Musanze: Abahinga tungurusumu barataka ibihombo baterwa no kutagira ubwanikiro bugezweho

Yanditswe na N.Kubwimana Janvière
Kuya 24 Ugushyingo 2019 saa 08:48
Yasuwe :
0 0

Abakorera ubuhinzi bwa tungurusumu mu Mirenge itandukanye yo mu Karere ka Musanze, barataka ibihombo baterwa no kutagira ubwanikiro bugezweho, aho ubu bazanika mu buryo bwa gakondo bigatuma zitakaza ubuziranenge.

Aba bahinzi ngo iyo bejeje umusaruro wabo bawanika mu buryo bwa gakondo, bifashishije amashitingi n’ibirago, bigatuma zimwe zibora izindi zikuma zaratakaje ubuziranenge bwifuzwa ku isoko, cyane iyo bazanika mu gihe cy’imvura.

Mpayimana Anaptali, umwe mu bahinzi ba Tungurusumu wo mu Murenge wa Gataraga, avuga ko kutagira ubwanikiro bibateza igihombo gikomeye aho muri tono yeza ibiro 300 bibora.

Ati “Tungurusumu ni igihingwa gitanga amafaranga menshi kandi gikunzwe, ariko kutagira ubwanikiro bwazo bugezweho bituma duhomba, muri toni nsarura ku mwero , ibiro 300 usanga byaraboze kubera kuzanika nabi, turasaba ko twabona ubwanikiro bwa kijyambere, umusaruro wacu ukajya ku isoko wujuje ubuziranenge”

Mukarugina Béatrice na we uhinga mu Murenge wa Busogo ati “Tubonye ubwanikiro bwa kijyambere byadufasha kuva mu bihombo duhura nabyo, nk’ubu mu biro 800 nejeje byumye 100 muri byo byaraboze, urumva ko ari igihombo”

Uhagarariye sosiyete y’ubucuruzi yita ku kuzamura agaciro ka tungurusumu ku isoko ryo mu Rwanda na mpuzamahanga, Bunani Martin, yavuze ko iki kibazo abahinzi bakigaragaje kenshi, ariko bagiye gutangira kubaka ubwanikiro umunani bugezweho.

Mu Murenge wa Gataraga ku ikubitiro batangiye kubwubaka, buzuzura muri Werurwe 2020, ubundi burindwi nabwo buzarangirana n’uwo mwaka, ndetse bakazanubaka n’uruganda rugezweho ruzatunganya tungurusumu zikorwamo imiti itandukanye, n’ibindi mu rwego rwo kuzongerera agaciro

Umukozi w’Akarere ka Musanze ukora mu Kigo cy’Igihugu gishinzwe ubuhinzi n’Ubworozi, sitasiyo ya Musanze Gafishi Martin, yavuze ko iki kibazo bakizi , gusa ngo hari abafatanyabikorwa batangiye kubafasha kugikemura.

Ati “Mu karere kacu hari abahinzi benshi bahinga tungurusumu, aho tubafasha kubona imbuto nziza n’ifumbire, bakeza neza, gusa ikibazo cyo kutagira ubwanikiro bakitugejejeho, ariko twabonye abafatanyabikorwa batangiye kubaka ubwo bwanikiro bugezweho ku buryo iki kibazo kizarangirana na 2020”

Mu Gihugu hose hari abahinzi ba tungurusumu bagera 14,500, akarere ka Musanze kihariye abahinzi 12,000 bari mu makoperative 11.

Abahinga tungurusumu i Musanze barasaba guhabwa ubwanikiro bugezweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza