Muhumuza Richard yasubijwe mu Rukiko rw’Ikirenga

Yanditswe na Ishimwe Israel
Kuya 10 Werurwe 2020 saa 08:24
Yasuwe :
0 0

Perezida Paul Kagame yashyizeho abacamanza bashya barimo Muhumuza Richard wagizwe Umucamanza mu Rukiko rw’Ikirenga, avuye mu rw’Ubujurire yagiyeho mu 2018.

Izi mpinduka zatangajwe binyuze mu itangazo ryo kuri uyu wa 10 Werurwe 2020, ryaturutse mu Biro bya Minisitiri w’Intebe rivuga ko Perezida wa Repubulika Paul Kagame yashyizeho abacamanza bashya.

Muhumuza Richard wabaye mu bacamanza ba mbere b’Urukiko rw’Ubujurire mu 2018, yagizwe Umucamanza mu Rukiko rw’Ikirenga.

Muhumuza yasubijwe mu mwanya yahozemo kuko yasabiwe kuba Umucamanza mu Rukiko rw’Ikirenga mu Ukuboza 2016 avuye ku mwanya w’Umushinjacyaha ku rwego rw’Igihugu yagiyeho kuva muri Nzeri 2013, asimbuye Martin Ngoga wari watorewe kuba umudepite mu Nteko Ishinga Amategeko y’Umuryango w’Ibihugu by’Afurika y’Iburasirazuba (EALA).

Afite Impamyabumenyi mu by’Amategeko yakuye muri Kaminuza y’u Rwanda n’izindi mpamyabushobozi zitandukanye mu birebana n’amategeko.

Muhumuza yamaze imyaka 14 ari umushinjacyaha, aho yakoze mu nzego zitandukanye zirimo kuba yarabaye Umushinjacyaha mukuru wungirije w’urukiko rw’ubujurire rwa Ruhengeri na Nyanza.

Mu bandi bahawe imirimo harimo Nyirandabaruta Murorunkwere Agnes wagizwe Visi Perezida w’Urukiko rw’Ubujurire ndetse na Kamere Emmanuel na Umugwaneza Geraldine bagizwe abacamanza mu Rukiko rw’Ubujurire.

Itegeko ngenga rishyiraho Urukiko rw’Ubujurire ryasohotse mu igazeti ya Leta yo ku wa 30 Gicurasi 2018, aho rivuga ko ruri mu cyiciro cy’inkiko zisanzwe. Ni igisubizo cy’imanza zajuririrwaga mu Rukiko rw’Ikirenga zikamaramo imyaka myinshi zitaraburanishwa.

Urukiko ruri hagati y’urw’Ikirenga n’Urukiko Rukuru, ruzakira imanza zimaze hagati y’amezi atandatu n’umwaka umwe zarajuririwe mu Rukiko rw’Ikirenga.

Muhumuza Richard ubwo yarahiriraga kuba Umucamanza mu Rukiko rw'Ikirenga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza