Musanze: Ababyeyi batewe impungenge n’abana bigira mu mashuri ashaje kandi hari adakoreshwa

Yanditswe na N.Kubwimana Janvière
Kuya 7 Ugushyingo 2019 saa 10:26
Yasuwe :
0 0

Ababyeyi barerera mu ishuri ribanza rya Nkurura riherereye mu murenge wa Nkotsi mu karere ka Musanze, bahangayikishijwe n’uko abana babo bigira mu byumba by’amashuri bishaje cyane, nyamara ku ishuri ryisumbuye rya Nkurura begeranye hakiri ibyumba bishya bimaze imyaka itatu bifunzwe.

Mu mwaka wa 2017, nibwo ikigo cy’amashuri cya Nkurura cyagabanyijwemo ibice bibiri, abiga mu mashuri abanza batandukanywa n’abo muyisumbuye, aribwo abana bato boherejwe mu byumba bishaje, mu gihe ku rwunge rw’amashuri rwa Nkurura ho hasigaye ibyumba bitandatu bifunze imiryango kubera kubura abanyeshuri.

Ntirivakure Emmanuel ni umwe mu babyeyi barerera kuri iri shuri. We na bagenzi be bavuga ko bahangayikishijwe n’abana babo bigira mu mashuri ashaje nyamara hari andi akinze bagasaba ko yafungurwa abo bana bakayigiramo

Ati “Kugeza ubu abana bacu bigira mu bishuri bishaje, iyo imvura iguye baranyagirwa bagataha batose wagira ngo yaguye bari hanze, mbese iyo ikirere gihindutse natwe dutangira kwibaza ubuzima bw’abana bacu, turasaba ko bakingura biriya byumba bimaze imyaka n’imyaka byarubatsweho n’ibitagangurirwa, babifungure abana bacu babyigiremo”

Hakuziyaremye Pascal na we ati “ Iki kibazo twakigaragaje kuva kera, tugiye kubona tubona batangiye gusiza ikibanza ngo bubake amashuri mashya, byaba ari ugusesagura umutungo wa leta. Nibabanze babashyire muri biriya bifunze nihaba hato babone kubaka ibindi, kuko ntitwategereza ko biriya byuzura kandi abana bacu banyagirwa. Isaha n’isaha tuba dufite ubwoba ko yanabagwira”

Usibye kuba iki kibazo cyaragaragajwe cyane n’ababyeyi barerera muri iri shuri, n’abarimu bahigisha nabo bemeza ko ikibazo cyo kwigishiriza mu mashuri ashaje kibateye inkeke.

Umuyobozi w’Akarere ka Musanze, Nuwumuremyi Jeannine, yavuze ko hagiye gukorwa ibishoboka byose mu itangira ry’amashuri aba bana ntibongere kwigira muri aya mashuri ashaje

Ati “Kuva mu mwaka utaha mu itangira ry’amashuri, abana biga mu wa kane kugeza mu wa gatandatu mu mashuri abanza ya Nkurura bazazamuka bajye muri biriya byumba bifunze, hepfo hasigare abana bigira mu mashuri meza, nta mwana uzongera kwigira mu ishuri rishaje turizeza ababyeyi ko iki kibazo cyabonewe umuti urambye”

Urwunge rw’amashuri rwa Nkurura hari ibyumba 13, bitanu muri byo byigirwamo n’abana basaga 170,naho bitandatu bisigaye bikaba bimaze imyaka itatu bifunze kuko habuze abanyeshuri babyigamo.Mu ishuri ribanza rya Nkurura ho hagaragara umubare munini w’abana bagera kuri 900 bigira mu byumba icumi, bitandatu muri byo bikaba bishaje cyane.

Mu mwaka wa 2017, nibwo ikigo cy’amashuri cya Nkurura cyagabanyijwemo ibice bibiri, abiga mu mashuri abanza batandukanywa n’abo muyisumbuye, aribwo abana bato boherejwe mu byumba bishaje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza