Muhanga: Batanu barimo uruhinja rw’amezi ane, bagwiriwe n’ikirombe barapfa

Yanditswe na Prudence Kwizera
Kuya 7 Ugushyingo 2020 saa 09:17
Yasuwe :
0 0

Abantu batanu barimo uruhinja rw’amezi ane bo mu Murenge wa Muhanga mu Karere ka Muhanga, bagwiriwe n’ikirombe bahasiga ubuzima abandi babiri barakomereka.

Byabaye ku mugoroba wo kuri uyu wa Gatanu ahagana 18:30 mu mudugudu wa Agahabwa mu Kagari ka Nyamirama. Abapfuye ni abagabo babiri n’abakobwa babiri barimo umwe wari uherutse kubyarira iwabo uruhinja. Urwo ruhinja yari aruhetse bituma narwo ruhitanwa n’iyo mpanuka.

Amakuru atangwa na bamwe mu baturage bo muri ako gace, yavuze ko abo bantu bari bagiye kuvoma amazi yo kuyunguruza umucanga bakuramo amabuye y’agaciro, imvura ibaye nyinshi bajya kugama mu kirombe kirabagwira.

Umunyamabanga Nshingwabikorwa w’agateganyo w’Umurenge wa Muhanga, Byicaza Claude, yabwiye IGIHE ko abo bantu bitwikiriye imvura bakajya gucukura amabuye y’agaciro mu buryo butemewe ikirombe kirabagwira.

Yagize ati “Hari nka 18:30 ubwo imvura yagwaga barayitwikira bajya gucukura amabuye mu buryo butemewe, ikirombe kirabagwira. Hapfuye batanu naho abandi babiri bakomeretse.”

Yasabye abaturage kwirinda ibintu byose bishobora kubateza impanuka kandi bakajya bumvira inama bagirwa n’ubuyobozi.

Imirambo y’abapfuye yajyanywe ku Bitaro bya Kabgayi gukorerwa isuzuma ndetse n’umwe mu bakomeretse niho ari kuvurirwa mu gihe mugenzi we wakomoretse byoroheje ari kwitabwaho n’abaganga ku Kigo Nderabuzima cya Mata.

Icyo kirombe cyabagwiriye cyari kimaze igihe kidakoreshwa kuko sosiyete yagicukuragamo amabuye y’agaciro yari yarahagaritse imirimo.

Uyu mukingo ni wo wabagwiriye bugamye mu kirombe gihari
Uyu ni wo mugezi bivugwa ko bari bagiye kuvomamo amazi yo kuyunguruza umucanga bakuramo amabuye y’agaciro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .