00:00:00 IGIHE NETWORK KN KINYARWANDA EN ENGLISH FR FRANCAIS

MTN Rwanda yasabanye n’abakiliya b’i Huye, ibizeza serivisi nziza

Yanditswe na Prudence Kwizera
Kuya 2 September 2022 saa 09:08
Yasuwe :

Abayobozi n’abakozi b’ikigo gitanga serivisi z’itumanaho, MTN Rwanda, basabanye n’abakiliya barimo abantu ku giti cyabo n’ibigo bya Leta mu Karere ka Huye, hagamijwe kungurana ibitekerezo no kurushaho kunoza ubufatanye.

Ni igikorwa cyabaye ku mugoroba wo kuri uyu wa Kane, tariki ya 1 Nzeri 2022.

Umuyobozi w’ishami rishinzwe abakiliya banini n’ibigo bya Leta muri MTN Rwanda, Aimable Kabanda, yavuze ko iyo gahunda bayigize ngarukamwaka mu rwego rwo kwegera abakiliya.

Ati "Tubasanga mu turere no mu ntara mu rwego rwo kubereka ibicuruzwa bishya tuba twashyize ku isoko, ndetse no kumva ibitekerezo byabo, aho bitagenda neza, hari ikibazo, bikadufasha kubikosora."

Muri iyo gahunda, hiyongeraho no gufasha abatishoboye mu rwego rwo guteza imbere imibereho yabo.

Yakomeje ati "Nk’uyu munsi twagiye ku kigo nderabuzima hano mu Matyazo twifatanya n’ababyeyi baherutse kuhabyarira, tubaha ibikoresho by’isuku birimo amasabune n’ibindi, ndetse hari n’aho tugera twakoranye n’Akarere tukishyurira abaturage umusanzu w’ubwisungane mu kwivuza."

Ibyo ngo bikorwa mu nyungu MTN yabonye ku mwaka, aho bafata 1% bakayikoresha mu bikorwa biteza imbere imibereho y’abaturage birimo uburezi, ubuzima n’ibindi.

By’umwihariko, Kabanda yasabye abakiliya kurushaho gukoresha uburyo bwo guhererekanya amafaranga kuri telefoni (mobile money), mu rwego rwo kwirinda ibibazo bashobora guhura nabyo batwaye amafaranga mu ntoki.

Bijyanye kandi na gahunda ya Leta yo kubaka ubukungu budashingiye ku guhererekanya amafaranga mu ntoki.

Mu byifuzo byatanzwe n’abakiriya ba MTN Rwanda, harimo kongera iminara ku buryo umurongo wayo udacika, kongera imbaraga za interineti no kunoza serivisi itanga muri rusange.

Basabye kandi ko MTN yagabanya ibiciro byo guhererekanya amafaranga ndetse n’ibya interineti.

Akariza Liliane yagize ati "Ibiciro byo kohereza amafaranga kuri mobile money hari ukuntu biba biri hejuru, ndetse n’ibyo guhamagara. Ibyo byose twabibagaragarije kugira ngo babyigeho, babikemure. Icya interineti nacyo twakibagejejeho kugira ngo bayongerere imbaraga kandi bagabanye ibiciro kuko irahenze."

Umuyobozi w’Urugaga rw’Abikorera mu Karere ka Huye, Butera Bagabe Gervais, yashimye igikorwa MTN Rwanda yakoze, avuga ko bacyitezeho kurushaho kunoza ubufatanye.

Na we yasabye ko bongera iminara kugira ngo itumanaho rigende neza kurushaho, kandi bagabanye ibiciro.

Ati "Iyo ufashe amafaranga yawe uyavana kuri MTN uyashyira kuri konti y’umuntu muri banki, baguca amafaranga menshi. Wenda ntabwo tuvuze ngo bibe ubuntu, ariko byaba byiza bagabanyije ikiguzi kuko byatuma abantu benshi babyitabira."

MTN Rwanda yijeje ko ibyifuzo n’ibitekerezo byatanzwe bigiye kwigwaho, kugira ngo hafatwe umwanzuro.

MTN Rwanda yageze i Huye nyuma y’uko mu minsi ishize yaganiriye n’abakiriya bayo mu turere twa Musanze na Rwamagana.

Mu gusoza icyo gikorwa, hafashwe ifoto y'urwibutso
Abakozi ba MTN Rwanda biyemeje kurushaho gukora cyane mu nyungu z'abakiliya
Abakozi ba MTN Rwanda basabwe gukomeza gutanga serivisi nziza ku bakiliya
Umuyobozi w’Urugaga rw’Abikorera mu Karere ka Huye, Butera Bagabe Gervais (ibumoso) yahawe impano na MTN Rwanda
Umuyobozi w'Akarere ka Huye, Sebutege Ange (ibumoso) yahawe impano na MTN Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .