Minisitiri Rwamukwaya yasabye inganda kugira uruhare mu guteza imbere ubumenyingiro

Yanditswe na Mukwaya Olivier
Kuya 14 Nzeri 2018 saa 07:44
Yasuwe :
0 0

Umunyamabanga wa Leta muri Minisiteri y’uburezi ushinzwe amashuri y’imyuga n’ubumenyingiro, Rwamukwaya Olivier, yavuze ko leta ishyize imbere iterambere ry’amashuri y’imyuga, asaba inganda gufasha abanyeshuli kugira ubumenyi bwabafasha guhangana ku isoko ry’umurimo

Yabigarutseho ubwo kuri uyu wa Kane yasuraga uruganda rwa Bralirwa ku Gisenyi, muri gahunda yiswe Uburezi bufite Ireme.

Yagize ati “Gukorana n’inganda byo ni ihame, muri iki gihe ntabwo wavuga ko utegura abazajya gukora kandi aho bakorera harimo no mu nganda udakoranye nazo, ndetse n’abandi bikorera batanga akazi kubarangije amashuli.”

“Ibi tugiye kubiganira n’abayobozi b’amashuli kugira ngo tubashishikarize kujya bateganya igihe cyo gusura inganda bityo umuntu ajye arangiza mu ishuli afite ubumenyi bukenewe ku buryo ahita atangira gutanga umusaruro ategerejweho.”

Bamwe mu banyeshuli biga imyuga n’ubumenyingiro mu Karere ka Rubavu mu bigo byasuwe n’amatsinda ya Ministeri y’uburezi, bavuga ko ubumenyi bahabwa ku ishuli kuba bukiri hasi biterwa n’uko kwimenyereza umwuga bidashyirwamo imbaraga.

Uwineza Jack umwe mu banyeshuri biga muri Rubavu Technical College TVET (RTC) mu shami ry’amahoteli, avuga ko aho bajya kwimenyereza hari aho bagorwa n’ibikoresho bike.

Ati “Ujya ahantu kwimenyereza ugasanga hatari ibikoresho bihagije, hari abakozi bake, ikindi uba ukeneye umuntu ugukurikirana akamenya niba ibyo ukora ubikora neza nk’uwimenyereza kuko ukeneye kwiga ntabwo uje gukora, ugasanga uratakaza igihe nta n’ikintu kizima kigaragara uhakuye.”

Mu zindi mbogamizi abarezi bagarukaho zikoma mu nkokora ireme ry’uburezi muri bimwe mu bigo byigisha imyuga, harimo ikibazo cy’ibikoresho ndetse n’imfashanyigisho bidahagije.

Umuyobozi wa Rubavu Technical School Nsengimana Telephore avuga ko nubwo mu kigo ayoboye usanga ibikenewe by’ibanze babifite, hari ibindi bigo by’amashuri usanga bafite ibibazo byinshi nko kuba nta mfashanyigisho zihagije bafite

Ati “Turifuza ko twafashwa mu bijyanye n’ibitabo, ibitabo bya tekiniki usanga atari byinshi. Iyo tuganiriye n’abandi barezi usanga hari imbogamizi cyane y’ibikoresho mu mashuli, ku buryo usanga hari nkaho bigisha abana ibijyanye n’amashanyarazi ugasanga barakoresha ibitarabugenewe.”

Minisiteri y’uburezi igaragaza ko intambwe iterwa mu kwitabira amashuli y’imyuga n’ubumenyingiro ariyo kwishimira, kuko hashingiwe ku mibare y’umwaka wa 2017 abanyeshuri basabye kwiga mu mashuri y’imyuga bageraga ku 36.000.

Nu mu gihe mu myaka yashize imyumvire ngo yari ikiri hasi aho uwigaga imyuga yafatwaga nk’uwatsinzwe andi masomo.

Umunyamabanga wa Leta Ushinzwe amashuri y'imyuga n'ubumenyi ngiro, Olivier Rwamukwaya yasuye urwengero rwa Bralirwa i Rubavu
Umuyobozi Mukuru wa Bralirwa Boudewijn HAARSMA yasobanuriye Minisitiri Rwamukwaya uko bafasha abimenyereza umwuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza