Musanze: Abanyamuryango ba FPR bahagurukiye ikibazo cy’ingo zisaga 10 000 zitagira ubwiherero

Yanditswe na N.Kubwimana Janvière
Kuya 29 Kanama 2019 saa 01:32
Yasuwe :
0 0

Abanyamuryango ba RPF Inkotanyi bo mu Karere ka Musanze by’umwihariko mu Murenge wa Muhoza, bahagurukiye ikibazo cy’imiryango isaga ibihumbi 10 itagira ubwiherero mu rwego rwo kurwanya umwanda.

Ni umwanzuro wemeranyijweho ku wa 28 Kanama 2019, mu gutangiza igikorwa cyo kubumba amatafari yo kubaka ubwo bwiherero n’inzu zisimbura izashaje.

Biteganyijwe ko iki gikorwa kizarangira habumbwe amatafari agera ku bihumbi 200.

Bamwe mu banyamuryango ba FPR Inkotanyi bavuga ko kuba hakiri abaturage bagitira ubwiherero ari ikibazo cyakurura umwanda.

Umukamisha Nema yagize ati “Kuba hakiri umuturage ugitira ubwiherero ni umugayo kuri twe kandi ni kimwe mu bibazo byakurura umwanda wateza indwara. Iyo ni yo mpamvu twafashe icyemezo cyo kubumba aya matafari kugira ngo duce burundu ikibazo cy’abatagira ubwiherero n’abatagira aho kuba.”

Mugenzi we Ndikumana Jonas we yavuze ko “Kuri njye umusanzu wo kubumba amatafari azafasha kubaka inzu n’ubwiherero bw’abatishoboye ni umusanzu ukomeye, hari ubwiherero bwinshi bwasenywe n’imvura nyishi yaguye ariko hari n’abatabugira, usibye kubumba amatafari tuzanabwubaka.”

Chairman w’Umuryango wa FPR Inkotanyi mu Murenge wa Muhoza, Nsabimana Emmanuel, yashimangiye ko iki gikorwa kigamije gushyigikira abatishoboye no kurwanya umwanda.

Yagize ati “Iki gikorwa cyatangijwe n’Akarere ka Musanze bituma natwe twumva ko tugomba gutanga umusanzu wo kubumba amatafari azifashishwa mu kubaka ubwo bwiherero n’inzu z’abatishoboye.’’

Mu Murenge wa Musanze habarurwa abaturage barenga 80 badafite ubwiherero.

Umuyobozi w’Akarere ka Musanze akaba na Chairman wa FPR Inkotanyi, Habyarimana Jean Damascène, yavuze ko akarere kihaye umwaka wo gukemura burundu ikibazo cy’abadafite ubwiherero.

Yagize ati “Igikorwa cyo kubumba amatafari yo kubaka inzu z’abatishoboye n’ubwiherero kiri muri gahunda y’akarere. Aho bikigaragara ko hari ubwiherero bwinshi butujuje ibisabwa n’abatabugira, abantu b’ingeri zitandukanye bagenda bitabira iki gikorwa; aho ni ho aba banyamuryango bafatiye igitekerezo.’’

Mu mihigo y’Akarere ka Musanze, kiyemeje ko umwaka w’ingengo y’imari wa 2019/2020 uzarangira imiryango yose ifite ubwiherero.

Mu Karere ka Musanze habarurwa imiryango 10 064 ifite ubwiherero butujuje ibisabwa burimo ubugomba gusenywa hakubakwa ubushya, mu gihe ingo 1069 nta bwiherero zigira.

Abanyamuryango ba FPR bo mu Murenge wa Muhoza ubwo bari mu gikorwa cyo kubumba amatafari azubaka ubwiherero n'inzu z'abatishoboye
Iki gikorwa kizasozwa hamaze kubumbwa amatafari ibihumbi 200
Abanyamuryango ba FPR Inkotanyi bahagurukiye ikibazo cy’abasaga 10 ooo batagira ubwiherero muri Musanze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza