Musanze: Baririye mu ruhame nyuma yo gufatanwa ibiyobyabwenge

Yanditswe na N.Kubwimana Janvière
Kuya 28 Ukwakira 2020 saa 08:54
Yasuwe :
0 0

Inzego z’umutekano mu Karere ka Musanze mu Murenge wa Muhoza, ku bufatanye n’abaturage zangije ibiyobyabwenge byafatiwe mu Mujyi wa Musanze no mu nkengero zaho, bifite agaciro gasaga miliyoni 6 Frw, ababifatanywe bicuza umwanya babitayemo basuka amarira.

Ni igikorwa cyabaye kuri uyu wa 28 Ukwakira 2020, ku bufatanye na Polisi, RIB, ingabo, ubuyobozi bw’Akarere ka Musanze, urubyiruko rw’abakorerabushake n’abaturage, aho ibyangijwe birimo ibicuruzwa bitandukanye byarengeje igihe nk’amata, umunyu, imitobe, kawunga, mayonnaise n’ibindi ndetse n’ibiyobyabwenge byiganjemo kanyanga (litiro 230), udupfunyika tw’urumogi (5,336), inzoga zo mu masashe 459 n’ibindi.

Bamwe mu bafungiwe ibyaha byo gukoresha, gutunda no gukwirakwiza ibiyobyabwenge, mu marira menshi bicujije umwanya bataye muri ibi bikorwa byatumye bafungwa, bavuga ko byabahaye isomo ryo kubicikaho burundu, banasaba abakibikora kubivamo kuko nta nyiturano y’icyiza bigira.

Nshimiyimana Jean Baptiste ukomoka mu Karere ka Burera, yagize ati "Nafunzwe kubera ibiyobyabwenge, nabanje kubinywa, nyuma nza guhamagarwa n’umuntu ansaba ko mwikorerera amasaka, baza kuyamfatana basanga muri uwo mufuka harimo kanyanga.”

“Ubu nasize umwana wanjye arwaye kanseri, kumuvuza ni ugupagasa, ibiyobyabwenge ntacyo byamariye, nta pantalo wakuramo, nta tungo, ubu ndi mu gahinda k’ibyo nakoze bitumye mfungwa, n’uwabitekerezaga abireke nta cyiza kibamo ni ingaruka mbi gusa."

Mutoni Claudette na we wafatanywe urumogi n’amarira menshi yavuze ko ibyo yakoze abyicuza, kuko icyo akuyemo ari ugufunwa, akagira inama abakibitekereza gushaka ikindi bakora cyabateza imbere kuko nta terambere ryo mu biyobyabwenge.

Yagize ati "Nafatanywe urumogi udupfunyika umunani, uburaya bwarananiye mpitamo gucuruza urumogi kuko bambwiraga ko habamo inyungu. Nta kintu nakuyemo usibye kuba ndi muri gereza, ubu nasize abana babiri umugabo yantanye. Ngiriwe imbabazi sinakongera gukora ikosa nk’iri, ababitekereza babireke bashake ibindi bakora kuko nta terambere ry’ibiyobyabwenge."

Umuyobozi w’Akarere ka Musanze, Nuwumuremyi Jeannine, yavuze ko bazakomeza gukorana n’inzego z’umutekano mu kurwanya abakoresha ibiyobyabwenge n’abacuruza ibintu byarengeje igihe, kuko byose byica ubuzima bw’ababikoresha.

Umuvugizi wa Polisi mu Ntara y’Amajyarugu, CIP Rugigana Alexis, yagarutse ku ngaruka ukoresha ibiyobyabwenge ahura nazo, zirimo gufungwa burundu, ibihombo bikurikirana n’ubukene mu miryango ndetse no kwangiza ubuzima.

Yagize ati "Icyo dusaba abaturage cyane mu Ntara yacu y’Amajyaruguru ni ugucika ku biyobyabwenge kuko bigira ingaruka ku bukungu bwabo, bikurikirwa n’ubukene mu miryango, ikindi banahombya igihugu kuko aya mafaranga babishoramo ntiyunguka kandi bakayakoresheje ibindi byunguka.”

“Ibiyobyabwenge bigira ingaruka nk’uburwayi bwo mu mutwe cyane ku rubyiruko, ari naho hava ihohoterwa. Icyo tubasaba ni ukubireka, ariko uzafatwa akoresha abana mu biyobyabwenge bo ibihano byabo ni ugufungwa burundu, ababyeyi barinde abana babo."

Ibiyobyabwenge n’ibindi bicuruzwa byarengeje igihe bifite agaciro ka 6, 172, 072 Frw, byafashwe mu mukwabu wateguwe mu Karere ka Musanze ahakorerwa ubucuruzi, hagamijwe kureba ibicuruzwa byarengeje igihe n’ibitujujuje ubuziranenge.

Hafashwe inzoga zitemewe, hanafatwa abacuruza n’abatwara ndetse n’abakoresha ibiyobyabwenge, mu gikorwa cyateguwe n’inzego z’umutekano n’ubuyobozi bw’akarere.

Inzego zitandukanye zagize uruhare mu gutwika ibiyobyabwenge byafatiwe mu baturage
Hangijwe urumogi udupfunyika turenga ibihumbi bitanu
Ibiyobyabwenge byangijwe byiganjemo inzoga z'inkorano za kanyanga
Ibi biyobyabwenge byatwikiwe mu ruhame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .