00:00:00 IGIHE NETWORK KN KINYARWANDA EN ENGLISH FR FRANCAIS

Mukomereze aho: Guverinoma yijeje abarimu kubahora hafi

Yanditswe na Ntabareshya Jean de Dieu
Kuya 2 Ugushyingo 2022 saa 07:26
Yasuwe :

Minisitiri w’Intebe, Dr Edouard Ngirente, yagejeje ku barimu ubutumwa bwa Perezida Kagame wabagaragarije ko igihugu kizirikana umusanzu wabo mu iterambere ry’igihugu.

Yabitangaje ku munsi Mpuzamahanga wa Mwarimu wizihijwe kuri uyu wa Gatatu tariki 2 Ugushyingo 2022.

Minisitiri w’Intebe Dr Edouard Ngirente yagejeje ku barimu basaga ibihumbi birindwi bitabiriye ibi birori byabereye muri BK Arena ku rwego rw’Igihugu, ubutumwa bwa Perezida Paul Kagame.

Minisitiri w’Intebe, Dr Ngirente yabwiye abakora mu nzego z’uburezi ko Perezida wa Repubulika yamutumye ku barimu ko igihugu kizirikana umurimo bakora.

Ati “Nyakubahwa Perezida wa repubulika yifuje kubana namwe uyu munsi ariko kubera impamvu z’akazi kenshi n’izindi mpamvu ntabwo yabashije kuza ansaba kumuhagararira muri uyu muhango.”

Yakomeje agira ati “Ubutumwa bwe buri mu ijambo rimwe gusa, ni uko guverinoma y’u Rwanda ishyigikiye byimazeyo umwuga mukora akaba ariyo mpamvu dukomeza kubita abarezi n’ababyeyi mu gihugu cy’u Rwanda, mukomereze aho.”

Dr Ngirente yagaragaje ibyishimo aterwa no kuba uyu mwuga benshi mu bakomeye baragiye bawunyuramo.

Yakoresheje ijambo “Mwarimu yubahwe” bishimisha abitabiriye ibi birori mu buryo budasanzwe.

Minisitiri w’Intebe Dr Edouard Ngirente yasabye abarimu kurushaho kuba Intangarugero mu muryango Nyarwanda haba mu mwuga no mu buzima busanzwe.

Ati “Nongeye gusaba abarimu n’abarezi mwese kurangwa n’imyitwarire myiza kugira ngo mubere urugero rwiza abana mwigisha ariko n’aho munyura. Aho tunyura twese nk’abarimu abandi batureberaho, iyo mwarimu yitwara neza n’abandi bamureberaho ariko iyo yitwaye nabi byo bitanga isura mbi.”

Yagaragaje ko Guverinoma y’u Rwanda yifuza ko abarimu b’u Rwanda bagira imyitwarire myiza yaba ku munsi w’akazi cyangwa utari uwa kazi.

Ati “Kurangwa n’ikinyabupfura ukongeraho n’isuku. Isuku ikwiye kuturanga twese nk’abanyarwanda ihereye kuri mwarimu ikagera no kubana turera. Igihugu, ababyeyi, Umuryango Nyarwanda tubatezeho uruhare mu gutoza abana bacu iyo mico myiza iranga umunyarwanda.”

Yashimangiye umusanzu w’abarimu mu iterambere ry’u Rwanda yemeza ko buri kimwe cyose umuntu akora abikura ku kuba yarigishijwe na mwarimu haba mu ishuri cyangwa akigishwa by’igihe gito.

Ati “Icyo dusaba mwarimu harimo gutanga uburezi burimo siyansi zose zigishwa ariko harimo no gutanga uburere butuma umwana w’umunyarwanda akurana uburere butuma tuba abo turi bo.”

Yashimangiye ko kuba u Rwanda rufite intego yo kugira ubukungu bushingiye ku bumenyi, bitagerwaho bidahereye kuri mwarimu.

Minisitiri w’Uburezi, Dr Uwamariya Valentine, yongeye kwibutsa abarimu ko umurimo bakora ari umwuga ukomeye usaba kwitanga.

Ati “Turashima ubwitange abarimu bashyira mu kazi kabo, urebye ubwarimu ni umuhamagaro aho kuba akazi gasanzwe kandi tugenda tubona umusaruro uva mu bwitange bwanyu. Haracyari ibikenewe mu bijyanye no kuzamura ireme ry’uburezi, gukora tutiganda, gusuzuma ubumenyi abanyeshuri bafite, kwita ku isuku, gukorana n’ababyeyi turerera n’ibindi.”

Uyu munsi Mpuzamahanga usanze u Rwanda rufite abarimu basaga 5603 mu mashuri y’incuke, abarimu 63788 mu mashuri abanza , mu mashuri yisumbuye ya Leta n’afashwa nayo ni 29858, ibihumbi 7813 mu mashuri ya tekinike, ibihumbi 20 bigisha mu mashuri yigenga.

Muri ibi birori kandi hahembwe abarimu batanu babaye indashyikirwa ku rwego rw’igihugu mu guharanira ireme ry’uburezi no gutsindisha neza n’abandi batanu bakoresheje neza inguzanyo bahabwa n’umwarimu SACCO.

Minisitiri w'Intebe Dr Edouard Ngirente yasabye abarimu kurangwa n'ubupfura
Guverinoma yijeje abarimu gukomeza kubitaho no kubafasha kugira ngo akazi kabo kagende neza
Abarimu batanu bitwaye neza n'abakoranye neza n'Umwarimu Sacco bahembwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .