00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri w’Ububanyi n’Amahanga wungirije wa Repubulika ya Czech yasuye u Rwanda

Yanditswe na M. M.
Kuya 24 Nyakanga 2016 saa 09:56
Yasuwe :

Minisitiri w’Ububanyi n’Amahanga wungirije wa Repubulika ya Czech, Martin Tlapa, yagiriye uruzinduko mu Rwanda mu rwego rwo gutsura umubano hagati y’ibihugu byombi.

Muri uru ruzinduko rugufi yagiriye mu Rwanda, tariki 21 Nyakanga 2016 Martin Tlapa yagiranye umubano n’Umunyamabanga Uhoraho muri Minisiteri y’Ubucuruzi n’Inganda, Emmanuel Hategeka, bombi bemeranya ko ibihugu byombi bigiye kongera imbagara mu myiteguro yo gusinya amasezerano y’ubufatanye mu koroshya ubuhahirane ndetse no guteza imbere ishoramari.

Martin Tlapa yishimiye iterambere ndetse n’impinduka zabaye mu Rwanda nyuma ya Jenoside yakorewe Abatutsi mu 1994, ashimangira ubushake bwa Repubulika ya Czech mu guteza imbere ubuhahirane hagati y’icyo gihugu n’u Rwanda mu rwego rwo gusingira Icyerekezo 2020.

Mu bice by’ubukungu bw’u Rwanda byaragaye ko Repubulika ya Czech yagirana mo ubuhahirane n’imikoranire n’u Rwanda harimo ibirebana n’ingufu [energy], kubyaza umusaruro ibikomoka ku bihingwa, umutekano ndetse n’ubwirinzi. Hategeka yagaragarije Tlapa ubushake bw’u Rwanda mu kungukira ubumenyi mu by’ikoranabuhanga ndetse n’ubumenyingiro kuri kiriya gihugu.

Martin Tlapa kandi yanagiranye umubonano n’Umunyamabanga Uhoraho muri Minisiteri y’Ubuhinzi n’Ubworozi, Tony Nsanganira, baganira ku buryo iki gice cy’ubukungu gihuriwemo n’abanyarwanda bagera kuri 70% ndetse kikaba cyihariye 33% by’umusaruro mbumbe w’igihugu na 50% by’ibyo u Rwanda rwohereza hanze, cyatezwa imbere kurushaho habayeho gutizwa umurindi na Repubulika ya Czech.

Uyu muyobozi wo muri Czech yanabonanye kandi na Minisitiri w’Ububanyi n’Amahanga Louise Mushikiwabo ku itariki 22 Nyakanga 2016, baganira ku mubano w’ibihugu byombi.

Repubulika ya Czeck ni igihugu giherereye ku mugabane w’u Burayi rwagati gituwe n’abaturage miliyoni hafi 11. Iki gihugu gifite ubuso bungana na 78,866 km2 , naho umurwa mukuru wacyo ni Prague.

Minisitiri w'Ububanyi n'Amahanga wungirije wa Repubulika ya Czech, Martin Tlapa
Repubulika ya Czeck ni igihugu giherereye ku mugabane w'u Burayi rwagati

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .