Minisitiri Shyaka yasabye abaturiye Pariki y’Igihugu ya Gishwati - Mukura kubyaza umusaruro amahirwe bafite

Yanditswe na Mukwaya Olivier
Kuya 25 Ukwakira 2020 saa 10:12
Yasuwe :
0 0

Minisitiri w’Ubutegetsi bw’Igihugu, Prof Shyaka Anastase, yibukije abaturiye Pariki y’Igihugu ya Gishwati- Mukura mu karere ka Rutsiro, ko ari amahirwe akomeye kuri bo mu rwego rwo kwiteza imbere, ku buryo batagomba kuyapfusha ubusha.

Ibi yabibabwiye ubwo yasuraga bimwe mu bikorwa remezo by’amajyambere bigamije guteza imbere ubukerarugendo muri Pariki y’Igihugu ya Gishwati- Mukura, kuri uyu wa Gatandatu.

Bimwe mu bikorwa Minisitiri Shyaka yasuye ari kumwe n’izindi nzego z’ubuyobozi, harimo inyubako ya kijyambere yubatswe n’Urwego Rushinzwe Iterambere mu Rwanda, RDB, izafaha abashinzwe iyi pariki, yubatswe ku nkengero zayo.

Umuyobozi w’Akarere ka Rutsiro, Ayinkamiye Emerance, yavuze ko ku bufatanye na RDB, bafashije abaturage kwishyira mu makoperative azafasha mu gucunga iyi pariki, no gufasha ba mukerarugendo.

Ati “Twamaze gushyira abaturage mu makoperative, ubu hari amakoperative atandatu yiganjemo urubyiruko azacunga ibikorwa bikikije pariki, harimo gufasha ba mukerarugendo, harimo kubashakira amafunguro no kubarangira inzira.”

Minisitiri Shyaka yibukije Abanyarutsiro ko ibikorwa remezo by’ubukerarugendo ari amahirwe leta irimo kubaha, abasaba ko byababera amahirwe, kandi ntabace mu myanya y’intoki.

Ati “Ni amahirwe menshi arimo ashyirwa muri aka gace tugendeye no kuri iyi nyubako y’ubukerarugendo leta y’u Rwanda yahashyize, twari tumenyereye Nyungwe ifite ibikorwa nk’ibi, ariko ubungubu rero na Gishwati na Mukura ziraje.”

“Ni irindi terambere rije, turifuza rero ko aya mahirwe akamira Abanyarutsiro, ariko akabanza akabyazwa ubukire n’ubukungu bigaragara.”

Iyi Pariki irimo urusobe rw’ibinyabuzima nk’inyamaswa, inyoni ndetse n’ibiti biteye amabengeza.

Nyuma y’aho umuhanda wiswe Kivu Belt utangiye gukoreshwa, Akarere ka Rutsiro kavuye mu bwigunge, hashyirwa bimwe mu bikorwa bizamura ubukerarugendo bwihariye harimo kurira imisozi ikikije ikiyaga cya Kivu cyangwa kugenda n’amagare.

Ubuyobozi bw’Akarere bushishikariza abikorera gushora imari muri ubu bukerarugendo.

Abaturage biyemeje kubyaza umusaruro ubukerarugendo muri Pariki y'Igihugu ya Gishwati - Mukura
Abayobozi batandukanye bitabiriye iki gikorwa
Abayobozi batembereye ku nyubako izajya ifasha mu bukerarugendo kuri iyi pariki
Minisitiri Shyaka yasuye ibikorwa byo gutunganya ubuki, bishamikiye ku ishyamba rya Gishwati
Minisitiri Shyaka yasabye Abanyarutsiro kubyaza umusaruro ibikorwa by'ubukerarugendo leta yabegereje
Minisitiri Shyaka mu kiganiro n'abaturage bo mu Karere ka Rutsiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .