Musanze: Barasaba kudafatwa nk’abotsa igitutu ubuyobozi mu gihe bashakira umuturage ubutabera bunoze

Yanditswe na N.Kubwimana Janvière
Kuya 21 Nyakanga 2019 saa 02:41
Yasuwe :
0 0

Abakorera mu miryango idaharanira inyungu yita ku butabera n’uburenganzira bwa muntu, barasaba ubuyobozi bakorana nabwo kutabafata nk’ababotsa igitutu mu gihe bashaka gufasha abaturage kubona ubutabera bunoze.

Iki cyifuzo bagitanze kuri uyu wa 20 Nyakanga 2019, ubwo abagera kuri 30 bahabwaga amahugurwa ku bijyanye n’uko hakorwa ubuvugizi ku bibazo by’ingutu bibangamira imibereho myiza y’abaturage ariko bikozwe mu buryo bwa kinyamwuga.

Bamwe mu bakorera muri iyi miryango basaba ubuyobozi kujya bihutisha serivisi babaka ndetse bagasenyera umugozi umwe, aho gufatwa nk’abashaka guhangana na bo.

Umwe muri bo witwa Nikuze Dative avuga ko mu kazi bakora k’ubuvugizi no gutanga ubujyanama ku baturage bafite ibibazo bikomeye, hari ubwo bikorwa nabi kuko bose batize iby’amategeko, akaba ari yo mpamvu baba bakeneye amahugurwa.

Ati “Tunasaba ubuyobozi dukorana na bwo buri munsi kujya bihutisha serivisi tubaka, ndetse tugasenyera umugozi umwe aho gufatwa nk’abashaka guhangana nabo nk’uko hari abakibyumva gutyo”.

Umukozi mu mushinga wa Ihorere Munyarwanda Organization (IMRO), Mugisha Jules, avuga ko mu byo bakora mbere na mbere ari ugutanga amahugurwa ku bantu bakorera muri sosiyete sivile zitandukanye, kugira ngo bamenye neza uko bakora ubuvugizi bw’ibibazo bibangamiye abaturage.

Avuga ko ibi bagomba kubikora kinyamwuga, bakabanza kumva neza nyiri kibazo, bakamenya n’uko bagishyikiriza inzego zibishinzwe.

Ati “Ibyo dukora byose ntituba dushaka guhangana n’ubuyobozi cyangwa kubotsa igitutu ahubwo tuba dushaka gukorera hamwe dufasha umuturage kubona ubutabera bunoze”.

Umukozi w’Akarere ka Musanze ushinzwe imiyoborere myiza Kazungu Cyprien, asaba abakorera muri sosiyete sivile kujya babikora mu buryo bwa kinyamwuga.

Ati “Dukorana na Sosiyete sivile mu kazi kacu ka buri munsi, ntibikwiye ko hari umuyobozi wabafata nk’abamushyiraho igitutu mu gihe bafasha umuturage kubona ubutabera bunoze, kuko abasha kubaho neza iyo atekanye. Icyo tubasaba ni ukubikora mu buryo bwa kinyamwuga kugira ngo tubashe guhuriza hamwe mu kazi bakora”.

Biteganyijwe ko mu gihugu hose hazahugurwa abagera kuri 330 bakorera mu miryango idaharanira inyungu yita ku burenganzira bwa muntu itandukanye.

Iki gikorwa cyateguwe n’umuryango Ihorere Munyarwanda Organizatino (IMURO), kikazarangira bose basobanukiwe uko hakorwa ubuvugizi mu buryo bwa kinyamwuga.

Abakorera muri sosiyete sivile barasaba ubuyobozi ubufatanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza