Minisitiri Busingye yashimangiye ko nta wahangara u Rwanda rwirwanyeho mu myaka 25 ishize

Yanditswe na Ferdinand Maniraguha
Kuya 7 Mata 2019 saa 08:21
Yasuwe :
0 0

Minisitiri w’ubutabera akaba n’intumwa nkuru ya Leta yavuze ko nta kizatsimbura u Rwanda rwabashije kwivana mu bibazo rwari rurimo mu myaka 25 ishize, nyuma ya jenoside yakorewe abatutsi mu 1994.

Yabitangaje kuri uyu wa Gatanu ubwo yasozaga inama mpuzamahanga y’iminsi ibiri yigaga kuri Jenoside, International Conference for Genocide.

Busingye yavuze ko mu myaka 25 ishize u Rwanda rwari ruhanganye n’ingaruka zatewe na politiki y’ivangura no kubiba urwango mu baturage byagejeje kuri Jenoside yakorewe Abatutsi mu 1994.

Yavuze ko nyuma yo guhagarika Jenoside, Guverinoma y’Ubumwe itashoboraga gukomeza umurongo nk’uwo ahubwo yahurije hamwe abanyarwanda bose ngo bishakemo umurongo w’uko bazongera kwiyubaka.

Ati “Byasabye ko abanyarwanda bicara bakarebera hamwe igifite akamaro n’ikidafite akamaro, bakemeranya ku mahame mashya yo kugenderaho. Muri iyi myaka 25 ntabwo twigeze tujya gutira amahame ya demokarasi tugenderaho mu Bwongereza cyangwa i Washington na Paris, ahubwo twabiganiriyeho nk’abanyarwanda kandi biri gutanga umusaruro.”

Minisitiri Busingye yavuze ko abanyarwanda bahisemo kuba bo ubwabo aho kugendera ku bandi hashingiwe ku mateka banyuzemo n’ejo hazaza bifuza.

Yashimangiye ko niba u Rwanda rwarabashije kwirwanaho mu bibazo rwari rurimo mu myaka 25, nta kindi gishobora kubatsimbura mu gihe kizaza.

Ati “Ni ahacu guhaguruka twemye duhagarara ku byo twemera nk’Inkotanyi z’ukuri. Niba u Rwanda rwarirwanyeho mu myaka 25 ishize, tuzahora turi indatsimburwa ibihe byose.”

Umujyanama w’umuryango w’abibumbye ku kurwanya Jenoside, Adama Dieng, yavuze ko umuhate no kwiyubaka abanyarwanda bagaragaje bikwiye kubera urugero Isi yose.

Ati “Nubwo mwatengushywe n’inshuti, abanyarwanda mweretse isi ko ubuzima bufite intego buzahora butsinda amacakubiri yose.”

Yongeyeho ko mu gihe u Rwanda rwibuka Jenoside yakorewe Abatutsi ari n’umwanya wo guharanira ko ibyabaye bitakongera kuba ahandi ku isi.

Jenoside yakorewe Abatutsi yahitanye abasaga miliyoni mu gihe cy’amezi atatu.

Minisitiri Busingye yashimangiye ko nta wahangara u Rwanda rwirwanyeho mu myaka 25 ishize
Ibi biganiro byitabiriwe n'abantu bo mu nzego zitandukanye
Hatangiwemo ibiganiro bigaruka kuri Jenoside n'ingaruka zayo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza