Musanze: Gitifu wa Kinigi yitabye urukiko, ahakana icyaha cyo gukubita no gukomeretsa

Yanditswe na N.Kubwimana Janvière
Kuya 16 Nyakanga 2020 saa 08:27
Yasuwe :
0 0

Umunyamabanga Nshingwabikorwa w’Umurenge wa Kinigi, Twagirimana Innocent na mugenzi we Habimana Jean Paul ukora irondo rya nijoro bashinjwa gukubita no gukomeretsa Munyaziboneye Phocas akavunika igufwa ry’ikibero, bitabye urukiko, baburana bahakana icyaha baregwa.

Ni urubanza rwabereye ku Rukiko Rwisumbuye rwa Musanze kuri uyu wa 16 Nyakanga 2020, aho baburanaga badafunzwe.

Nyuma yo gusomerwa imyirondoro yabo ngo bumve niba ihuye n’iyo batanze, bagasanga ariyo, basomewe icyaha baregwa cyo gukubita no gukomeretsa n’uburyo bagikozemo.

Icyaha kiregwamo Twagirimana Innocent na Habimana Jean Paul cyo gukubita no gukomeretsa Munyaziboneye Phocas wo mu Murenge wa Kinigi, Akagari ka Nyonirima, Umudugudu wa Butorwa ya Mbere, bivugwa ko yazizwaga kutubahiriza amabwiriza ya Guma mu rugo yariho icyo gihe, cyakozwe ku wa 11 Mata 2020 ku isaha ya saa 17:30 z’umugoroba, ubwo yari mu nzira aherekeje bagenzi be b’abanyeshuri bari bamusuye aribo Ndikumana Evode na Iradukunda Janvier.

Abaregwa bisobanuye ko batigeze bakora icyo cyaha ndetse banavuga ko abatangabuhamya ibyo bavuga ari ibinyoma.

Ku ruhande rwa Gitifu Twagirimana n’umwunganira bireguye bavuga ko koko uwo mwana yakomeretse ubwo bari muri gahunda yo kugenzura ishyirwa mu bikorwa rya Guma mu rugo.

Muri icyo gihe ngo Munyaziboneye na bagenzi be barababonye barabikanga bariruka ariko uyu mwana yikubita ku gishyitsi cy’inturusu cyari hafi aho aravunika.

Twagirimana avuga ko nta nkoni yigeze amukubita cyane ko nta mugambi mubi yari amufiteho, kandi ngo akimara kuvunika yahise ahamagaza imbangukiragutabara ngo imugeze kwa muganga, gusa iza gutinda hifashishwa indi modoka.

Habimana Jean Paul we yireguye avuga ko n’ubwo yari kumwe na Gitifu Twagirimana aba bana barimo Munyaziboneye wavunitse nyuma yo kubikanga bakiruka, we ngo ntiyigeze abakurikira aho birukaga bagana.

Yabwiye urukiko ko yasigaye aho nyuma ngo aza kumva Gitifu ahamagara imbangukiragutabara ngo igeze kwa muganga Munyaziboneye, ariko we ntiyigeze amenya uko byagenze.

Urukiko rwahaye ijambo umwunganizi w’abaregwa Me Bagabo Jean d’Amour wavuze avuga ko abo yunganira ari abere.

Ati “Mpereye kuri Gitifu Twagirimana Innocent nuko nyina w’umwana yavuze ko umuhungu we yakubiswe na Habimana Jean Paul, imvugo yaje kunyuranya n’iy’umuhungu we Munyaziboneye Phocas wavuze ko yakubiswe na Twagirimana Innocent na Habimana Jean Paul. Ubwabyo bigaragaza ko izo mvugo zivuguruzanya, bityo nta wajya gutanga ikirego atazi uwo arega.”

Me Bagabo yanabwiye urukiko ko abana bari kumwe na Munyaziboneye bamusuye mu buhamya na bo batanze batavuzemo Gitifu, ahubwo bavuzemo Jean Paul ariko imvugo yabo nayo yagaragaragamo gushidikanya bigaragaza ko nawe arengana.

Urukiko rumaze kumva abaregwa n’umwunganizi wabo, rwahaye ijambo Ubushinjacyaha maze buvuga ko imyiregurire yabo nta shingiro ifite kuko abatangabuhamya bemeza ko Habimana Jean Paul na Gitifu aribo bakubise Munyaziboneye kandi bakaba badashobora kubitiranya n’abandi kuko basanzwe babazi kandi ntacyo bapfa.

Ku mvugo ya Munyaziboneye Phocas na nyina, Ubushinjacyaha bwagaragarije urukiko ko zitavuguruzanya kuko umubyeyi wa Munyaziboneye Phocas ariwe witangiye ikirego ariko umwana akongeraho ko na Gitifu yamukubiseho nyuma yuko Habimana Jean Paul amukubise.

Urukiko rumaze kumva ibisobanuro by’impande zombi, rwafashe umwanzuro wo gutumiza uwakubiswe, abatangabuhamya bose na muganga wakiriye Munyaziboneye akigera ku Bitaro bya Ruhengeri, bakazaza mu rubanza rwimuriwe ku wa kabiri, tariki ya 21 Nyakanga 2020 saa Munani z’amanywa.

Urukiko Rwisumbuye rwa Musanze nirwo ruri kuburanisha Umunyamabanga Nshingwabikorwa w’Umurenge wa Kinigi, Twagirimana Innocent na mugenzi we Habimana Jean Paul ukora irondo rya nijoro bashinjwa gukubita no gukomeretsa Munyaziboneye Phocas akavunika igufwa ry’ikibero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .