00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri Dr Mujawamariya yagaragaje icyakorwa mu gukumira amapfa

Yanditswe na Prudence Kwizera
Kuya 30 Ukwakira 2022 saa 09:11
Yasuwe :

Minisitiri w’Ibidukikije, Dr Mujawamariya Jeanne D’Arc, yavuze ko imihindagurikire y’ibihe yugarije u Rwanda n’Isi muri rusange asaba buri wese kugira uruhare mu gukumira ingaruka zayo zirimo n’amapfa.

Yabigarutse ku wa 27 Ukwakira 2022 ubwo yari mu Murenge wa Rushashi mu Karere ka Gakenke mu gutangiza ku mugaragaro Umushinga w’imyaka itandatu [2022-2028] wo kubungabunga ibidukikije no guhangana n’ingaruka z’imihindagurukire y’ibihe no guteza imbere imiturire inoze witwa LDCF3 w’Ikigo cy’Igihugu cyo Kubungabunga Ibidukikije (REMA).

Uwo mushinga uzakorera mu Turere twa Gakenke na Kirehe uzita ku bikorwa birimo guhangana n’imihindagurikire y’ibihe hibandwa ku gusubiranya imisozi n’ibibaya no kubakira ubudahangarwa imidugudu yo mu cyaro yatoranyijwe.

Mu Karere ka Gakenke hazibandwa ku bice byibasiwe n’ibiza byaturutse ku mvura nyinshi yateye isuri n’imyuzure ikabije yangije ibidukikije igatwara n’ubuzima bw’abantu naho muri Kirehe hazibandwa ku bice bikunda guhura n’amapfa kubera izuba ryinshi.

Minisitiri Dr Mujawamariya ati “Utu turere twatoranyijwe kubera ko turi mu twakozweho cyane n’ingaruka z’imihindagurikire y’ibihe.”

Yakomeje avuga ko imihindagurikire y’ibihe ari imwe mu mbogamizi zugarije Isi kandi zigira ingaruka ku buzima bwa muntu no ku bukungu.

Ati “Aha natwe iki kibazo kiratwugarije cyane! Muri ibi bihe turimo imyaka yakagombye kuba igeze mu gihe cy’isarura ariko ntabwo ari ko bimeze! Ibi byoze ni ingaruka z’imihindagurikire y’ibihe.”

Hazibandwa ku bikorwa birimo guca amaterasi y’indinganire, imiringoti, haterwe ibiti by’imbuto n’ibivangwa n’imyaka, gutera amashyamba mashya no kuvugurura ashaje n’imigezi izaterwaho imigano hagamijwe kubungabunga inkombe zayo. Ku bufatanye n’izindi nzego hazakorwa ubuso bugera kuri hegitari 23,560.

Hazubakwa hanasanwe inzu zigera kuri 500 mu midugudu hagamijwe kubakira abayituye ubudahangarwa ku ngaruka z’imihindagurikire y’ibihe.

Iyo midugudu kandi izahabwa ibigega bifata amazi mu ngo 500; abaturage bafashwe mu kongera ubwiza n’ubwinshi bw’umusaruro uturuka ku buhinzi binyuze muri Twigire Muhinzi no mu murimashuri.

Hazatangwa imbabura 5000 zigabanya ibicanwa kandi haterwe inkunga imishinga y’abaturage ibyara inyungu; Ikigo cy’Iteganyagihe kizafashwa kugira ngo haboneke amakuru y’iteganyagihe yizewe kandi vuba; habeho no kuvugurura politiki y’imiturire mu cyaro hongerwamo uburyo bwo guhangana n’imihindagurikire y’ibihe.

Minisitiri Dr Mujawamariya ati “Uyu mushinga kandi uzafasha u Rwanda kugera ku ntego rwiyemeje kugabanya imyuka ihumanya rwohereza mu kirere ku kigero cya 38% bitarenze mu mwaka 2030 no kugera ku kigero cy’aho imyuka ihumanye yoherezwa mu kirere ihwanye n’ikurwamo mu 2050.”

Yavuze ko mu rwego rwo kwiteza imbere no guhangana n’ingaruka z’Icyorezo cya COVID-19, inyungu z’umushinga zizagera ku bagenerwabikorwa bagera 56.000 aho muri bo 50% bazaba ari abagore, abaturage bagera ku 15.000 bazahabwa akazi mu gihe cy’imyaka itandatu uzamara.

  Yasabye abaturage kuba abafatanyabikorwa beza

Minisitiri Dr Mujawamariya yasabye abaturage hirya no hino mu gihugu kuba abafatanyabikorwa beza mu kwita ku bidukikije no guhangana n’ihindagurira ry’ibihe hirindwa ingaruka zaryo zirimo amapfa, gutwara ubuzima bw’abantu n’izindi.

Yabasabye kugira uruhare mu bikorwa byose bizakorwa, birimo gutera ibiti no kurwanya isuri; kubungabunga ibizakorwa kugira ngo birambe; gukomeza kurwanya isuri mu mirima yabo; kurengera ibidukikije muri rusange hirindwa gukoresha amashashi akoreshwa inshuro imwe; gutera amashyamba, kurengera inkengero z’imigezi n’ibindi.

Bamwe mu baturage bavuze ko bishimiye inama bagiriwe zo guhangana n’ihindagurika ry’ibihe bavuga ko biteguye kuzikurikiza kuko batangiye kubona ingaruka mbi zo kwangirika kw’ibidukikije.

Dusengimana Innocent wo mu Karere ka Gakenke yavuze ko Umugezi wa Gaseke umaze igihe ubatwarira ubutaka kuko inkengero zawo zitabungabunzwe.

Ati “Imvura iragwa amazi akuzura akadutwarira amasambu kuko nta biti biteye ku nkengero. Inama batugiriye ni nziza kuko zizadufasha gutera imigano kuri uyu mugezi kugira ngo utongera kwangiza ubutaka bwacu.”

Muri iki gihe imvura yatinze kugwa bituma abahinzi barara ihinga ndetse n’aho iguye ikagwa nabi ikangiza ibikorwa remezo bitandukanye.

Uwo mushinga watewe inkunga ikabakaba miliyari 9 Frw aturutse mu Kigega cy’Ibidukikije no mu Ishami ry’Umuryango w’Abibumbye ryita ku Iterambere.

Minisitiri w’Ibidukikije, Dr Mujawamariya Jeanne D’Arc, yifatanyije n'abaturage mu gutera ibiti
Minisitiri w’Ibidukikije, Dr Mujawamariya Jeanne D’Arc, yavuze ko imihindagurikire y’ibihe yugarije u Rwanda n’Isi muri rusange asaba buri wese gukumira ingaruka zayo
Minisitiri Dr Mujawamariya yasabye abaturage hirya no hino mu gihugu kuba abafatanyabikorwa beza mu kwita ku bidukikije no guhangana n’ihindagurira ry’ibihe
Bamwe mu baturage bavuze ko bishimiye inama bagiriwe zo guhangana n’ihindagurika ry’ibihe bavuga ko biteguye kuzikurikiza
Mu byakozwe harimo gutera ibiti ku misozi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .