00:00:00 IGIHE NETWORK KN KINYARWANDA EN ENGLISH FR FRANCAIS

Mu Rwanda hatangijwe gahunda igamije gushishikariza abahinzi kwifashisha amakuru atangwa n’ibyogajuru

Yanditswe na Igizeneza Jean Désiré
Kuya 7 Ukuboza 2022 saa 01:31
Yasuwe :

Ikigo gitunganya amafoto y’ibyogajuru ’Digital Earth Africa: DE-Africa’ cyatangije mu Rwanda gahunda igamije gushishikariza abahinzi kwifashisha amakuru atangwa n’ibyogajuru mu kongera umusaruro, binyuze kumenya amakuru y’impamo ajyanye n’ibihingwa ndetse n’ibibazo bihura nabyo.

Ni gahunda yatangjijwe ku bufatanye Ihuriro ry’abongerera ubushobozi ubushakashatsi muri Afurika y’i Burasirazuba no Hagati , ASARECA mu ntego yo kurushaho kwihaza mu biribwa ku batuye umugabane wa Afurika.

Umushinga uzakorera mu bihugu bitanu birimo u Rwanda, Uganda, Ethiopia, Botswana na Afurika y’Epfo aho kugeza ubu muri Botswana na Uganda wamaze gutangizwa hakaba hari hatahiwe u Rwanda.

Mu muhango wo guwutangiza wabaye kuri uyu wa Kabiri tariki ya 06 Ukuboza 2022 Umwarimu muri Kaminuza y’u Rwanda, unakora muri Digital Earth Africa, Tuyishimire Joseph yavuze ko amakuru ajyanye n’ubuhinzi cyane cyane atangwa n’ibyogajuru kugeza ubu akoreshwa n’abantu bake.

Yasobanuye ko impamvu ari uko baba badasobanukiwe neza n’uko amafoto y’ibyogajuru atunganywa, kutagira ibikoresho bihagije nka mudasobwa ndetse na murandasi nke ituma batagera kuri ayo mafoto ku buryo bworoshye.

Ati "Icyo dukora turayatunganya tukayashyira mu bubiko bwacu ku buryo buri wese ashobora kuyagiraho uburenganzira nta kiguzi akamufasha kunoza igenamigambi rye neza."

Byitezweho ko aya makuru aramutse akoreshejwe neza yafasha urwego rw’ubuhinzi muri Afurika gutera imbere kuko afasha mu kugaragaza ibibazo ibihingwa bihura nabyo bigakosoka rugikubita bityo umusaruro ukiyongera.

Mu gutangiza uyu mushinga hahuguwe abafatanyabikorwa batandukanye barimo n’abahinzi, basabwa gukoresha aya makuru mu gihe babona atari kubafasha akaba yakongererwa ireme, kuko iyo ubuhinzi bugenze nabi ari bo ba mbere bahura n’ibibazo.

Umwe mu bahuguwe ku bijyanye n’uko aya makuru akoreshwa, Hitimana Janvier yavuze ko uyu mushinga uzabafasha mu kumenya uko ubuhinzi bwabo buhagaze, ibizabafasha kongera umusaruro no guteza imbere ubuhinzi.

Ati "Bizadufasha kubona amakuru ku buhinzi bukorewe ahantu hanini mu gihe gito, bidasabye umuntu wese ko agera mu murima we ngo afotore kuko icyogajuru gifata ishusho icyarimwe, amakuru akaboneka vuba, umuhinzi akamenya icyo gukora kare."

Ikigo gishinzwe Iterambere ry’Ubuhinzi n’Ubworozi, RAB ni kimwe mu bigo bya za leta icumi biteza imbere ubuhinzi n’ubworozi byagize uruhare mu gushinga ASARECA mu 1994, aho kugeza ubu ibi bigo bimaze kuba 14.

Umuyobozi wa RAB, Dr Karangwa Patrick yavuze ko uyu mushinga uzafasha mu guhangana n’ibibazo bituma umusaruro w’ubuhinzi uba muke birimo ihindagurika ry’ibihe, ubushyuhe bukabije, imvura nke imyuzure ndetse n’amapfa.

Ati "Nko kuva mu 2018 ibibazo bijyanye n’ihindagurika ry’ibihe byahombeje u Rwanda arenga miliyoni 200$ bijyanye n’ibyangirijwe birimo ibikorwaremezo, ibihingwa, amatungo ndetse n’ibindi bihombo."

Yashimangiye ko iyi gahunda izafasha mu guhangana n’ibi bibazo aho binyuze mu kureba uko Isi imeze bizafasha abahinzi kumenya igihe bahingira, ibizagira uruhare mu gutuma Afurika n’Isi muri rusange byihaza mu biribwa.

Yashimiye DE-Africa na ASARECA kuba batangije ibikorwa by’uyu mushinga mu Rwanda, yemeza ko ari amahirwe abo mu buhinzi n’ubworozi bagize mu guhangana n’ibibazo bibangamira ubuhinzi binyuze mu gukoresha neza amakuru bazajya bakura ku byogajuru.

Byitezwe ko mu ntangiriro uyu mushinga uzatwara ibihumbi 500$ mu gihe cy’umwaka, amakuru azajya anabikwa mu buryo bw’igihe kirekire aho uwazayakenera no mu bihe bizaza yajya ayabona ku buryo bworoshye.

Digital Earth Africa ni ikigo cyatangijwe mu 2019 na Australia binyuze mu kigo cyayo gishinzwe ubumenyi bw’isi.

Kugeza ubu cyimuriwe muri Afurika y’Epfo aho gitunganya amafoto y’ibyogajuru agakoreshwa mu buhinzi, kurwanya ibiza, gukurikirana uko inyanja isatira imigabane n’ibindi.

Umwarimu muri Kaminuza y’u Rwanda, unakora muri Digital Earth Africa, Tuyishimire Joseph yavuze ko amakuru ajyanye n’ubuhinzi cyane cyane atangwa n’ibyogajuru kugeza ubu akoreshwa n’abantu bake
Gahunda yo gukoresha amakuru aturutse ku byogajuru yatangijwe mu Rwanda yitezweho kongera umusaruro w'ubuhinzi
Mu gutangiza iyi gahunda abo mu buhinzi n'ubworozi bahuguwe ku bijyanye n'uko amakuru yatanzwe n'ibyogajuru akoreshwa mu kongera umusaruro w'ubuhinzi
Ni gahunda yitezweho gufasha Afurika kwihaza mu biribwa binyuze mu guteza imbere ibikorwa by'ubuhinzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .