Mudasobwa ngendanwa zishobora kubuzwa gutwarwa nk’imizigo mu ndege

Yanditswe na Mfitumukiza Moïse
Kuya 6 Ugushyingo 2017 saa 08:34
Yasuwe :
0 0

Akanama gashinzwe umutekano w’ingendo zo mu kirere kari kwiga ku itegeko rishobora kuzabuza abantu gushyira mudasobwa zabo ngendanwa mu mizigo itwarwa mu ndege hirindwa inkongi z’umuriro zishobora guterwa na zo.

Raporo iheruka gushyirwa hanze n’ako kanama, ivuga ko batiri z’izi mudasobwa zishobora guteza inkongi mu ndege mu gihe zashyushye cyane ndetse bikaba byagorana ko ibikoresho bizimya inkongi mu ndege byahangana n’uwo muriro.

Biteganyijwe ko muri uku kwezi hazafatwa umwanzuro kuri iki kibazo mu nama y’Ikigo mpuzamahanga cy’iby’indege za gisivili.

Icyakora n’iyo byakwemezwa ko zikurwa mu mizigo, ishyirwa mu bikorwa ryabyo rizajya rishingira ku mahitamo y’ibihugu nkuko CNN yabitangaje.

Ikigo gishinzwe indege muri Leta Zunze Ubumwe za Amerika (FAA) cyirinze kugira ibyo gitangaza kuri iyi gahunda, gusa kigaragara ku rutonde rw’abashyigikiye ko izi mudasobwa zakurwa mu mizigo igenda mu ndege.

Muri raporo iki kigo cyashyize ahagaragara, cyavuze ko igiteye ubwoba cyane ku gutwara mudasobwa mu mizigo, ari uko inkongi yatezwa nazo ishobora kugera ku rwego rukabije abayoboye indege bataratahura ko yafashwe n’umuriro. Icyakora FAA ivuga ko atari abantu benshi batwara mudasobwa zabo ahagenewe imizigo mu ndege ahubwo benshi ngo bahitamo kugumana nazo mu myanya yagenewe abagenzi.

Mu ntangiriro z’uyu mwaka Ikigo gishinzwe umutekano w’imbere mu gihugu muri Amerika cyabujije hamwe na hamwe ko abagenzi bagumana mudasobwa zabo ahagenewe kwicarwa, batinya ko zishobora kwifashishwa n’ibyihebe bigategamo ibisasu.Ibyo byatumye benshi mu bagenzi bahitamo kujya bazitwara ahagenewe imizigo.

Icyakora iryo tegeko ryaje kuvanwaho nyuma gushyiraho uburyo bushya bwo gusaka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza