Minisitiri Sezibera yagaragaje amahitamo y’u Rwanda aruganisha ku iterambere

Yanditswe na Evariste Nsengimana
Kuya 13 Nyakanga 2019 saa 09:36
Yasuwe :
0 0

Minisitiri w’Ububanyi n’Amahanga, Dr Sezibera Richard, yatangaje ko kimwe mu bituma u Rwanda rukomeza gutera imbere, ari amahitamo rwakoze mu myaka myinshi ishize.

Sezibera yabigarutse mu kiganiro yagiranye mu cyumweru gishize na Perezida w’Umuryango ufite inkomoko mu Buhinde uharanira imiyoborere myiza, Observer Research Foundation, Samir Saran, nyuma y’inama ya Kigali Global Dialogue.

Muri icyo kiganiro kiganiro Samir Saran yabajije Sezibera icyo atekereza ku kuba ibihugu bitandatu mu icumi biri kuzamuka mu bukungu ku Isi ari ibyo muri Afurika.

Sezibera yasubije ko iterambere riri kugaragara muri Afurika ari ingenzi ndetse ko byinshi mu bihugu biri kuzamuka bidatera imbere kubera umutungo kamere bifite ahubwo ko ari ukubera amahitamo yabyo aganisha mu iterambere.

Ati “Ku gihugu cyanjye, mu myaka irenga icumi, aya mahitamo yashyizweho nk’umusingi uganisha ku iterambere. Ishoramari mu guhanga udushya, ubuzima, mu burezi, ndetse no mu bikorwaremezo by’ingenzi hagamijwe gushimangira iterambnere.”

Sezibera yakomeje avuga ko Afurika ari umugabane utanga icyizere cy’iterambere ariko ko ugifite byinshi byo gukora birimo gufasha abaturage bawo kugera ku iterambere.

Yagarutse kandi ku mbogamizi zigaragara kuri uyu mugabane ziterwa no kuba hari ibice bikigaragaramo ibibazo by’umutekano n’imiyoborere, avuga ko ari ikintu cyo gukemura; gusa ashimangira ko ibihugu byose bya Afurika bihuriye ku kuba byumva ko byatera imbere kandi vuba.

Sezibera kandi yagarutse ku cyerekezo cy’u Rwanda nyuma y’imyaka 25 Jenoside yakorewe Abatutsi ibaye, avuga ku mahitamo yarangajwe imbere na Perezida Kagame wahaye icyerekezo igihugu.

Yavuze ko ibyo aribyo byagejeje u Rwanda ku cyerekezo cya 2020 ndetse n’icya 2050 rurangamiye muri iki gihe gihuriweho na buri munyarwanda wese mu cyiciro cyose yaba arimo yaba ari ubarizwa mu miryango itegamiye kuri leta, abayobozi b’inzego z’ibanze, iz’amadini n’izindi.

Yavuze ko inkingi z’u Rwanda mu kugera ku cyerekezo rwihaye ari ukwimakaza amahoro n’umutekano bigirwamo uruhare n’abanyarwanda.

Yakomeje agaragaza kandi ko u Rwanda rwashoye imari mu burezi n’ubuzima “kuko dushaka abantu bize bafite ubushobozi bwo guhanga ubukire”.

Yongeyeho ati “Twashyize ishoramari mu bijyanye n’ibikorwaremezo, imihanga, ibijyanye n’indege, ndetse n’ingufu. Turi gukora ishoramari rikomeye mu bijyanye n’ingufu no gukwirakwiza amashanyarazi, gutunganya umusaruro ukomoka ku buhinzi no mu buhinzi ubwabwo.”

Minisitiri Sezibera yavuze ko inganda nyinshi zatangiye gukorera mu Rwanda uhereye kuzikora imyambaro ukagera ku z’ibinyabiziga kandi ko byose bikorwa bitabangamiye ibidukikije.

Yavuze ko u Rwanda n’ibindi bihugu bimwe byo muri Afurika bitigeze bigira ahantu heza ho gukorera ibikorwa bibifasha gutera imbere guhera mu myaka ya 1980-1990 kugera uyu munsi.

Ati “Twabayeho ntawe dufatanya igihe cyose ku bw’ibyo twahisemo gushora imari dukora ibyo tubonamo inyungu ku baturage bacu no kubaka ubufatanye n’abandi bumva ibyo dukora. Twubatse ubwo bufatanye kuko dutekereza ko ibidufitiye inyungu bishobora kuzigirira n’abandi.”

Minisitiri Sezibera yavuze ko atari byo kugira umuntu usaba guhitamo uwo mufatanya cyangwa ubufatanye mugirana aho guhitamo icyo ubona gifitiye inyungu igihugu cyawe n’abaturage.

Ati “Igifite akamaro ni uko dufite ibyo tugomba gukora n’abafatanyabikorwa babidufashamo. Ibyo tubiganiraho ku buryo ubwo bufatanye buri wese abugiramo inyungu. Birashobora ko impamvu yihishe inyuma y’uko kudakorana yaba ari ukuri uyu munsi cyangwa n’ikindi gihe.”

Minisitiri Sezibera yavuze ko ubufatanye hagati ya Guverinoma, abikorera, kaminuza n’ibigo by’ubushakashatsi ari ikinti cy’ingenzi ariko ikibazo ari ubwumvikane kuri ubwo bufatanye ariko ko hari icyizere ko nabyo bizashira.

Minisitiri Sezibera yagarutse ku mubano n’ubufatanye bidasanzwe u Rwanda rumaze igihe rufitanye n’u Buhinde n’uruhare bifite mu iterambere ry’u Rwanda.

Ati “Bimwe mu bice by’inganda zacu zateye imbere kubera ubwo bufatanye n’ibikorwa by’abashoramari b’Abahinde. Guverinoma zacu zifitanye umubano mwiza.”

Minisitiri Sezibera yasobanuye ko Perezida Kagame na Minisitiri w’Intebe w’u Buhinde, Narendra Modi, basangiye icyerekezo mu bijyanye no kongerera ubushobozi abaturage no kwihutisha iterambere.

Minisitiri w'Ububanyi n'Amahanga, Dr Richard Sezibera mu kiganiro na Samir Saran

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza