Minisitiri w’Umutungo kamere Stanislas Kamanzi yiyamye abacukuzi batemewe b’amabuye y’agaciro mu ishyamba rya Mukura riherereye mu Karere ka Rutsiro.

Kamanzi yiyamye aba bacukuzi bakora uyu murimo ku buryo butemewe mu rugendo rw’iminsi ibiri yakoreye muri aka Karere, kuva ku wa gatanu tariki ya 3 Nyakanga; Akarere asanzwe ashinzwe by’umwihariko.

Muri uru ruzinduko Kamanzi yavuze ko ntako batagize ngo ibi bikorwa byo gucukura amabuye y’agaciro ku bantu batabifitiye uruhushya muri iri shyamba rya Mukura bihagarare ariko abantu bakora ibi bikorwa bakomeje kuvunira ibiti mu matwi, ati “Ubu hagiye kwitabazwa ubundi buryo kugira ngo ibi bikorwa bihagarare burundu.”

Nkuko Kamanzi yakomeje abivuga ngo abakora ibi bikorwa byo gucukura amabuye y’agaciro babanza gusaba ibyangombwa ariko abenshi muri iri shyamba bakaba bakomeje gukora ibi bikorwa nta byangombwa bafite.

Umunyamabanga nshingwabikorwa w’Intara y’i Burengerazuba Jabo Paul yavuze ko hari ibyangombwa byagiye bihabwa bamwe ariko harimo n’abandi bakora iki gikorwa batabyemerewe.

Jabo agira ati "Ubu hagiye gukorwa igenzura ryimbitse ku musozi wa Mukura harebwe abafite ibyangombwa kugira ngo iki gikorwa gicike.

Ishyamba rya Mukura rikungahaye ku mabuye y’agaciro ya Orflam rikaba riherereye mu karere ka Rutsiro.