Minisitiri Dr Mujawamariya yasabye abikorera gushora imari mu gutera no gucunga amashyamba

Yanditswe na Prudence Kwizera
Kuya 23 Ukwakira 2020 saa 04:21
Yasuwe :
0 0

Minisitiri w’Ibidukikije, Dr Mujawamariya Jeanne D’Arc, yashishikarije abikorera gushora imari mu gutera amashyamba, kuyacunga no kuyabyaza umusaruro kugira ngo bafashe igihugu kongera ubukungu no guhangana n’ihindagurika ry’ibihe ritera ingaruka zitandukanye.

Yabivugiye mu Karere ka Nyanza kuri uyu wa Gatanu tariki ya 23 Ukwakira 2020 ubwo yitabiraga ibikorwa byo kwizihiza ku nshuro ya 45 isabukuru yo gutera amashyamba, hanatangizwa igihembwe cy’amashyamba cya 2020/2021.

Yavuze ko amashyamba afite akamaro kanini mu rwego rw’ubuzima, ubukungu bw’igihugu n’imibereho myiza y’abaturage, asaba ko by’umwihariko abikorera bayashoramo imari.

Yagize ati “Abikorera turabakangurira gushora imari mu gutera, gucunga no kubyaza umusaruro amashyamba mu buryo burambye. Muri gahunda ya guverinoma y’imyaka irindwi biteganyijwe ko 80% by’amashyamba ya Leta azaba acunzwe n’abikorera mu mwaka wa 2024.”

Yakomje avuga ko kugeza ubu hegitali 21655 z’amashyamba ya Leta arizo zingana na 35,58% zimaze kwegurirwa abikora.

Dr Mujawamariya yashimangiye ko mu 2019 u Rwanda rwesheje umuhigo rwari rwarihaye wo kongera amashyamba akagera ku 30% by’ubuso bw’igihugu, ashimira abaturage n’abafatanyabikorwa babigizemo uruhare. Yavuze ko kuri ubu u Rwanda rugeze kuri 30,4% by’ubuso buriho amashyamba.

Ibarura ryakozwe mu 2016 ryagaragaje ko amashyamba y’abaturage agize 67% by’ubuso bwose bw’amashyamba ari mu gihugu ariko inyigo igaragaza ko ayo mashyamba afashwe nabi kandi atanga umusaruro muke.

Dr Mujawamariya ati “Ni muri urwo rwego Leta ikomeje kugira inama abaturage yo gusazura amashyamba yabo ndetse no kuyabyaza umusaruro ku buryo burambye agahurizwa hamwe ndetse ba nyirayo bakibumbira mu makoperative.”

Abaturage basabwe gushyira ingufu mu gutera ibiti bivangwa n’imyaka ndetse n’iby’imbuto ziribwa kandi bagaharanira gukoresha izindi ngufu mu gucana zitari izikomoka ku biti cyangwa bagateka ku mashyiga ya rondereza.

Bamwe mu baturage bo mu Murenge wa Muyira mu Karere ka Nyanza ahatewe ibiti bigera ku bihumbi 81 ku buso bwa hegitali 81 babwiye IGIHE ko bazabifata neza kugira ngo bikure kuko bazi akamaro kabyo.

Nyirahabimana Josée ati “Bitewe n’uko ubutaka bwacu bworoshye iyo imvura iguye isuri irabumanura ikaburunda mu kabande, rero ibi biti badutereye ndetse n’imirwanyasuri bacukuye bizaturindira ubutaka ntibwongere kugenda kandi tuzahinga tukeza. Ibi biti tuzabyitaho kugira ngo bikure neza kandi n’imirwanyasuri tuzajya tuyisubura.”

Kwizihiza isabukuru yo gutera amashyamba byahujwe no gutangiza ku mugaragaro umushinga wo gutera amashyamba no kubungabunga urusobe rw’ibinyabuzima mu gice cy’Amayaga, hagamijwe gukumira ko kiba ubutayu.

Ni umushinga w’imyaka itandatu uzakorera mu gice cy’Amayaga cy’uturere twa Kamonyi, Ruhango, Nyanza na Gisagara washowemo amafaranga y’u Rwanda agera kuri Miliyari 32 Frw uterwa inkunga na UNDP ku bufatanye na Global Environment Facility (GEF).

Uhagarariye UNDP mu Rwanda, Maxwell Gomera, yavuze ko muri rusange mu gice cy’Amayaga bazahatera ibiti miliyoni umunani mu gihe cy’imyaka itandatu kandi bazaha abaturage amashyiga arondereza ibicanwa.

Yagize ati “Igiti ni ubuzima, ntabwo dushobora kubaho neza ibiti bidahari, tuzakomeza gufatanya kugira ngo ibiti tuzatera bizatugirire akamaro.”

Biteganyijwe ko muri rusange umushinga wose uzagera ku baturage miliyoni imwe n’ibihumbi 300, naho abantu bagera ku bihumbi 150 biganjemo urubyiruko n’abagore bazawubonamo akazi.

Insanganyamatsiko y’uyu mwaka yo gutera amashyamba igira iti ‘Amashyamba ni umusingi w’imibereho myiza y’abaturage n’iterambere rirambye’.

Kwizihiza isabukuru yo gutera amashyamba byahujwe no gutangiza ku mugaragaro umushinga wo gutera amashyamba no kubungabunga urusobe rw’ibinyabuzima mu gice cy’Amayaga
Depite Murekatete Marie Thérèse atera igiti mu Karere ka Nyanza
Guverineri w'Intara y'Amajyepfo, Kayitesi Alice, Uhagarariye UNDP mu Rwanda, Maxwell Gomera na Minisitiri Dr Mujawamariya bafatanya gutera igiti
Abafatanyabikorwa mu gutera amashyamba no kuyitaho bashimiwe umusanzu wabo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .