00:00:00 IGIHE NETWORK KN KINYARWANDA EN ENGLISH FR FRANCAIS

FARDC yakajije umurego mu gutera icyuhagiro FDLR

Yanditswe na Musangwa Arthur
Kuya 4 June 2022 saa 10:27
Yasuwe :

Igisirikare cya Repubulika Iharanira Demokarasi ya Congo (FARDC) cyateye icyuhagiro umutwe w’iterabwoba wa FDLR kivuga ko udateye ikibazo ku Rwanda kuko abawugize ari abantu baba bishakira ibyo kurya gusa.

Aya magambo y’umuvugizi w’igisirikare cya RDC, Gen Maj Léon-Richard Kasonga, akurikiye impungenge z’u Rwanda z’ubufatanye bwa gisirikare bwa FARDC na FDLR mu kurwanya M23, aho rwibutsa ko uyu mutwe ugizwe ahanini n’abahekuye u Rwanda utahwemye guteza akaga abaturage mu Burasirazuba bwa Congo n’umutekano muke mu karere.

FDLR yahawe impuzankano ya gisirikare ya FARDC, abarwanyi bayo akaba ari bo bashyirwa imbere mu mirwano. FDLR ifite gahunda yo kugira ngo igere ku Mupaka w’u Rwanda noneho ibashe kiwnjira no gukora iterabwoba ryayo ku Rwanda.

Gen Kasonga yumvikanishaga ko ibyo u Rwanda ruvuga ko rubangamiwe na FDLR ari ukwitatsa kuko yatsinzwe n’abasigaye ari bake mu buryo bwose nta muntu bashobora guhungabanyiriza umutekano yewe n’uw’aho bakomoka [mu Rwanda].

Mu magambo ye ati "Mu biro byanjye mfite dosiye, urafungura ubonemo dosiye ndende ivuga kuri FDLR ariko nta gitero na kimwe uri bubone cyagabwe ku Rwanda, yewe n’umunsi n’umwe. Uyu mutwe twarawutsinze."

Muri make, FARDC yambaye umwambaro w’uwahoze ari Perezida wa Tanzania, Jakaya Kikwete, wari warabyaye muri batisimu FDLR kugera ubwo atinyuka agasaba u Rwanda kugirana na yo ibiganiro yirengagije miliyoni y’abatutsi bamwe mu bawugize basize bishe.

Byari muri Gicurasi 2013, ubwo hizihizwaga isabakuru y’imyaka 50 Umuryango w’Ubumwe bw’Afurika wari umaze ushinzwe. Perezida Kikwete agendeye ku bibazo by’umutekano muke mu Burasirazuba bwa RDC byari byakamejeje, yavuze ko mu byatuma haboneka amahoro arambye harimo ko u Rwanda rwajya mu biganiro n’umutwe wa FDLR.

Mu gushimangira igitekerezo cye, Perezida Kikwete kandi yavuze ko RDC iramutse iganiriye n’inyeshyamba za M23 ariko u Rwanda ntiruganire n’umutwe wa FDLR ntacyagerwaho.

Ni amagambo yamaganiwe kure n’u Rwanda. Uwari Minisitiri w’Ububanyi n’amahanga, Louise Mushikiwabo, yabwiye RFI ko asanga nta gitangaza kirimo kuba hari abasaba u Rwanda barimo n’abayobozi kuganira n’umutwe wa FDLR ariko abo basa nk’abatazi ibyo bavuga.

Yagize ati "Urabizi, FDLR ni itsinda ry’abakoze Jenoside. Ni abantu bahunze igihugu bamaze guhitana ubuzima bw’Abanyarwanda bagera kuri Miliyoni. Ntabwo byadutangaza kuko hari benshi bavugira FDLR. Hari abayiri inyuma bashyigikiye n’ingengabitekerezo yayo. Mu Rwanda twahagaritse Jenoside ariko ntabwo twahagaritse uburyo abantu batekerezamo. Hari abagifite amarangamutima mu baturanyi bacu n’abatuye kure y’u Rwanda".

Mushikiwabo yakomeje agira ati "Ntitwatekerezaga ko yasaba u Rwanda kwicarana n’umutwe wa FDLR ... Abatekereza ko u Rwanda rwakwicara ku meza y’ibiganiro na FDLR ntibazi icyo bavuga".

Amagambo y’Umuvugizi wa FARDC, yumvikanisha ko FDLR itagihari ndetse itakiri mu bibazo bihangayikishije. Ibi bitandukanye n’ibiherutse gutangazwa na Perezida Kagame muri Gashyantare uyu mwaka ubwo yari amaze kwakira indahiro z’abaminisitiri bashya.

Ati: "Ibya RDC na byo turabikurikirana, turabikurikiranira hafi. Umwanzi wacu umaze imyaka irenga cyangwa igera kuri 25 aracyahari."

Perezida Kagame yavuze ko impamvu FDLR ikomeje kwidegembya mu mashyamba ya Congo ari uko ibikorwa byitwa ko byashyizweho bigamije kuyirwanya bisa n’aho ari byo byareze ikibazo cyayo kigakomeza gukura.

Umwe mu basesenguzi yabwiye IGIHE ko igikorwa giherutse kuba cyo gushimuta abasirikare babiri b’u Rwanda ari ikindi gihamya cy’uko FARDC ikorana na FDLR.

FDLR ni umutwe urimo benshi basize bakoze Jenoside washyizwe ku rutonde rw’imitwe y’iterabwoba na Leta Zunze Ubumwe z’Amerika, ushinjwa guhungabanya umutekano mu Burasirazuba bwa Congo aho uvugwaho kwica abantu, kwambura, gufata abagore n’abakobwa ku ngufu n’ibindi byaha byibasira inyokomuntu.

Umubano wa FDLR na FARDC si uwa none

Umubano wa FARDC na FDLR ufite imizi kuri Mobutu wakiriye abayigize muri RDC akabaha intwaro n’imyitozo kugira ngo bazatere u Rwanda bari barahunze nyuma yo gukora Jenoside.

Perezida Laurent Désiré Kabila na we yanywanye na yo nyuma yo kwigiza ku ruhande abamufashije kujya ku butegetsi biganjemo abanye-Congo bavuga Ikinyarwanda. Umuhungu we Joseph Kabila na we ntiyatanzwe.

Gen. Maj. Paul Rwarakabije wayoboye umutwe wa FDLR akaza kwitandukanya na wo yagize ati "Byageze aho rero noneho Kabila [Joseph], uriya uherutse kuva ku butegetsi vuba, yakoze ku buryo afasha FDLR yafataga mu ngabo ze amasasu n’imbunda agakora ku buryo abizana n’indege, icyo gihe nibuka ko babimanuraga mu mitaka, mu ishamba aho twabaga turi, ari i Masisi ari i Walikale, aho twabaga turi niho babijugunyaga.”

Tshisekedi akigera ku butegetsi yazanye amashagaga mu kurwanya imitwe yitwaje intwaro mu Burasirazuba bwa RDC. Ni bwo hishwe Gen Sylvestre Mudacumura wayobora FDLR n’abandi bayobozi muri uyu mutwe n’iyindi yawiyomoyeho.

Kuri ubu, Tshisekedi watitije FDLR ageze aho yiyunga na yo ku buryo yemeye kuyiha imyambaro y’igisirikare cy’igihugu ngo ihangane n’abarwanyi ba M23.

Gen Maj Léon-Richard Kasonga avuga ko FDLR nta kibazo iteye umutekano w'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .