Muhanga: Umuvuzi gakondo uvura mu buryo butemewe yatawe muri yombi

Yanditswe na Evariste Nsengimana
Kuya 21 Mutarama 2019 saa 03:54
Yasuwe :
0 0

Umuvuzi gakondo wo mu Karere ka Muhanga, yatawe muri yombi nyuma yo gusanga avurira abantu mu rugo rwe nta cyangombwa Minisiteri y’Ubuzima yabimuhereye.

Uyu muvuzi yatawe muri yombi nyuma y’uko ku wa 17 Mutarama 2019, itsinda rigizwe n’Ubuyobozi bw’Akarere ka Muhanga, Urwego rw’Igihugu rw’Ubugenzacyaha (RIB), Minisante n’abandi bamusuye mu rwego rwo gukurikirana ikibazo cy’uko avura mu buryo bunyuranyije n’amategeko.

Umuvugizi wa Minisiteri y’Ubuzima, Kayumba Malick, yabwiye IGIHE ko abagize iryo tsinda bafashe imyanzuro ivuga ko uwo muganga ashyikirizwa RIB kugira ngo akurikiranweho icyaha cyo gukora, gutanga no kugurisha ibintu bibujijwe mu buvuzi no kuvura nta burenganzira.

Iri tsinda ryanamusabye guhagarika ibikorwa byose by’ubuvuzi igihe cyose atarabona icyangombwa gitangwa na Minisiteri y’Ubuzima kimwemerera kubikora n’abarwayi bose yari acumbikiye, basabwa gusubira iwabo bakivuriza mu mavuriro yemewe na Leta.

Amakuru yizewe agera ku IGIHE ni uko mu rugo rw’uyu muvuzi gakondo bahasanze abarwayi 11 acumbikiye bagiyeyo kwivuza.

Umuvugizi wa RIB, Mbabazi Modeste, yabwiye IGIHE ko uyu muganga yahise atabwa muri yombi.

Ati “Turamufite, turimo turamukurikirana ari i Muhanga, uyu munsi ashobora gushyikirizwa ubushinjacyaha.”

Modeste yemeje ko abantu basanzwe mu rugo rwe ari abafite imyumvire idasobanutse, banga kujya kwivuza mu bavuzi bemewe, bakumva ko abavuzi gakondo banakora badafite uburenganzira, aribo babavura.

Ati “Igihari ni uko bahari kandi n’ubu hari abagifite imyumvire yo kujyayo kandi anafunze. Ahubwo mukwiye gutanga ubukangurambaga, umuntu niba arwaye ajye kwa muganga wemewe na Leta.”

Mbabazi yavuze ko iyo umuntu agiye kwivuza ku bavuzi gakondo batazwi ari kimwe no kwiyahura kuko ugize ikibazo n’uburyo bwo kugikurikirana buba bugoye.

Amabwiriza ya Minisiteri y’Ubuzima avuga ko umuntu wemerewe gukora nk’umuvuzi gakondo aba ari mu rugaga rubahuza kandi abifitiye n’icyangombwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza