bihe bya COVID-19, bubahiriza amabwiriza yo kwirinda iki cyorezo.

Umukozi w’Akarere ka Musanze ushinzwe kwinjiza abantu bafite Ubumuga muri Gahunda z’Igihugu, Uwitonze Hesron, yijeje gukora ubuvugizi abatarabona amakarita bakayahabwa.

Yagize ati “Icyo kibazo kirahari, gusa byari biteganyijwe ko muri uyu mwaka hazakorwa igikorwa cyo gushyira mu byiciro abafite ubumuga bagahabwa amakarita. Byaje gukomwa mu nkokora n’iki cyorezo, gusa turacyakora ubuvugizi ku rwego rw’igihugu cyane ko nabo babizi, barakiga uburyo byakorwa.’’

Yakomeje ati “Turanenga bikomeye abo amakarita yabo yasohotse ariko ntibayafate, akaba yaraheze ku mirenge yabo, nabo bitabire kuyafata.’’

Mu Karere ka Musanze habarurwa abarenga ibihumbi bitandatu bafite n’ubumuga butandukanye.

Mu nama iheruka kubahuza ku wa 27 Kanama 2020, bakanguriwe kugira uruhare rufatika mu kurwanya COVID-19.

Mu matsinda bakoreramo mu Mirenge ya Muhoza na Cyuve bahawe kandagira ukarabe n’amasabune yo gukaraba yabugenewe mu gikorwa cyagizwemo uruhare n’Ihuriro ry’Abafite Ubumuga mu Rwanda, NUDOR.

Abafite ubumuga n'ababahagarariye bakanguriwe kwirinda COVID-19, banahabwa kandagira ukarabe n'amasabune
Mu Karere ka Musanze hari abafite ubumuga badahabwa serivisi kubera kutagira amakarita abaranga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .