00:00:00 IGIHE NETWORK KN KINYARWANDA EN ENGLISH FR FRANCAIS

Musanze: Abasirikare bakuru 23 bo mu bihugu 10 bari guhugurirwa kurinda abasivili

Yanditswe na Claude Bazatsinda
Kuya 15 August 2022 saa 04:43
Yasuwe :

Abasirikare 23 bakuru bo mu bihugu 10 byo muri Afurika bari guhabwa amahugurwa azabafasha gusangiza bagenzi babo ubumenyi bugamije kurinda abasivili.

Aya mahugurwa y’ibyumweru bibiri yatangiye ku wa 15 Kanama, azarangira ku wa 26 Kanama 2022. Ari kubera mu Kigo cy’Igihugu cy’Amahoro, Rwanda Peace Academy (RPA) i Nyakinama mu Karere ka Musanze.

Ni amahugurwa agamije kubongerera ubumenyi bwo kurinda abasivile no kwigisha abandi cyane cyane abajya mu butumwa bw’amahoro mu bice bitandukanye.

Yateguwe n’u Rwanda ku bufatanye na Leta Zunze Ubumwe za Amerika n’u Buholandi; yitabirwa n’abasirikare bakuru bo mu Bihugu bya Benin, Ghana, Niger, Rwanda, Sierra Leone, Sénégal, Tanzania, Togo, Uganda na Zambia.

Bamwe mu bayitabiriye bavuga ko biteze kuhungukira byinshi kandi ko bazayasangiza n’abandi bo mu bihugu baturukamo bagamije kubongerera ubumenyi bwo kurinda abasivili mu gihe cy’imvururu.

Lt Col Mbulo Briann Malenga wo muri Zambia, yagize ati “Aya mahugurwa nyitezeho byinshi kuko tuzahakura ubumenyi buzadufasha kurinda abasivili no kwigisha bagenzi bacu ku buryo na bo aho bazajya bazaba bazi kurinda abasivili. Nagiye mu butumwa bw’amahoro ariko hari aho usanga hakirimo icyuho kubera kudahuza ugasanga koko ubu bumenyi bukwiye kwigwa na benshi.’’

Lt Col Marcel Mbabazi wo mu Ngabo z’u Rwanda, na we yagize ati "N’ubundi twari dusanzwe dufite ubumenyi mu kurinda abasivili ariko ubu tugiye guhabwa buradufasha kurushaho kumva no guhuriza hamwe bidushyire ku rwego rwo kujya twigisha abandi baba bitegura kujya mu butumwa.”

Yavuze ko biteguye kuzatanga ubumenyi aho bikenewe kugira ngo umubare w’abafite ubumenyi mu kurinda abasivili wiyongere.

Umuyobozi wa Rwanda Peace Academy, Rtd Col Jill Rutaremara, yasabye abitabiriye amahugurwa gusangiza abandi ubumenyi.

Yagize ati “Aya mahugurwa azabagirira akamaro ubwabo kuko bazayakoresha mu mutumwa ariko bazayakoresha bigisha n’abandi mu bihugu byabo. Tuvuge nk’igihe bari mu butumwa baba bazi neza kumenya igihe bagomba gufata umwanzuro n’icyatuma bawufata kandi nibaba bari kwigisha mu bihugu baturutsemo bizatuma tutongera gutakaza ibyo twarakazaga dukeneye abarimu bo mu mahanga.’’

Ambasade y’u Rwanda mu Buholandi ivuga ko izakomeza gufatanya n’u Rwanda mu bikorwa bigamije kubungabunga no kugarura amahoro kuko rwagaragaje ubushake n’ubushobozi muri ibi bikorwa.

Abasirikare bitabiriye ayo mahugurwa ni abafite ipeti kuva kuri Lieutenant kugeza kuri Lieutenant Colonel bo mu bihugu 10 byo muri Afurika. Bazahugurwa n’impuguke mpuzamahanga zirimo izo mu Rwanda, Bangladesh, Vietnam na Pakistan.

Umuyobozi wa Rwanda Peace Academy, Rtd Col Jill Rutaremara, yasabye abitabiriye amahugurwa kuzasangiza abandi ubumenyi bazahakura
Abasirikare bakuru 23 bo mu bihugu 10 bari guhugurirwa kurinda abasivili mu Kigo cya Nyakinama i Musanze
Abasirikare bakuru bitabiriye amahugurwa y'ibyumweru bibiri mu Rwanda yo kurinda abasivili

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .