Muhanga: Ntigurirwa wemeye ko yishe umugore we yakatiwe gufungwa burundu

Yanditswe na Akimana Jean de Dieu
Kuya 5 Werurwe 2021 saa 07:03
Yasuwe :
0 0

Ntigurirwa Daniel wo mu Kagari ka Kayonza, mu Murenge wa Kayenzi mu Karere ka Kamonyi uherutse kuburana yemera ko yishe umugore we ariko ntiyemere ko yamwicishije isuka yakatiwe gufungwa burundu.

Uyu mugabo yahawe iki gihano nyuma yo guhamwa n’Urukiko Rwisumbuye rwa Muhanga icyaha cyo kwica umugore we witwaga Uwimana Florence. Iki cyaha cyakozwe mu ijoro rishyira tariki ya 4 Gashyantare 2021.

Mu isomwa ry’uru rubanza ryabereye ku cyicaro cy’uru rukiko gusa uregwa yasomewe adahari.

Ni iki cyagendeweho Ntigurirwa akatirwa burundu?

Perezida w’Inteko Iburanisha yaburanishije uru rubanza, Kankindi Olive, yavuze ko urukiko rwahisemo gufata uyu mwanzuro rugendeye ku ngingo eshatu.

Yavuze ko kuba Ntigurirwa yarireguye yemera icyaha cyo kwica uwo bashakanye ariko ntasobanure neza uko yagikoze bitamugabanyiriza igihano.

Indi ngingo yashingiweho ni uburemere bw’icyaha yakoze n’ingaruka cyateje mu gihe yamburaga uwo bashakanye ubuzima.

Yongeyeho ko kumwica wari umugambi wizweho neza ndetse ugategurwa kuko yamwicishije isuka yo mu bwoko bwa rasoro akanayimutera inshuro nyinshi inyuma ku mutwe ndetse no mu gutwi bityo adakwiye kuvuga ko atabizi kandi yemera ko yamukubise inkoni bityo nta kintu akwiye kwitwaza ngo byaramugwiririye.

Ntigurirwa aburana yavugaga ko kwica umugore we byamugwiririye atari yabiteguye ari nayo mpamvu yatanze asaba ko igihano cyose yahabwa cyaba kigabanyije.

Uru rubanza rwasomewe mu ruhame saa Tanu za mu gitondo. Amakuru agera kuri IGIHE avuga ko Ntigurirwa Daniel ufungiye kuri Sitasiyo ya Polisi ya Kamonyi agomba guhita yoherezwa muri Gereza ya Muhanga aho azakorera igihano cye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .