Minisitiri Ingabire yasobanuye impamvu leta yashyizeho ishami rishinzwe ikoranabuhanga mu nzego za leta

Yanditswe na Ndahayo Emmanuel
Kuya 22 Ukuboza 2020 saa 04:14
Yasuwe :
0 0

Mu byemezo by’Inama y’Abaminisitiri yateranye mu cyumweru gishize, leta yemeje umwanzuro wo gushyiraho icyiciro cya mbere cy’Abayobozi Bakuru bashinzwe ikoranabuhanga mu ngeri zirimo ubucuruzi, inganda, ishoramari, ubutabera, ubuhinzi, ibidukikije, gukumira ibiza, ibikorwaremezo, uburezi ndetse n’inzego z’ibanze.

Abayobozi bemejwe ni barindwi, bazaba bafite intego yo gufasha inzego zifata ibyemezo kubishingira ku ikoranabuhhanga, kugira ngo ribe umusemburo wo kwihutisha serivisi ariko na none rifashe mu gukemura ibibazo bigaragara muri izo nzego, byose bigamije kwifashisha ikoranabuhanga mu kwihutisha iterambere ry’igihugu muri rusange.

Aba kandi bazaba bashinzwe gushyiraho uburyo bworohereza abaturage kugerwaho na serivisi z’ikoranabuhanga, binyuze mu koroshya izo serivisi no kuzikwirakwiza, kandi hagasuzumwa ko zikemura ibibazo bisanzwe muri buri rwego.

Minisitiri w’Ikoranabuhanga na Inovasiyo, Paula Ingabire, yavuze ko icyemezo cyo gushyiraho izo nshingano gishingira ku bushake bwa Leta bwo gukwirakwiza ikoranabuhanga.

Yagize ati “Mu myaka ishize, twari dufite inzego zishinzwe ikoranabuhanga muri buri kigo cya leta, bagakurikirana bya buri munsi serivisi z’ikoranabuhanga [z’icyo kigo]”.

“Ariko mu minsi iri imbere, uko turushaho kwifashisha amakuru ahamye mu igenamigambi n’ishyirwa mu bikorwa ryaryo; hakenewe kuvugurura amashami [ashinzwe ikoranabuhanga] agashingira ku [bantu bafite] ubumenyi bukwiye, bushobora gutuma iyi ntego igerwaho”.

Ingabire kandi yavuze ko aya mavugurura azagabanya akavuyo kari mu nzego zishinzwe ikoranabuhanga, ku buryo uru rwego ruzaba rufite imikorere ihamye muri buri kigo cya leta.

Yagize ati “Muri uku guhuza ibikorwa by’ikoranabuhanga ku rwego rwo hasi, turashaka gukuramo akavuyo k’aho wasangaga imiterere y’inzego z’ikoranabuhanga mu bigo bya leta, itazemerera gukemura ibibazo bihari”.

Yongeyeho kandi ko aya mavugurura ariyo shingiro ry’intego ya leta yo gukoresha ikoranabuhanga mu bikorwa byayo, ati “Tugamije gukoresha uburyo bw’ikoranabuhanga mu rwego rwo guteza imbere uru rwego [mu gihugu], ariko noneho tukanashoboza amashami ashinzwe ikoranabuhanga mu nzego za leta gushyira imbaraga nyinshi mu mishinga y’ikoranabuhanga izatuma za nzego [ubuhinzi, ubutabera n’ibindi] zigera ku ntego ziyemeje; ariko by’umwihariko tukubaka ubushobozi buzatuma tugera kuri icyo cyerekezo”.

Leta y’u Rwanda ishishikajwe cyane no guteza imbere ikoranabuhanga, ndetse ikanubakiraho igenamigambi ry’igihe kirekire, ari na ko irihindura inzira yo koroshhya ihererekanya rya serivise zitandukanye.

Kugeza ubu, nyinshi muri serivisi zitangwa na leta zirimo kwishyura imisoro n’ibindi byangombwa biboneka hifashishijwe ikoranabuhanga, ndetse mu minsi ishize leta ifatanyije n’ikigo MTN Rwanda batangiye gahunda yo gukwirakwiza telefoni ngendanwa zigezweho mu baturage batazifite, kugira ngo na bo bagerweho na gahunda za leta biboroheye ariko nanone bashobore gukoresha ikoranabuhanga no mu buzima bwabo bwa buri munsi.

U Rwanda rwakoresheje ikoranabuhanga mu guhangana n'icyorezo cya Coronavirus, kandi ryafashije mu guhangana na cyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .