MTN Rwanda yahawe icyemezo mpuzamahanga cya GSMA Mobile Money

Yanditswe na Uwimana Abraham
Kuya 21 Ukwakira 2020 saa 10:39
Yasuwe :
0 0

MTN Rwanda yabaye ikigo cya mbere mu gihugu cyahawe icyemezo mpuzamahanga gihabwa sosiyete zizewe mu gutanga serivisi zo guhererekanya amafaranga kuri telefoni kizwi nka “GSMA Mobile Money Certification”.

GSMA Mobile Money Certification yatangiye muri Mata 2018, ni igikorwa mpuzamahanga kiba kigamije gukora igenzura ryigenga ku bigo bitanga serivisi z’ihererekanya ry’amafaranga ryo kuri telefoni (mobile money), kugira ngo harebwe ubushobozi bwabyo mu gutanga serivisi zizewe kandi zitekanye, kurinda uburenganzira bw’abakiliya no kurwanya ubujura bw’amafaranga mu buryo butandukanye.

Ibi byose bipimwa hashingiye ku buryo bunoze izi serivisi zikwiye gutangwamo, kandi igipimo cy’uwatsinze kugira ngo ayihabwe, kiba kigomba kuba amanota 100%.

Umuyobozi Mukuru wa MTN, Mitwa Ng’ambi, yavuze ko bishimiye icyemezo mpuzamahanga MTN Rwanda yabonye, yizeza ko bazakomeza gukora ibishoboka byose ngo banoze ibyo bakorera abakiliya babo.

Yagize ati “GSMA Mobile Money Certification ni icyemezo mpuzamahanga kigamije gutuma serivisi z’imari zihabwa amagana y’abakoresha Mobile Money ziba zitekanye, zikorera mu mucyo, kandi zizewe. MTN Rwanda yishimiye kuba imwe muri zo, mu gihe dukomeje gufasha abakiliya bacu kugira amakuru aruseho abafasha mu gihe bafata ibyemezo bigendanye na serivisi z’imari.”

Umuyobozi ushinzwe Ubucuruzi muri MTN, Kagame Chantal, yavuze ko mu myaka icumi ishize MTN yagiye yongera imbaraga mu ikoranabuhunga mu kugendana n’icyerekezo cy’igihugu cya 2020 ndetse no muri gahunda igihugu cyihaye yo kugera ku iterambere ryifashisha ikoranabuhanga mu guhererekanya amafaranga.

Yagize ati “Uyu mwaka turizihiza imyaka icumi yo korohereza Abanyarwanda kugerwaho na serivisi z’imari hifashishijwe Mobile Money. Aya ni amateka akomeye haba kuri MTN no ku bakiliya bacu, iki cyemezo kizatuma turushaho guha serivisi nziza abakiliya bacu, kandi bitume batekana kuko bazaba bahabwa serivisi zizira amakemwa.”

Kugira ngo abatanga serivisi za Mobile Money bahabwe iki cyemezo, basuzumwa hagendewe ku bintu byinshi birimo kurinda amafaranga y’abakiliya ibyayahungabanya cyangwa ibihombo, kurwanya ubujura bw’amafaranga, iterabwoba rishingiye ku mafaranga, harebwa kandi ubuyobozi aba-agents n’abahabwa serivisi.

Mu bindi byitabwaho harimo igiciro cy’itumanaho, ubunyangamugayo mu guha abaturage amakuru, gukemura neza ibibazo n’ibyifuzo by’abakiliya no kurinda umutekano w’amakuru bwite y’abakiliya.

Umuyobozi ushinzwe Ubugenzuzi muri GSMA yashimiye MTN Rwanda ku bwo kugera kuri uru rwego ndashyikirwa.

Yagize ati “GSMA Mobile Money Certification igera ku bakiliya barenga miliyoni 210 binyuze muri sosiyete zifite iki cyemezo. Twahanitse ku bushake ibigenderwaho kugira ngo sosiyete ihabwe iki cyemezo, kugira ngo bitume hakazwa umutekano n’uburinzi bw’amafaranga y’abakiliya.”

Yongeyeho ati “Turashimira cyane MTN Rwanda kuba ibaye iya mbere mu gihugu iteye iyi ntambwe.”

MTN yatangiye gukorera mu Rwanda mu 1998 itanga serivisi zo guhamagarana no kwandikirana ubutumwa bugufi, yagiye yongera serivisi itanga yongeramo iza internet, guhererekanya amafaranga n’izindi.

Kugeza ubu MTN igera mu gihugu hose ku kigero cya 99%, ikaba ikoreshwa n’abasaga miliyoni enye.

Umuyobozi Mukuru wa MTN, Mitwa Ng’ambi, yavuze ko bishimiye cyane icyemezo bahawe, yizeza abakiliya kuguma kubaha serivisi zinoze
MTN Rwanda yahawe icyemezo gikomeye ku isi mu bihabwa ibigo bitanga serivisi za Mobile Money, GSMA Mobile Money Certificate

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .